Romans 4

Amharic Dawro DFBE (ጌሻ ማጻፋ) No Year

← Chapter 3 Jump to: Chapter 5 →

1ያትና፥ ኑን ኑዉ አሹዋን ዛረ ግድያ አብራሃሞ አያ ደሜዳ ጋኔ?

2አያዉ ጎፐ፥ አብራሃሞ ኦሱዋን ጽሌዳዋ ግዶፐ፥ አዉ ጬቀትያባይ ደኤ፤ ሽን ጾሳ ስንን ጬቀታና ዳንዳየና።

3አያዉ ጎፐ፥ ጾሳ ማጻፋይ ዋጊ? “አብራሃሞ ጾሳ አማኔዳ፤ ጾሳይ ሄዋ አዉ ጽሎተን ፓይዴዳ” ያጌ።

4ኦያ ኡራይ አክያ ሚሻ ባረዉ በስና አኬፐ አትን፥ አዉ ጮ እመትያዋዳን ፓይደተና።

5ሽን ኦሱዋ ኦናን፥ ናጋራንቻ ጽልስያ ጾሳ አማንያ ኡራ፥ ጾሳይ አ አማኑዋን አ ጽልሴ።

6ሀዋዳንካ፥ አይ ኦሱነ ባይናን፥ ጾሳይ ጽሉዋዳን ፓይዴዳ አሳ ናሸችያባ ዳዊተ ሃሳዬዳ ዎደ ጌዳዌ ሀዋ።

7“ጾሳይ ኡንቱንቱ ባይዙዋ አቶ ጌዳዋንቱነ ኡንቱንቱ ናጋራ ካሜዳዋንቱ አንጀቴዳዋንታ።

8ጎዳይ አ ናጋራ ፓይደና አሳይ አንጀቴዳዋ” ያጌ።

9ያትና፥ ሀ ዳዊተ ሃሳዬዳ አንጁ ቃጻረቴዳ አሳ ጻላላሴየ? ዎይ ቃይ ቃጻረትቤና አሳቱዋሴ? አያዉ ጎፐ ኑን፥ “ጾሳ ማጻፋይ፥ ‘አብራሃሞ ጾሳ አማኔዳ፤ ጾሳይ ሄዋ አዉ ጽሎተን ፓይዴዳ’ ያጌ” ጎይተ።

10ያትና፥ ሀዌ አዉደ ሀኔዴ? አብራሃሞ ቃጻረት ስምነየ? ዎይ ቃጻረታናፐ ካሰኔ? ቃጻረታናፐ ካሰናፐ አትን፥ ቃጻረትና ግደና።

11ጉየፐ እ ቃጻረቴዳ፤ ጾሳይ አ አማኑዋ ድራዉ፥ እ ቃጻረታናፐ ካሰ አ ጽሎ ኦዳዋ ኤርሳናዉ፥ አ ቃጻራይ ማላ ግዴዳ። ሄዌካ ቃይ ቃጻረተናን ጾሳ አማንያ ኡባቱዋ ጾሳይ ጽሎ ኦደ ፓይዳናዳን፥ ኡንቱንቶ አብራሃሞ አዉዋ ግዳናሳ።

12እ ቃጻረቴዳዋንቶካ አዉዋ፤ ግዶፐካ፥ ኡንቱንቱ ቃጻረቴዳ ድራሳ ግደና፤ ሽን ኑ አዉዋ አብራሃሞ ቃጻረታናፐ ካሰ አማንያ አማኑዋ ማላ ካልያዋንቶካ አዉዋ።

13አብራሃሞስነ አ ዘረዉ ጾሳይ፥ “ሀ ሳኣ ታን ህንተንቶ እማና” ያጌዳዌ፥ አብራሃሞ ጾሳ አማኒደ ጽሌዳ ድራሳፐ አትን፥ ህገዉ እ አዛዘቴዳ ድራሳ ግደና።

14አያዉ ጎፐ፥ ህገዉ አዛዘትያዋንቱ ጾሳይ እማና ጌዳዋ ላትያዋንታ ግዶፐ፥ አሳ አማኑ ማደናባ ግዴዳ፤ ጾሳይ ጌዳዌካ መላ ግዴዳ፤

15ህጊ ጾሳ ቦሻ አሄ፤ ሽን ህጊ ባይናሳን ህግያ መንያባይ ባዋ።

16ሄዋ ድራዉ፥ ህግያ ናግያዋንቱ ጻላላዉ ግደናን፥ ቃይ አብራሃሞ አማኔዳዋዳን፥ አማንያ አብራሃመ ዘረ ኡባዉ ጾሳይ እማና ጌዳዌ፥ ዎይታዳን ቱማታናዌ አማኑዋና። አብራሃሞ ኑዉ ኡባዉ አዉዋ። ጾሳ ማጻፋይ፥ “ታን ኔና ጮራ ካዉተቶ አዎ ኦድ” ግያዋዳን፥ ሀይቄዳዋንቶ ደኡዋ እምያ፥ ባረ አዛዙዋን ባይናባ ደእያባዳን ኦደ ጼስያ፥ እ አማኔዳ ጾሳ ስንን አብራሃሞ ኑዉ ኡባዉ አዉዋ።

18ጾሳ ማጻፋይ አብራሃሞ፥ “ነ ዘረይ ሀዋ ኬና ግዳና” ያጌዳዋዳን፥ ሀዋ ኬና ግዳና ጊደ፥ ናሸቻን ናጋናዉ ዳንዳየና ዎደ፥ አብራሃሞ አማኒደነ ስንፐ ደማና ጊደ፥ ናሸቻን ናጊደ፥ ጮራ ዘረዉ አዉዋ ግዴዳ።

19ሄ ዎደ፥ አብራሃሞ የለቶደፐ ጼቱ ላይ ኩማና ሀንያ ጭማ፤ ሽን ባረ ዳቡራንቻ አሳተነ ሳራ ናኣ የላናዉ ዳንዳየናዋ ቆፔዳ ዎደ፥ እ ባረ አማኑዋን ዳቡርቤና።

20ጾሳ እ ቦንቺደ፥ አዉ እማና ጌዳ ጾሳይ ቃይ ፖላናዉ ዳንዳይያዋ ሎይ ኤሪደ ባረ አማኑዋን ምኔዳዋፐ አትን፥ አማነናን እጺደ፥ ጾሳይ እማና ጌዳዋ ስቤና።

22ሄዋ ድራዉ፥ ጾሳይ ቃይ አ አማኑዋ ጽሎተን ፓይዴዳ።

23“አዉ ጽሎተን ፓይዴዳ” ግያ ቃላይ አ ጻላላዉ ጻፈትቤና።

24ሄ ቃላይ ኑ ጎዳ የሱሳ ሀይቁዋፐ ደንዳ ጾሳ አማንያ ኑዉካ ጽሎተን ፓይደታና ማላ ጻፈቴዳ።

25ጾሳይ አ ኑ ናጋራ ድራዉ፥ ሀይቆ አደ እምና፥ እ ኑና ጽልሳናዉ ሀይቁዋፐ ደንዴዳ።

← Chapter 3 Jump to: Chapter 5 →