Song of Solomon 2

Amharic Dawro DFBLVL (Geeshsha Mas'aafaa)

← Chapter 1 Jump to: Chapter 3 →

1Taani, «Saaroona giyaa sa'aan doliyaa c'iishshaanne, wombban doliyaa lo"o c'iishshaa mala» yaagaaddu.

2Ee ta siik'k'atta mac'c'a asaa giddon s'eelliyaa wode, aguntsaa giddon beettiyaa lo"o c'iishshaa malataw yaageedda.

3Ta siik'uu hara wodallatuwaa giddon s'eelliyaa wode, woran de'iyaa appiliyaa giyaa mitsaa malatee; taana loytsi nashechchina, Aa kuwaa giddon uttaad; Aa ayifii miina, taana loytsi mal"ee.

4I taana k'umaa miyaa aakko wuyggiyaa gelisseedda; bare siik'uwaa banddiraadan ta bolla d'ok'k'u d'ok'k'u ootseedda.

5Taani Aa siik'uwaan okettaade harggeedda diraw, zabiibiyaa ayifiyaa taana miziide ministe; appiliyaa taana miziide, ta wolk'k'aa kuntsite.

6Bare haddirssa kushiyaa taana borkkotisseedda; bare ushechcha kushiyan taana k'oommeedda.

7Hinttenoo Yerusaalame yalaga mac'c'a asaw, siik'uu barew dosiide denddana gakkanaw, Aa hintte beegotsena mala, taani hinttena gen"etuwaaninne bazzuwaa dogetuwaan c'allay.

8Sisite, hewe ta siik'uwaa kooshshaa! Be'ite deriyaana piriidde, zoozetuwaa bollaanna s'onggettiidde gakkeedda!

9Ta siik'uu wushaa mala; woy gen"iyaa maraa malatee. Be'ite, I nu golliyaa dirssaa matan ek'k'eedda; maskkootiyaanna golle s'eellee; gaaridduwaa garssaanakka luus's'ay s'eellee.

10Ta siik'uu taana hawaadan yaagee; Ta siik'k'atee, dendda! Ta malanchchatee, haaya! Ittippe ane boytte.

11Be'a, balgguu aad'd'eeda; iraykka ek'k'eedda.

12Biittan c'iishshay c'iisheedda; yetsaa yes's'iyaa aginayikka gakkeedda; harap'p'iyaa yetsay nu biittan sisettee.

13Balasii ayifiyaa doommeedda; woynnii c'iisheedda; Aa c'iishshaa sawuu biittan toshukku gee. Hewaa diraw, ta siik'k'atee, dendda; ta malanchchatee, haaya; ane ittippe boytte yaagee yaagaaddu.

14Neeni aafuwaa doonaa zaallaa za'an k'osetteedda harap'p'atti mala; ane itti gede taana ne som"uwaa bessa; ne kooshshaakka sisa. Ayaw gooppe, ne kooshshay taana k'aretsee; ne som"uukka daro lo"ee yaageedda.

15Nu woynnii c'iisheedda; hewaa diraw, nu woyniyaa gidduwaa bayzziyaa worakanatuwaa, he k'eeri worakanatuwaa p'iriyaa wotsiide oyk'k'ite yaageeddino.

16Ta siik'uu tawaa; taanikka aano; c'iishshaa giddon I bare wudiyaa heemmee.

17K'amma d'umay k'aarettanaw, wontta c'arkkuu c'arkkanaw, ta siik'ow, gen"iyaadan woy yalaga doggiyaadan, aafotiya deriyaana wos's'aade haa simma yaagaaddu.

← Chapter 1 Jump to: Chapter 3 →