1 Corinthians 1

Amharic Dawro DFBE (ጌሻ ማጻፋ) No Year

Jump to: Chapter 2 →

1ታን፥ ጾሳ ሸንያን የሱስ ክርስቶስ ኪቴዳዋ ግዳናዉ ጼሰቴዳ ጳዉሎስነ፥ ኑ እሻ ሶስተኒስ፥

2ቆሮንቶሳን ደእያ ጾሳ አማንያ አሳቶ፥ የሱስ ክርስቶሳን ጌዬዳዋንቱስነ፥ ኑዉ ጎዳ ግድያ ኑ ጎዳ የሱስ ክርስቶሳ ሱን ኡባ ሳኣን ጼስያ ኡባቱዋና ጌሻ ግዳናዉ ጼሰቴዳዋንቶ ሀ ዳብዳቢያ ጻፌቶ።

3ጾሳይ፥ ኑ አዉነ ኑ ጎዳይ የሱስ ክርስቶስ ህንተንቶ አ ኬካተነ ሳሮተ እሞ።

4ጾሳይ ክርስቶሳ የሱሳ ባጋና ህንተንቶ እሜዳ አ ኬካተ ድራዉ፥ ታን ኡባ ዎደ ህንተንቶ ጾሳ ጋላታይ።

5ታን ክርስቶሳዉ ማርካትያዌ ህንተንቱን ምኔዳ ድራዉ፥ ህንተ ኡባባን፥ ሃሳያ ኡባን ኤራተ ኡባን፥ አን ዱረቴድታ።

7ሀዋዳን ህንተ ኑ ጎዳ የሱስ ክርስቶሳ ዩሳ ናግሽን፥ አያና እሞታፐ ሀራይ አቶ እቱነ ህንተንቶ ፓጨና።

8ቃይ ኑ ጎዳ የሱስ ክርስቶሳ ጋላሳን ህንተ ካ ባይናዋንታ ግዳናዳን፥ ዉርሰይ ጋካናዉ እ ህንተንታ ምንሳናዋ።

9ባረ ናኣ ኑ ጎዳ የሱስ ክርስቶሳ እትፐተዉ ህንተንታ ጼሴዳ ጾሳይ አማነቴዳዋ።

10ሽን ታናዳን አማንያዋንቶ፥ እት ዎዛናንነ እት ቆፋን እትፐ ግዳናፐ አትን፥ ሻኮተይ ህንተ ግዶን ደኤና ማላ፥ ህንተ ኡባይ እት ሃሳያ ሃሳያናዳን፥ ኑ ጎዳ የሱስ ክርስቶሳ ሱንን ታን ህንተንታ ዎሳይ።

11አያዉ ጎፐ፥ ታናዳን አማንያዋንቶ፥ ቃሎአ ሶይ አሳይ ህንተንቱባ፥ ህንተ ግዶን ዋላሳይ ደእያዋ፥ ታዉ ኦዴድኖ።

12ታን ግያዌ ሀዋ፤ ህንተንቱ ሁጲያን ሁጲያን፥ “ታን ጳዉሎሳዋ። ታን አጲሎሳዋ። ታን ኬፋዋ። ታን ክርስቶሳዋ” ያጊታ።

13ክርስቶስ ሻከቴዴ? ህንተንቱ ድራዉ፥ ማስቃልያ ቦላ ምስማርያን ሸቲደ ካቀቴዳዌ ጳዉሎስ? ዎይ ህንተ ጳዉሎሳዉ ግዳናዉ ጻማቀቴድቴ?

