Ruth 3

Amharic Dawro DFBE (ጌሻ ማጻፋ) No Year

← Chapter 2 Jump to: Chapter 4 →

1እት ጋላስ ኑሃማ ባረ ናኣ ማቻቶ፥ “ታ ናተ፥ ኔን ጊግና ደአናዉ፥ ታን ነዉ አስና ኮይንቶ ኢታኔ?

2ኔን ኡንቱንቱና ጋምኤዳ ማጫ ቆማቱ አዉ ኪተትያ ቦኤዝ ኑዉ ማታ ዳቦ ግደኔ? ስሳ፥ እ ሀቼ ቃማ ኡዱማን ባንጋ ቡካናዋ።

3ኔን ሜጨታ፤ ሽቱዋ ኦከታ። ያታደ ነ ሎኦ ማዩዋ ማያደ፥ ዱገ ኡዱማ ባ፤ ሽን ባደ ቦኤዝ ሚድነ ኡሽደ ስማና ጋካናዉ፥ አ አይፍያን ቤቶፓ።

4እ ግስያ ዎደ፥ ሀቃን እ ግስንቶነ በኣደ፥ እ ገምእሾንን አ አፍላ ቃራደ፥ አ ገድሳና ግሳ ባሻ። ኔን ሀናናባ እ ነዉ ኦዳናዋ” ያጋዱ።

5ኡሩታ፥ “ኔን ጌዳዋ ኡባ ታ ሀናና” ያጋዱ።

6ሄዎ ኡሩታ ዱገ ኡዱማ ባደ፥ እዝ ቦሎታታ እዝዉ ኦዴዳባ ኡባ ሀናዱ።

7ቦኤዝ ሚደ ኡሽደ ባረ ቦላ ፓሽክሴዳዋፐ ጉየ፥ ካ ኡልያ ማታን አደ ግሴዳ። ኡሩታ ሎዳን ሺቃደ፥ አ ገድያ ቃራደ፥ ገድሳና ግሳ አጋዱ።

8ሄካ ብላሄ ግድያ ዎደ፥ ብታንያ እትባይ ዳጋንና ቤጎቲደ፥ አ ዎደ፥ እት ማጫውና አ ገድሳና ግሴዳኖ ደሜዳ።

9“ሀኔ፥ ኔን ኦኔ?” ያጊደ ኦቼዳ። እዛ፥ “ታን ነ ቆማቶ ኡሩቶ፤ ኔን ታ አስናዉ ማታ ዳቦ ግድያ ድራዉ፥ ታና አካ” ያጋዱ።

10ቦኤዝ ዛሪደ፥ “ታ ናተ፥ መና ጎዳይ ኔና አንጆ! ሀዌ ነ ኦሻይ ኔን ካሰ ነ ቦሎታትዉ ኦዳ ኬካተፐካ አ፤ ኔን ማንቆ ዎይ ዱረ ግዴዳ ያላጋ አቱማ አሳ ኮያባካ።

11ሀእ ስም ታ ናተ፥ ያዮፓ። ኔን ኦቼዳ ኡባ ነዉ ታን ኦና። አያዉ ጎፐ፥ ታ ካታማን ደእያ አሳይ ኡባይ ኔን ሎኦባ ሀንያ ማጫ አሳ ግድያዋ ኤሬዳ።

12ታን ማታ ዳቦ ግድያዌ ቱማ፤ ሽን ታፐ ማታ ዳርያዌ ደኤ።

13ሀቼ ቃማ ሀዋን አቃ። ዎንትና እ ኔና አይሳናዉ ኮዮፐ፥ ሎአ፤ አኮ። ሽን እ አይሳናዉ ኮየናን እጾፐ፥ መና ጎዳይ ኤሮ፥ ታን ኔና አካና። ሳአይ ዎንታናዉ ሀዋን ግሳሻ” ያጌዳ።

14እዛ ቦኤዛ ገድሳና ሳአይ ዎንታናዉ ግሳዱ፤ ቦኤዝ፥ “ማጫውና ካ ኡዱማ ዬዳዋ ኦንነ ኤሮፖ” ጌዳ ድራዉ፥ ኡሩታ አሳይ አሳ በኤና ዎድያን ደንዳዱ።

15ቦኤዝ ኦ፥ “ነ ማዬዳ ቃምሽያ ሃ አሀዴ፥ ፕድ ኦ ኦይቃ” ያጌዳ። አ ኦይቂና ላታሙ ኪሎ ግራመ ባንጋ ማክ ቆሊደ፥ ኦ ባእሴዳ። አ ባአደ ጉየ ካታማ ባዱ።

16ኡሩታ ባረ ቦሎታትኮ ዪና፥ ኑሃማ ኦ፥ “ታ ናተ፥ ነባይ ዋኔዴ?” ያጋደ ኦቻዱ። ብታኒ እዚው ኦዳባ ኡባ ኦዳዱ፤

17“ ‘ነ ቦሎታትኮ መላ ኩሸ ቦፓ’ ጊደ ሀዋ ላታሙ ኪሎ ግራመ ባንጋ እሜዳ” ያጋዱ።

18ያትና፥ ኑሃማ፥ “ታ ናተ፥ አይዴ ሀናናዌንቶ በአና ጋካናዉ ናጋ። ብታኒ ሀቼ ሀ የዉዋ ዉርሰናን ሸምፐና” ያጋዱ።

← Chapter 2 Jump to: Chapter 4 →