Leviticus 20

Amharic Dawro DFBE (ጌሻ ማጻፋ) No Year

← Chapter 19 Jump to: Chapter 21 →

1መና ጎዳይ ሙሳ ሀዋዳን ያጌዳ፤

2“እስራኤልያ አሳዉ ሀዋዳን ያጋደ ኦዳ፥ ‘እስራኤልያ አሳፐ ግድና፥ ዎይ በቲደ ዪደ እስራኤልያ ግዶን ደእያ ሀራ ቢታ አሳፐ ግድናካ፥ ኦንነ ባረ ናናቱዋፐ እቱዋ ሞሎካ ግያ ኤቃዉ አደ እሞፐ፥ ሄ አሳይ ሀይቆ፤ ሄ ቢታ አሳይ አ ሹቻን ጫዲደ ዎ።

3ታን ሄ ብታንያ እጻና፤ አ አሳ ግዶፐ ሾዳደ አ ይሳና። አያዉ ጎፐ፥ እ ባረ ናናቱዋፐ እቱዋ ሞሎካ ግያ ኤቃዉ እምያዋን፥ ታ ዱንካንያ ቱንሴዳ፤ ታ ጌሻ ሱንካ ካዉሽሴዳ።

4ሄ ብታኒ ባረ ናናቱዋፐ እቱዋ ሞሎካዉ እምያ ዎደ፥ ሄ ቢታ አሳይ በኢደ፥ ሸነኮ ጎፐ፥ ቃይ ብታንያካ ዎናን አጎፐ፥

5ታን ታ ሁጲያዉ ሄ ብታንያነ ሄ ሶ አሳ እጻና፤ ሞሎከና ሻርሙጻናዉ አ ካልያ ኡባቱዋ ኡንቱንቱ አሳ ግዶፐ ቦህተ።

6“ ‘አይ አሳይነ ታናን አማነተናን እጺደ፥ ሞይትልያ ሃሳይስያዋንታነ ሻሬቾቱዋ ኦቻናዉ ቦፐ፥ ታን አ እጻና፤ አ አሳ ግዶፐካ ይሳና።

7“ ‘ታን፥ መና ጎዳይ፥ ህንተ ጾሳ ግድያ ድራዉ፥ ስም ህንተ ህንተና ዱማይተ፤ ቃይ ጌሻ ግድተ።

8ታ ህግያ ናግተነ ኦተ። ታን ህንተና ጌሽያ መና ጎዳ።

9“ ‘አይ አሳይነ ባረ አዉዋ ዎይ ባረ ዳዮ ሸቆፐ ሀይቆ። እ ባረ አዉዋ ዎይ ባረ ዳዮ ሸቄዳ ድራዉ፥ አ ሱ አጩ አ ቦላና።

10“ ‘እት አሳይ ባረ ሾሩዋ ማቻትና ግሶፐ፥ ሄ ግሴዳ ብታኒነ ምሽርታ ላኡካ ሀይቂኖ።

11ባረ አዉዋ ማቻትና ግሴዳ አሳይ ባረ አዉዋ ካዉሽሴዳ፤ ኡንቱንቱ ላኡካ ሀይቂኖ። ኡንቱንቱ ሱ አጩ ኡንቱንቱ ቦላና።

12እት አሳይ ባረ ናኣ ማቻትና ግሶፐ፥ ኡንቱንቱ ላኡካ ሀይቂኖ። ኡንቱንቱ ቱናባ ኦድኖ። ኡንቱንቱ ሱ አጩ ኡንቱንቱ ቦላና።

13“ ‘እት አቱማ አሳይ ማጫ አሳና ግስያዋዳን አቱማ አሳና ግሶፐ፥ ኡንቱንቱ ላኡካ ቱናባ ኦዳ ድራዉ ሀይቂኖ። ኡንቱንቱ ሱ አጩ ኡንቱንቱ ቦላና።

