Revelation 4

Amharic Dawro DFBE (ጌሻ ማጻፋ) No Year

← Chapter 3 Jump to: Chapter 5 →

1ሄዋፐ ጉይያን፥ ታን ሳሉዋን ዶያ ፐንግያ በኣድ፤ ቃይ ታዉ ማላካታዳን ኦድሽን፥ ታን ስሴዳ ኮይሮ ኮሻይ ታና፤ “ሀዋፐ ጉይያን፥ ሀናናዉ በስያዋ ታን ኔና በሳና፤ ሃ ከሳ” ያጌዳ።

2ኤለካ ታን ጌሻ አያና ሞዱዋ ግዶ ገላ አጋድ። በእተ፥ ሳሉዋን ካዉተ ኦይዲ ደኤ፤ ሄ ኦይድያን እቱ ኡቴዳ።

3ሄ ኡቴዳዋ ማላይ አልኦ እያስጲድያ ሹቻዳንነ አልኦ ሰርድኖነ ሹቻዳን ጶሌ። ካዉታ ኦይዲ ዙሉዋን ዩይ አደ ኡባ ባጋና አልኦ ማርግድያ ሹቻዳን ጶሌ።

4ሄ ካዉተ ኦይድያ ዩይ አደ፥ ሀራ ላታማነ ኦይዱ ካዉተ ኦይደቱ ደኢኖ፤ ኡንቱንቱን ቦ ማዩዋ ማዪደ፥ ሁጲያን ዎርቃ ካላቻ ዎዳ ላታማነ ኦይዱ ጭማቱ ኡቴድኖ።

5ካዉተ ኦይድያፐ ዋልቃንይ፥ ኮሹንቻይነ ጉጉን ጉንይ ከሴዳ፤ ቃይ ካዉተ ኦይድያ ስንን ላፑ ጾምፓቱ ፖኢኖ። ሄዋንቱ ጾሳ ላፑ አያናቱዋ።

6ካዉተ ኦይድያ ስንን ብርልያ ማላትያ ቡርጩኩዋ አባይ ደኤ። ሄ ካዉተ ኦይድያፐ ስንናነ ጉየና አ ማታን ዩይ አደ፥ አይፊ ኩሜዳ ኦይዱ ደኡዋን ደእያ መታቱ ደኢኖ።

7ኮይሮ ደኡዋን ደእያ መታይ ጋሙዋ ማላቴ፤ ላኤን ሚዛ ማራ ማላቴ፤ ሄዘንዋ ሶምእ አሳ ዴሙዋ ማላቴ፤ ቃይ ኦይደን ፓልያ አርጋን ማላቴ።

8ኦይዱ ደኡዋን ደእያ መታቶ ሁጲያን ሁጲያን ኡሱፑን ቀፊ ደኤ፤ ኡንቱንቶ ቦላን ጋርሳንካ ኡባ ሳን አይፊ ኩሜዳ። ኡንቱንቱ ቃማነ ጋላስ፥ “ጌሻዉ፥ ጌሻዉ፥ ጌሻዉ፥ ካሰ ደእያዎ፥ ሀእካ ደእያዎ፥ ቃይ ስንፐ ያናዎ፥ ጎዳዉ፥ ኡባፐ ዎልቃማ ጾሳዉ” ግያዋ አግክኖ።

9ሄ መታቱ ካዉተ ኦይድያን ኡቴዳ መ መናዉ ደኡዋን ደእያዋ ማዝሙርያን ሳቤዳ ዎደ፥ ቦንቼዳ ዎደነ ጋላቴዳ ዎደ፥

10ላታማነ ኦይዱ ጭማቱ ካዉተ ኦይድያን ኡቴዳ መ መናዉ ደእያዋ ስንን ጉፋኒደ፥ አዉ ጎይኒኖ፤ ባረንቱ ካላቻ ካዉተ ኦይድያ ስንን ዎደ ሀዋዳን ያጊኖ።

11“ኑ ጎዳዉ ጾሳዉ፥ ኔን ቦንቹዋ፥ ሳባነ ዎልቃ አካናዉ በሳሳ። አያዉ ጎፐ፥ ኡባባ ኔን መዳ፤ ቃይ ኡባባይካ፥ ኔን ኮዬዳዋዳን ሀኔዳነ ደኤዳ” ያጊኖ።

← Chapter 3 Jump to: Chapter 5 →