14ታን ቃርስጶሳፐነ ጋዮሳፐ አትን፥ ህንተንቱፐ ኦናነ ጻማቃቤና ድራዉ፥ ጾሳ ጋላታይ።

15ሄዋ ድራዉ፥ ኦንነ ህንተንታ ታዉ ግዳናዳን ጻማቀቴድታ ጋናዉ ዳንዳየና።

16ቃይ፥ ኤ፥ እስጽፋኖሳ ሶይ አሳካ ታን ጻማቃድ። ሽን ሀራ ጉጃደ ጻማቃድታንቶነ ዎዛና አከ።

17አያዉ ጎፐ፥ ክርስቶስ ታና ምሽራቹዋ ቃላ ኦዳና ማላ ኪቴዳፐ አትን፥ ጻማቃና ማላ ኪትቤና፤ ቃይ ክርስቶስ ማስቃልያ ቦላ ሀይቄዳዌ መላ ግደና ማላ፥ ታን አሳ አዳ ኤራተ ቃላን ታማርስከ።

18አያዉ ጎፐ፥ ክርስቶስ ማስቃልያ ቦላ ሀይቄዳዋ ኦድያ ቃላይ ይያዋንቶ ኤያተ። ሽን ኑዉ አትያዋንቶ ጾሳ ዎልቃ።

19ጾሳ ማጻፋይ፥ “ታን ኤራንቻቱዋ አዳ ኤራተ፥ ባይዛና፤ ቃይ አኬካንቻቱዋ አኬካካ ይሳና” ያጌ።

20አዳ ኤራንቻይ ሀቃን ደኢ? ህግያ ታማርስያዌ ሀቃን ደኢ? ዎይ ሀ አላምያ ጾናናዉ ፓሉመትያዋንቱ ዋናንድኖሻ? ጾሳይ ሀ ሳኣ አ ኤራተይ ኤያተ ግድያዋ በሴዳ!

21አያዉ ጎፐ፥ አሳይ ባረ ሁጰ አ ኤራተን ባረና ጾሳ ኤረና ማላ፥ ጾሳይ ባረ አ ኤራተን ድጊደ፥ ኑን ኦድያ ኤያ ቃላን አማንያዋንታ አሻናዉ ቆፔዳ።

22አይሁዳቱ ማላታ ኦቺኖ። ቃይ ግሪከ አሳቱ አ ኤራተ ዎልቃማ ኮሻ ኮዪኖ።

23ሽን ኑን ማስቃልያ ቦላ ምስማርያን ሸቲደ ካቀቴዳ ክርስቶሳባ ኦዴቶ። ሄዌ አይሁዳቶ ቦ፤ ቃይ አይሁዳ ግደናዋንቶ ኤያተ።

24ሽን ጾሳይ ጼሴዳዋንቶ አይሁዳቶካ ግሪካቶካ ኑን ኦድያ ጾሳ ዎልቃይነ አ አ ኤራተይ ክርስቶሳ።

25አያዉ ጎፐ፥ ጾሳ ኤያተይ አሳ አዳ ኤራተፐ አ፤ ቃይ አ ላፋተ ጌተትያዌካ አሳ ምኖተፐ ምኔ።

26ስም ታናዳን አማንያዋንቶ፥ ጾሳይ ህንተንታ ጼስያ ዎደ ህንተ ዎይሳ ማላ አሰንቶ ቆፕተ። አሳ ቆፋን ህንተ ግዶን አ ኤራንቻቱ፥ ዎልቃማቱነ ቃ ሼሻቱ ዳራ ግድክኖ።

27ሽን ጾሳይ አዳ ኤራንቻቱዋ ዬላያናዉ፥ አላምያን ደእያ ኤያቱዋ ዶሬዳ፤ ቃይ ምናቱዋ ዬላያናዉ፥ አላምያን ደእያ ላፋቱዋ ዶሬዳ።

28ጾሳይ ሀ አላምያን ዎልቃማባ ጊደ ቆፕያዋ ይሳናዉ፥ ሀ አላምያ ማደናባ ካቶባነ ሀንቤናባ ዶሬዳ።

29ሄዋ ድራዉ፥ ኦንነ ጾሳ ስንን ጬቀታናዉ በሰና።

30ሽን ጾሳይ ህንተንቶ ክርስቶስ የሱሳ ደኡዋ ኦ እሜዳ። ክርስቶስ ኑዉ አ ኤራተ፥ ጽሎተ፥ ጌሻተነ አቶተ ግዴዳ።

31ሄዋ ድራዉ፥ ጾሳ ማጻፋይ፥ “ጬቀትያ ኡራይ ኦንነ፥ ጎዳይ ኦዳዋን ጬቀቶ” ያጌ።

Jump to: Chapter 2 →