14እት አሳይ ናቶነ አቶነ እትፐ አክያዋ ግዶፐ፥ ሄዌ ቱናባ፤ ህንተ ግዶን ቱናተይ ደኤና ማላ፥ እነ ኡንቱንቱነ ታማን ጹገትኖ።

15“ ‘እት አሳይ መህያና ግሶፐ፥ እ ሀይቆ፤ ሄ ማጫ መሀቶካ ዎተ።

16እት ማጫ አስ መህያና ግሶፐ ሄ ምሽራቶነ ሄ መህያ ላኡዋካ ዎተ፤ ኡንቱንቱ ሀይቂኖ። ኡንቱንቱ ሱ አጩ ኡንቱንቱ ቦላና።

17“ ‘እት አሳይ ባረ ምቻቶ ባረ አዉዋ ናትና ዎይ ባረ ዳይ ናትና ግሶፐ፥ ሄዌ ፖኮባ። ኡንቱንቱ ባረንቱ አሳ ግዶፐ ቦሄትኖ። እ ባረ ምቻቶ ካዉሼዳ ድራዉ፥ እ ባረ ናጋራን ኦሸቴ።

18እት አሳይ ፒላይ ዬዳ ማጫን ካሉዋ ቃሪደ ኢናና ግሶፐ፥ ኡንቱንቱ ላኡካ ባረንቱ አሳ ግዶፐ ቦሄትኖ። አያዉ ጎፐ እ እዝ ሱይ ጎግያ ፑልቱዋ ካሎዬዳ፤ እዛካ ባረ ሱይ ጎግያ ፑልቱዋ ካሎያዱ።

19“ ‘ነ ዳይ ምቻትና ዎይ ነ አዉዋ ምቻትና ግሶፓ፤ አያዉ ጎፐ፥ ሄዋ ኦያዌ ባረ ማታ ዳቡዋ ካዉሽያዋ። ህንተ ላኡካ ህንተ ናጋራን ኦሸታና።

20እት አሳይ ባረ አዉዋ እሻ ማቻትና ግሶፐ፥ እ ባረ አዉዋ እሻ ካዉሽሴዳ። ኡንቱንቱ ባረንቱ ናጋራን ኦሸታና፤ ኡንቱንቱ ላኡካ ናኣ የለናን ሀይቃና።

21እት አሳይ ባረ እሻ ማቻቶ አኮፐ፥ ሄዌ ቱናተ። እ ባረ እሻ ካዉሽሴዳ፤ ኡንቱንቱ ላኡካ ናኣ የልክኖ።

22“ ‘ስም ህንተ ደአናዳን፥ ታን ህንተና ገልስያ ቢታይ ህንተና ጩቼና ማላ፥ ህንተ ታ ህግያነ ታ አዛዙዋ ናግተነ ኦተ።

23ታን ህንተ ስንፐ ይስያ አሳቱዋ ደኡዋ ዎጋ ካሎፕተ። ኡንቱንቱ ሀዋ ኡባ ኦዳ ድራዉ፥ ታን ኡንቱንታ ሸነታድ።

24ሽን ታን ህንተና፥ “ኡንቱንቱ ቢታ ህንተ ላታና፤ ህንተ ሄ ቢታ ህንተዋ ኦናዳን፥ ሄ ማይነ ኤሳይ ጎግያ ቢታ ታን ህንተንቶ እማና” ያጋድ። ታን ህንተና ሀራ አሳቱዋፐ ዱማያ ከሴዳ መና ጎዳ ህንተ ጾሳ።

25“ ‘ሄዋ ድራዉ ህንተ ጌሻ ግዴዳ መሄቱዋነ ካፎቱዋ ጌሻ ግደናዋንቱፐ ሻኪደ ኤርተ። ታን ሀዋንቱ ህንተንቶ ቱና ጋ ዎዳ መሄቱዋን፥ ካፎቱዋንነ ሳኣን ቃጸረትያባቱዋን ኡባን ህንተ ሁጲያ ቱንሶፕተ።

26ታን መና ጎዳይ ጌሻ ግድያ ድራዉነ ህንተ ታዋ ግዳና ማላ ህንተና ሀራ አሳፐ ዱማዬዳ ድራዉ፥ ህንተካ ታዉ ጌሻ ግድተ።

27“ ‘እት አቱማ አሳይ ዎይ ማጫ አሳይ ሞይትልያና ሃሳይያዋ ዎይ ሻሬቾ ግዶፐ፥ ኡንቱንቱ ሀይቃናዉ በሰ። ኡንቱንቱ ሹቻን ጫደትኖ። ኡንቱንቱ ሱ አጩ ኡንቱንቱ ቦላና’ ያጋ” ያጌዳ።

← Chapter 19 Jump to: Chapter 21 →