Daniel 6

Amharic Dawro DFBE (ጌሻ ማጻፋ) No Year

← Chapter 5 Jump to: Chapter 7 →

1ካቲ ዳርዮሰ ባረ ካዉተ ኡባ ግዶን ባረፐ ጋርሳና ቢታ ሞድያ ጼታነ ላታሙ አሳቱዋ ሱንያዌ ሎአ ጊደ ቆፔዳ።

2ቃይ ካትያዉ አያነ ፓጭሰናዳን፥ ሄ ቢታ ሞድያዋንታ ጼላና ማላ፥ ሄዙ አሳቱዋ ካፑዋ ኦደ ዶሬዳ፤ ዶረቴዳዋንቱፐ እቱ ዳኔላ።

3ዳኔል ኦሱዋ ኦናዉ ባረዉ ደእያ ዱማ ኤራን ሀራ ካፓቱዋፐነ ቢታ ሞድያዋንቱፐ አደ ቤቴዳ። ሄዋ ድራዉ፥ ካቲ አ ባረ ኩመን ካዉተ ቦላ ቃ ኦደ ሱንናዉ ሀልቼዳ።

4ያትና፥ ቢታ ሞድያዋንቱነ ካፓቱ ዳኔላ ሞታናዉ፥ እ አይስያ አይሱዋ ቦላ ባላ ደማና ጊደ ኮዬድኖ። ሽን እ ሎይ ሱረነ አማነትያ አሳ፤ ቃይ ጌላባ ኦና አሳ ግዴዳ ድራዉ፥ አ ሞታናዉ አ ቦላ አይ ባላነ ደምበይክኖ።

5ዉርሰን ኡንቱንቱ ጊደ፥ “አ ጾሳ ህግያ ባጋና ግዶፐፐ አትና፥ ሀራ ባጋና ዳኔላ ሞትያባ ደሞኮ” ያጌድኖ።

6ሄዋፐ ጉይያን፥ ቢታ ሞድያዋንቱነ ካፓቱ እትፐ ካትያኮ ቢደ፥ ሀዋዳን ያጌድኖ፤ “ካትያዉ ዳርዮሳ፥ መናዉ ደአ!

7ኑን ነ ካዉተ ኦሱዋ ኦያ ካፓቱ፥ ቢታ ሞድያዋንቱ፥ ኦላ ጋዳዋቱ፥ ዞርያዋንቱነ አዉራጃ ሞድያዋንቱ ኡባይ ማዬዳ እት ዞረታይ ደኤ። ሄዌካ ሀችፐ ቢደ ሀታሙ ጋላሳይ ጋካናዉ፥ አይ አሳይነ ኔና ካትያ ዎሳናፐ አትና፥ ሀራ አይ አሳካ ዎይ አይ ጾሳካ ዎሰናዳን፥ ኔን አዋዩዋ ከሳናዳን ኢጼዳ ዎስያዌ ደኦፐ፥ ጋሞቱዋ ኦላን ኦለታናዳን ኔን አዛዛናሳ።

8ስም ካትያዉ፥ ሀ አዋዩ ሻረተና ሜዶናቱዋነ ፓርሰቱዋ ህግያዳን፥ ምኖነ ላመተናዋ ግዳና ማላ ፓራማ” ያጌድኖ።

9ሄዋ ድራዉ፥ ካቲ ዳርዮሰ አዋዩዋ ጻፊደ ፓራሜዳ።

10ዳኔል አዋዩ ፓራመት ከሴዳዋ ኤሬዳ ዎደ፥ ባረ ጎለ ቤዳ፤ ፖቅያን ደእያ ክፍልያ ገሌዳ። ሄ ክፍልያ ማስኮቲ የሩሳላመ ባጋ ስሚደ ዶየት ደእሽን፥ ባረ ካሰ ዎስያዋዳንካ ጉልባቲደ፥ ባረ ጾሳ ጋላቲደ፥ ሀች ሀች ሄዙ ገደ ዎሴዳ።

11ሄዋፐ ጉይያን፥ ሀ አሳቱ እትፐ ቢደ፥ ዳኔል ባረ ጾሳ ዎስሺናነ ማዱዋ ኦችሽን ደሜድኖ።

12ካትያኮ ቤድኖ፤ ካትያ፥ “ካትያዉ፥ ሀ ሀታሙ ጋላሳቱዋ ግዶን ኔና ዎሳናፐ አትና፥ ሀራ አይ አሳካ ዎይ አይ ጾሳካ ዎስያዌ ጋሞቱዋ ኦላን ኦለታናዳን አዋያበይኪየ?” ያጊደ አዋዩዋባ ሃሳዬድኖ። ካቲ ዛሪደ፥ “አዋያድ፤ አዋዩ ሻረተና ሜዶናቱዋነ ፓርሰቱዋ ህግያዳን ምኔዳዋ” ያጌዳ።

13ኡንቱንቱ፥ “ካትያዉ፥ ያትና ሄኮ ይሁዳፐ ኦሞደቲደ፥ ዬዳዋንቱፐ እቱዋ ግድያ ዳኔል፥ ነዉካ ኔን ፓራማደ ከሴዳ ነ አዋዮካ አዛዘተና። እ ሀእካ ሀች ሀች ሄዙ ገደ ባረ ጾሳ ዎሴ” ያጌድኖ።

