1 Chronicles 12

Amharic Dawro DFBE (ጌሻ ማጻፋ) No Year

← Chapter 11 Jump to: Chapter 13 →

1ዳዊተ ቂሳ ናኣ ሳኦላፐ ባቃት ቢደ፥ ጽቅላጋን ኡቴዳ ዎደ፥ አኮ ዬዳ አሳቱ ሀዋፐ ካሊደ ጻፈቴዳዋንታ። ኡንቱንቱ ካሰ ዳዊታ ኦላን ማዴዳ ምኖ አሳቱዋ ግዶን ደኢኖ።

2ኡንቱንቱ ዎንዳፍያ አሳቱዋ፤ ቃይ ባረንቱ ኡሸቻ ኩሽያንነ ሀድርሳ ኩሽያን ሹቻ ያምባርሻን ኦላናዉ ዳንዳዪኖ። ኡንቱንቱ ቢንያማ ዛርያ ግድያ ሳኦላ ዳቦቱዋ።

3ኡንቱንቱ ካፑ አህኤዘራ፤ አህኤዘራፐ ስምና ዮኣሻ፤ ኡንቱንቱ ግብአፐ ዬዳ ሻማአ ናና። ሀራቱ ቃይ አዝማዌታ ናና ግድያ ይዝኤላነ ፐሌጻ፥ ባራካ፥ አናቶታፐ ዬዳ ዬሀ፥

4ሀታማቱዋ ግዶን ዎልቃማ ግዲደ፥ ኡንቱንታ ካለያ ጋባኦናፐ ዬዳ ይሽማእያ፥ ኤርማሳ፥ ያሃዝኤላ፥ ዮሀናና፥ ገዴራፐ ዬዳ ዮዛባዳ፥

5ኤልኡዛያ፥ ያርሞታ፥ ባኣልያ፥ ሻማርያ፥ ሀሪፋፐ ዬዳ ሻፋጽያ፥

6ቆራሀ ያራቱዋ ግድያ ኤልቃና፥ ይሽያ፥ አዛርኤላ፥ ዮኤዘራነ ያሾብኣማ፥

7ጋዶራፐ ዬዳ ይሮሃማ ናና ዮኤላነ ዛባድያ።

8ዳዊተ መላ ቢታን ደእያ ባቃት አትያ ሳኣን ኡት ደእሽን፥ ጋደ ዛርያፐ አሳቱ አኮ ዬድኖ። ኡንቱንቱ ምኖ አሳቱዋነ ኦላዉ ጊጌዳዋንታ፤ ቃይ ጎንዳልያነ ቶራ ኦይቃናዉ ዳንዳይያዋንታ። ኡንቱንቱ ሶምእ ጋሙዋ ዴሙዋ ማላቴ፤ ኡንቱንቱ ደረቱዋ ሁጲያን ጉፕያ ገንእያዳን ኤሌሊኖ።

9ኡንቱንቱ ካፑ ኤጼራ፤ ላኤን ኦባድያ፤ ሄዘን ኤልኣባ፤

10ኦይደን ምሽማና፤ እቼሸን ኤርማሳ፤

11ኡሱፑን አታያ፤ ላፑን ኤልኤላ፤

12ሆስፑን ዮሀናና፤ ኡዱፑን ኤልዛባዳ፤

13ታማን ኤርማሳ፤ ታማነ እተን ማክባናያ።

14ሀዋንቱ ጋደ ዛርያ ኦላንቻቶ ካፓቱዋ። ኡንቱንቱፐ ላፍያዋንቱ ጼቶ ካፓቱዋ፤ ምንያዋንቱ ሻአ ካፓቱዋ።

15ዮርዳኖሳ ሻፋይ፥ ጋጻፐ ጋጻ ጋካናዉ ኩም ክጼዳ ኮይሮ አግናን ፕኔዳዋንቱ ሀዋንታ። ኡንቱንቱ ዎምባን አዋይ ዶልያ ባጋናነ አዋይ ዉልያ ባጋናነ ኡቴዳ አሳ ኡባ የደርሴድኖ።

