Acts 3

Amharic Dawro DFBE (ጌሻ ማጻፋ) No Year

← Chapter 2 Jump to: Chapter 4 →

1እት ጋላስ፥ ጰጽሮስነ ዮሃንስ ጾሳ ዎሳናዉ ኡዱፑ ሳትያን ጌሻ ጎልያ ቤድኖ።

2የለቶደፐ ዶሚደ፥ ጉንዳ ግዲደ ደእያ እት ብታኒ ጌሻ ጎልያ ገልያ አሳፐ ሚሻ ዎሳናዉ፥ ኡባ ጋላስ ዳሪ ሎአ ግያ ጌሻ ጎልያ ፐንግያን አሳይ አፊደ ዎያዌ ደኤ።

3ሄ ዎባ ብታኒ፥ ጰጽሮስነ ዮሃንስ ጌሻ ጎልያ ገላና ሀንሽን በኢደ፥ ሚሻ ኡንቱንታ ዎሴዳ።

4ጰጽሮስ ዮሃንሳና አ ጫድ ጼሊደ፥ “ኑኮ ሃ ጼላ” ያጌዳ።

5ዎባ ብታኒ ኡንቱንቱፐ እትባ አካናዉ ኮዪደ፥ ኡንቱንቱኮ ጼሌዳ።

6ሽን ጰጽሮስ አ፥ “ታዉ ሚሻይ ባዋ፤ ሽን ታዉ ደእያባ ታን ነዉ እማና፤ ናዝሬትያ የሱስ ክርስቶሳ ሱንን ደንዳደ ሀመታ” ያጌዳ።

7ያቲደ፥ ዎባ ብታንያ ባረ ኡሸቻ ኩሽያን ኦይቂደ፥ ፑደ ደንዳ፤ ኤለካ አ ገዲነ ሜሽ መቀይ ምን አጌዳ።

8ብታኒ ፑደ ጉፒደ፥ ደንድ ኤቄዳ፤ ያነ ሃነ ሀመታ ዶሜዳ። ሄዋፐ ጉይያን ሀመቲደ፥ ጉፒድነ ጾሳ ጋላቲደ፥ ኡንቱንቱና እትፐ ጌሻ ጎልያ ገሌዳ።

9እ ሀመትሺናነ ጾሳ ጋላትሽን፥ አሳይ ኡባይ አ በኤዳ።

10ያቲደ፥ ሚሻ ዎሳናዉ ዳሪ ሎአ ግያ ጌሻ ጎልያ ፐንግያን ኡቴዳዌ አ ግዴዳዋ አኬኬድኖ፤ እ ሀኔዳዋ በኢደ ማላለቴድኖ።

11ብታኒ ጰጽሮሳነ ዮሃንሳ ኦይቂ ኡቴዳ ዎደ፥ አሳይ ኡባይ ማላለቲደ፥ ሶሎሞነ ባራንዳ ግያ ሳን እትፐ ኡንቱንቱኮ ዎጼድኖ።

12ጰጽሮስ አሳ በኤዳ ዎደ ኡንቱንቶ ያጌዳ፤ “እስራኤልያ አሳቶ፥ አያዉ ሀዎ ማላለቲቴ? ዎይ አያዉ ኑና ጫድ ጼሊቴ? ኑን ኑ ዎልቃን ዎይ ጾሳ ማላትያዋን ሀ ብታንያ ሀመዳዋ ህንተንቶ ማላቲ?

13አብራሃሞ ጾሳይ፥ ይሳቃ ጾሳይ፥ ያቆባ ጾሳይ፥ ኑ አዎቱዋ ጾሳይ፥ ህንተንቱ አ እሜዳዋ ጵላጾስ ብላናዉ ቆፕ ኡቴዳ ዎደ፥ ህንተንቱ አ ስንን፥ ‘ኑን አ ኤሮኮ’ ጌዳ ባረ ናኣ የሱሳ ቦንቼዳ።

14ሽን ህንተንቱ ጌሻነ ጽሉዋ፥ ‘ኑን አ ኤሮኮ’ ጊደ፥ ሸምፑዋ ዎዳዋ አ ድራ ህንተንቶ ብላናዉ ጵላጾሳ ዎሴድታ።

15ደኡዋ እምያዋ ህንተንቱ ዎድታ፤ ሽን ጾሳይ ሀይቁዋፐ አ ደንዳዎ ኑን ማርካ።

16ሀ ዎባ ብታንያ የሱሳ ሱን ዎልቃይ ምንሴዳ፤ ህንተንቱ በእያዌነ ኤርያዌካ እ አ ሱንን አማንያዋን ኦሰቴዳ፤ ሀ ህንተንቱ ኡባ ስንን አ ሀዋዳን ሎይዳዌ፥ የሱሳ እ አማንያዋ።

17“ሀእካ ታናዳን አማንያዋንቶ፥ ህንተንቱካ ህንተንታ ካልያዋንቱዳን፥ ኤረናን ኦዳዋ ታን ኤራይ።

18ሽን ጾሳይ በን፥ ናባቱዋ ኡባቱዋ ዶናን፥ ‘ክርስቶስ ዋየታና በሴ’ ያጊደ ኦዴዳ፤ ባረ ኦዴዳዋካ ሄዋዳን ፖሌዳ።

19ስም ጾሳይ ህንተንቱ ናጋራ ማራናዳን፥ ጎዳ ማታፐ አያና ምኖተ ዎዲ ህንተንቶ ያናዳንነ ጾሳይ የሱስ ክርስቶሳ ካሰ ህንተንቶ ኦደቶዋዳን የዳናዳን፥ ህንተንቱ ናጋራ ፓጺደ ጾሳኮ ስምተ።

21ጾሳይ ጌሻ ግዴዳ ባረ ናባቱዋ ዶናን በንፐ ዶሚደ ሃሳዬዳዋዳን፥ ኡባባይ ኦራጽያ ዎዲ ጋካናዉ፥ የሱስ ሳሉዋን ጋምአናዉ በሴ።

22ሙሴ፥ ‘ጎዳይ ጾሳይ፥ ህንተንቱ ዛርያ ግዶፐ ህንተንቶ ታናዳን ናብያ ደንና፤ ህንተንቱ እ ግያዋ ኡባ ስስተ።

23ሄ ናቢ ኦድያዋ ስሰና አሳይ ኦንነ አሳ ግዶፐ ሻከት ዮ’ ያጌዳ።

24“ቃይ ሳሜላፐ ዶሚደ፥ አፐ ካላ ደንዴዳ ናባቱ ኡባቱ፥ ሀ ዎድያባ ኦዴድኖ።

25ህንተንቱ ናባቱዋ ናና፤ ቃይ ጾሳይ አብራሃሞ፥ ‘ሳኣን ደእያ አሳ ኡባ ታን ነ ዘረ ባጋና አንጃና’ ያጊደ ኑ አዎቱዋና ጫቄዳ ጫቁዋ ላትያ ናና።

26ጾሳይ ህንተንታ ኡባቱዋ ህንተንቱ ኢታ ኦሱዋፐ ዛሪደ አንጃና ማላ፥ ባረ ቆማ ደንደ፥ ህንተንቶ ኮይሮ የዴዳ” ያጌዳ።

← Chapter 2 Jump to: Chapter 4 →