14ካቲ ሄዋ ስሴዳ ዎደ ሎይ ካዮቴዳ፤ ዳኔላ አሻናዉ ቆፋ ቃቺደ፥ አዋይ ዉላና ጋካናዉ፥ አሽያ ኦግያ ኡባ ኮዬዳ።

15ሄ ዎደ አሳቱ እትፐ ካትያኮ ቢደ፥ “ካትያዉ፥ ሜዶናቱዋነ ፓርሰቱዋ ህግያዳን ግዶፐ፥ ካቲ አዋዬዳ አዋዩ ዎይ አዛዜዳ አዛዙ ላመተናዋ ነዉ ኤራ” ያጌድኖ።

16ሄዋ ድራዉ፥ ካቲ አዛዝና፥ ዳኔላ አሂደ፥ ጋሞቱዋ ኦላን ኦሌድኖ። ካቲ ዳኔላ፥ “ኔን ኡባ ገደ ጎይንያ ጾሳይ ኔና አሾ” ያጌዳ።

17ኡንቱንቱ ሹቻ አሂደ፥ ኦላ ዶና ባሬድኖ፤ ዳኔላ ቦላ ኦሰቴዳባይ ላመተና ማላ፥ ካቲ ባረ ማታፋነ ባረ ካዉተ ካፓቱዋ ማታፋ ጎርዴዳ ሹቻ ቦላ ዎዳ።

18ሄዋፐ ጉይያን፥ ካቲ ባረ ጎልያ ስሚደ፥ ቁማ ሜናንነ ፓሽክስያዋ አያካ ባረኮ ሺሸናን፥ ገምእሹዋና ዪደ አቄዳ።

19ዎንታ ጉራን ካቲ ደንዲደ፥ ኤሌሊደ ጋሞቱዋ ኦላኮ ቤዳ።

20ኦላኮ ጋኪደ ካዩዋን፥ “ደኡዋ ጾሳ ቆማዉ ዳኔላ፥ ኔን ኡባ ገደ ጎይንያ ነ ጾሳይ ኔና ጋሞቱዋፐ አሻናዉ ዳንዳዬዴ?” ያጊደ ጼሴዳ።

21ዳኔል ዛሪደ፥ “ካትያዉ፥ መናዉ ደአ!

22ታ ጾሳይ ባረ ኪታንቻ ኪቲደ፥ ጋሞቱዋ ዶና ጎርዴዳ፤ ኡንቱንቱ ታና ቦችበይክኖ። አያዉ ጎፐ፥ ታን አ ስንን ጽሉዋ። ቃይ ካዎ፥ ታን ነ ስንንካ ኢታባ ኦበይከ” ያጌዳ።

23ካቲ ሎይ ናሸቴዳ፤ ዳኔላ ኦላፐ ከሳናዳን አዛዜዳ። ዳኔል ኦላፐ ከሴዳ፤ ባረ ጾሳን እ አማነቴዳ ድራዉ፥ አ ቦላን አያ ደሸቴዳ ሳአይካ ቤትቤና።

24ሄዋፐ ጉይያን፥ ዳኔላ ሞቴዳ አሳቱዋ አሀናዳን ካቲ አዛዜዳ። ኡንቱንቱ ኦይቀቲደ፥ ባረንቱ ማጫ አሳናነ ባረንቱ ናናቱዋና እትፐ ዪደ፥ ኡባይካ ጋሙዋ ኦላን ኦለቴድኖ። ኡንቱንቱ ኦላ ዉርሰ ጋከናን ደእሽን፥ ጋሞቱ ሶጲ አኪደ፥ ኡንቱንቱ መቀ መንሬድኖ።

25ሄዋፐ ጉይያን፥ ካቲ ዳርዮሰ አሳ ኡባዉ፥ ካዉተቶ ኡባዉነ ዱማ ዱማ ቃላን ሃሳይያ ዛረቶ ኡባዉ ሀዋዳን ያጊደ ጻፌዳ፦ “ሳሮ ደኢቴ!

26“ታ ካዉተን ደእያ አሳይ ኡባይ ዳኔላ ጾሳዉ ያያና ማላነ ኮኮራና ማላ፥ ታን አዋዩዋ ከሳድ። “አያዉ ጎፐ፥ እ ደኡዋ ጾሳ፤ ቃይ እ መናዉ ደእያዋ። አ ካዉተይ ሙለካ የና፤ አ ካተቱዋ ማታይካ ሙለ አተና።

27እ አሼነ፥ መቱዋፐ ከስ አኬ። ሳሉዋንካ ሳንካ፥ ማላታነ ኦራባ ኦ። ዳኔላ ጋሞቱዋ ዶናፐ፥ አሼዳዌ አ!” ያጌዳ።

28ሄዋ ድራዉ፥ ሀ ዳኔል ዳርዮሳ ካዉተ ዎደነ ፓርስያ ቂሮሳ ካዉተ ዎደ ኡባን እሻሊደ ደኤዳ።

← Chapter 5 Jump to: Chapter 7 →