16ቢንያማ ዛራቱዋፐነ ይሁዳ ዛራቱዋፐ አማሬዳ አሳቱ ዳዊታኮ ጌሱዋ ዬድኖ።

17ዳዊተ ኡንቱንቱና ጋከታናዉ ከሲደ፥ ሀዋዳን ያጌዳ፤ “ህንተንቱ ታና ማዳናዉ ሳሩዋን ታኮ ዬዳዋ ግዶፐ፥ ታ ዎዛናይ ህንተናና እትፐ ግዳናዋ። ሽን ህንተንቱ ታና ታ ሞርከቶ አ እማናዉ ዬዳዋ ግዶፐ፥ ህንተንታ ኤርተ! ታን ኦዳ ኢታባይ ባይና ድራዉ፥ ኑ አዎቱዋ ጾሳይ ሄዋ በኦ፤ እ ህንተንታ ፕርዶ!” ያጌዳ።

18ሄዋፐ ጉይያን፥ ሀታማቱዋ ካፑዋ አማሳያ ቦላ ጾሳ አያናይ ዎና፥ “ዳዊታ፥ ኑን ነዋንታ! እሰያ ናአዉ፥ ኑን ኔናና እትፐ ደኤቶ! ሳሩ ነዉ ግዶ! ኔና ማድያዋንቱስካ ሳሮተይ ግዶ! ነ ጾሳይ ኔና ማዴ” ያጌዳ። ዳዊተ ኡንቱንታ አኪደ፥ ባረ ኦላንቻቶ ካፓቱዋ ኦዳ።

19ዳዊተ ፕልስጼማቱዋና እትፐ ግዲደ፥ ሳኦላ ኦላናዉ ቤዳ ዎደ፥ ምናሰ ዛርያፐ አማሬዳ አሳቱ ዳዊታን ጋከቴድኖ። ሽን ፕልስጼማ አሳቱዋ ካፓቱ ዳዊተነ ዳዊታ አሳይ ባረናና ቤናዳን ድጌድኖ። ፕልስጼማ አሳቱ ሎይ ዞረቴዳዋፐ ጉይያን፥ ኡንቱንታ ጉየ የዴድኖ፤ አያዉ ጎፐ፥ ዳዊተነ ዳዊታ አሳይ ኡንቱንቱ ካትያ ሳኦላዉ አ እማነንቶነ ጊደ ያዬድኖ።

20ዳዊተ ጽቅላጋ ካታማ ስምሽን፥ ምናሰ ዛርያፐ ዳዊታ ማዳናዉ ከሴዳ ሻላቃቱ አድናሀ፥ ዮዛባዳ፥ ይድኤላ፥ ምካኤላ፥ ዮዛባዳ፥ ኤልሀነ ጽልታያ።

21ኡንቱንቱ ኡባይካ ጻላነ ዎልቃማ አሳ ግድያ ድራዉ፥ ዳዊተ ጩጉዋ ካልያ ዎደ፥ ኡንቱንቱ አ ማዴድኖ።

22ዳዊታ ኦላንቻቱ ጾሳ ኦላንቻቱዋዳን ጮራና ጋካናዉ፥ አ ማድያ አሳይ ጋላስ ጋላስ ጉጀቴ።

23መና ጎዳይ ሃሳዬዳዋዳን ሳኦላ ካዉተ ዳዊታዉ ዛራናዉ ኦላዉ ዳንጭ ጊጊደ፥ ከብሮናን ደእያ ዳዊታኮ ዬዳ ኦላንቻቱ ፓይዱ ሀዋፐ ካሊደ ጻፈቴዳዋ።

24ጎንዳልያነ ቶራ ኦይቂደ፥ ኦላዉ ዳንጭ ጊጌዳ ይሁዳ ዛራቱ ኡሱፑን ሻአነ ሆስፑን ጼታ።

25ስሞና ዛርያፐ ኦላዉ ጊጌዳ ጻላነ ዎልቃማ ኦላንቻቱ ላፑን ሻአነ እት ጼታ።

26ሌዊያ ዛርያፐ ኦይዱ ሻአነ ኡሱፑን ጼታ።

27አሮና ዛራቱዋ ካፑ ዮዳሀ፤ ዮዳሄና እትፐ ሄዙ ሻአነ ላፑን ጼቱ አሳቱ ደኢኖ።

28ቃይ ጻዶቀ ያላጋ ጻላነ ዎልቃማ አሳ፤ ጻዶቃ አዉዋ ጎልያ አሳፐ ላታማነ ላኡ ካፓቱ አናና እትፐ ደኢኖ።

29ቢንያማ ዛርያ ግዴዳ ሳኦላ ዳቦቱ ሄዙ ሻአ አሳ። ሽን ቢንያማ ዛርያፐ ዳርያ ባጋ አሳይ ሳኦላ ጎልያ አሳዉ ሄ ዎዲ ጋካናዉ አማነትያዋንታ።

