Hosea 4

Amharic Dawro DFBE (ጌሻ ማጻፋ) No Year

← Chapter 3 Jump to: Chapter 5 →

1ህንተኖ፥ እስራኤልያ አሳቶ፥ መና ጎዳ ቃላ ስስተ! አያዉ ጎፐ፥ ሀ ጋድያን ደእያ አሳ ኡባ መና ጎዳይ ሞትያባይ ደኤ። ሄዌካ፥ ሀ ጋድያን አማኑ፥ ሲቁነ ጾሳ ኤርያዌ ባዋ።

2ሀ ጋድያን ደእያባይ ሸቃ፥ ዎርዱዋ፥ አሳ ዎያዋ፥ ዉኤነ ሻርሙጻ ጻላላ። ኡንቱንቱ ጫቁዋ ኡባ ኮሌድኖ፤ አሳ ዎ ዎዋ ካሌ።

3ሄዋ ጋሱዋን ቢታይ መላና፤ ጋድያን ደእያ ኡባይ ዳቡራና። ሳኣ ዶአቱካ፥ ሳሉዋ ካፎቱካ፥ ሀራይ አትና፥ አባ ሞለቱካ ሀይቃና።

4ጾሳይ ሀዋዳን ያጌ፤ “ህንተኖ፥ ቄሳቶ፥ ታን ህንተና ሞትያባይ ደኤ። ሄዋ ድራዉ፥ ኦንነ ሀራ አሳና ፓሉመቶፖ፤ ቃይ ኦንነ ሀራ አሳ ሞቶፖ።

5ህንተ ጋላስ በታና፤ ትምቢትያ ኦድያዋንቱካ ህንተናና ቃማ በታና። ሄዋ ድራዉ፥ ታን ህንተ ዳዮ ይሳና።

6ታ አሳይ ኤራተይ ይና ባዬዳ። ህንተ ኤራተ እጼዳ ድራዉ፥ ታንካ ህንተ ታዉ ቄስያ ግዳናዋ እጻይ። ህንተ ጾሳ ህግያ ህንተ ዶጌዳ ድራዉ፥ ታንካ ህንተ ናናቱዋ ዶጋና።

7“ቄሳቱ ዳር ዳር ቤዳ ኬና፥ ታና ዳርስ ናቄድኖ፤ ታንካ ኡንቱንቱ ቦንቹዋ ዬላዉ ላማና።

8ታ አሳ ናጋራይ ኡንቱንቶ ቁማ ግዴዳ፤ ሄዋ ድራዉ፥ ኡንቱንቱ ታ አሳ ኢታባ ኦስሳናዉ ጃሚኖ።

9ቄሳቱ ካ አሳይ ሀንያዋዳን ሀናና። ታን ኡንቱንቱ ሀኖታ ድራዉ፥ ኡንቱንታ ሙራና፤ ቃይ ኡንቱንቱ ኦሱዋዳን፥ ኡንቱንቶ ዛራና።

10ኡንቱንቱ መና ጎዳ አጌዳ ድራዉ፥ ማና፥ ሽን ካልክኖ፤ ሻርሙጻና፥ ሽን ናናቱዋ ጮርስክኖ።

11“ሻርሙጻተይ፥ ጋምኤዳ ዎይንያ ኤሳይነ ያላጋ ዎይንያ ኤሳይ ታ አሳ ዎዛና ባይዜ።

12ታ አሳይ ምፐ ኦሰቴዳ ኤቃ ምስልያ ዞርያ ኦቼ፤ ኡንቱንቱ ጻምአይ ኡንቱንቱ ኦሻ ዛሬ። ሻርሙጻ አያናይ ኡንቱንታ ባለ፤ ኡንቱንቱ ባረንቱ ጾሳፐ ሻከቲደ ሻርሙጼድኖ።

13ደረቱዋ ሁጲያን ያርሹዋ ያርሺኖ፤ ዞዘቱዋ ቦላንካ ኩዋይ ሎኦ ግድያ አዱሳነ ዳሻ ምቱዋ ጋርሳንካ እጻና ጩዋዪኖ። “ሄዋ ድራዉ፥ ህንተ ማጫ ናናይ ሻርሙጻ ግዲኖ፤ ህንተ ናናቱዋ ማጫ አሳቱካ ሻርሙጺኖ።

14ህንተ ማጫ ናናይ ሻርሙጽያ ዎደነ ህንተ ናናቱ ማጫ አሳቱ ሻርሙጽያ ዎደ፥ ታን ቃጻይከ፤ አያዉ ጎፐ፥ አቱማ አሳቱ ባረንቱ ሁጲያን ሻርሙጽያዋንቱና ዙፐቲኖ፤ ሻርሙጽያዋንቱና ያርሹዋ ያርሺኖ። ሄዋ ድራዉ፥ አኬካይ ባይና አሳይ አ ዎና።

15“እስራኤልያ አሳቶ፥ ህንተ ሻርሙጻ ከሶፐካ፥ ይሁዳ አሳይ ህንተዋዳን፥ ባይዛንቻ ግዶፖ። ገልጋላ ቦፕተ፤ ቤት-አዌነካ ፑደ ከሶፕተ፤ ደኡዋን ደእያ መና ጎዳይ ኤሮ! ያጊደ ጫቆፕተ።

16እስራኤልያ አሳይ ማካላንቻ ኡሳትዋዳን ማካሌዳ። ያትና፥ መና ጎዳይ ኡንቱንታ አኮ ደምባን ዶርሳ ማራቱዋዳን ዋቲደ ሄማኔ?

17ኤፍሬማ አሳይ ኤቃቱዋን ጋከቴዳ፤ ኡንቱንታ አግ ባሽተ።

18ኡንቱንቱ ዳሮ ዎይንያ ኡሽ ስሚደ፥ ሻርሙጽያዋ አግክኖ፤ ኡንቱንታ ሞድያዋንቱካ ዬላይያዋ ሎይ ዶሲኖ።

19ጫርኩ ኡንቱንታ አፋና፤ ባረንቱ ኤቃዉ ያርሼዳ ያርሾቱ ጋሱዋን ኡንቱንቱ ዬላታና።

← Chapter 3 Jump to: Chapter 5 →