30ኤፍሬማ ዛርያፐ ባረንቱ አዎቱዋ ጎልያ አሳን ኤረቴዳ ጻላነ ዎልቃማ አሳቱ ላታሙ ሻአነ ሆስፑን ጼታ።

31ዳዊታ ካተያናዉ ባናዉ ዶረቴዳ ምናሰ ዛርያፐ ባጋቱ ታማነ ሆስፑን ሻአ።

32ቃይ እስራኤልያ አሳይ አያ ኦናዉ በስንቶ፥ ዎድያባ ሻክ ኤርያ አኬካንቻ አሳቱ፥ ይሳኮራ ዛርያዉ ካፓቱ ላኡ ጼታ፤ ኡንቱንቱ ዳቦቱ ኡባይ ኡንቱንቶ አዛዘቲኖ።

33ኦላ ሻሉዋ ኡባ ኦይቂደ፥ ባረንቱ ኩመን ዎዛናን ዳዊታ ማዳናዉ ጊጌዳ ኦላንቻቱዋን ዛብሎና ዛርያ አሳቱ እሻታሙ ሻአ።

34ንፍታሌማ ዛርያፐ እት ሻአ ካፓቱ ደኢኖ፤ ጎንዳልያነ ቶራ ኦይቂያ ሀታማነ ላፑን ሻአ አሳቱ ኡንቱንቱና እትፐ ደኢኖ።

35ዳና ዛርያፐ ኦላዉ ጊጌዳ አሳቱ ላታማነ ሆስፑን ሻአነ ኡሱፑን ጼታ።

36ኦላዉ ከሳናዉ አሴራ ዛርያፐ ጊጌዳዋንቱ ኦይታሙ ሻአ።

37ዮርዳኖሳ ሻፋፐ ሄፍን አዋይ ዶልያ ባጋን ደእያ ሮቤላ ዛርያፐ፥ ጋደ ዛርያፐነ ምናሰ ዛርያ ባጋፐ ኦላ ሻሉዋ ኡባ ኦይቂደ ዬዳ አሳቱ እት ጼታነ ላታሙ ሻአ።

38ሀ ኦላዉ ጊጌዳ ኦላንቻቱ ኡባይ ዳዊታ እስራኤልያ ቦላ ካተያናዉ ባረንቱ ቆፋ ቃቺደ፥ ከብሮነ ካታማ ዬድኖ። ቃይ እስራኤልያፐ አቴዳዋንቱካ ካተያናዉ ዳዊታ ካተዪደ እት ዎዛና ግዴድኖ።

39ኡንቱንቱ ዳቦቱ ኡንቱንቶ ኮሽያዋ ጊግስ ዎዳ ድራዉ፥ ሚድነ ኡሺደ ዳዊታና ሄዙ ጋላሳ ኡቴድኖ።

40እስራኤልያ አሳዉ ናሸቻ ግድያ ድራዉ፥ ሁጲሳ ባጋና ደእያ ይሳኮራፐ፥ ዛብሎናፐነ ንፍታሌማፐ አሳቱ ዳሮ ቁማ አሄድኖ። ልያ፥ ባላስያ ኡክ፥ ዎይንያ ቴራ፥ ዎይንያ ኤሳነ ዛይትያ ሀርያን፥ ባቁሉዋን፥ ጋሉዋንነ ቦራን ጫኒደ አሄድኖ፤ ቃይካ ኡንቱንቱ ሚዛነ ዶርሳ ሹኪደ ማናዉ አኪደ ዬድኖ።

← Chapter 11 Jump to: Chapter 13 →