Mark 14 — Amharic Dawro DWRNT (Ooratha Caaquwaa)

1Paasigaa Baalaa giyaawaa bonchchiya gallassaynne Caalibeenna ukithaa muussaa bonchchiya baalaa gallassay gakkanaw laa77u gallassay atteedda; qeesatuwaa kaappatuunne higgiyaa tamaarssiyaawanttu asay erennaan Yesuusa oyqqiide wodhana ogiyaa koyyiino.

2"Asay walassaa kessenna mala, Paasigaa bonchchiya gallassi hewaa oothokko" yaageeddino.

3Yesuusi Biitaaniyaa gadiyan oolluwaa harggiyaa Simoona soyin qumaa maanaw utteedda wode, itti mishiratta bilqqaasiyaa kumeedda narddoosa giyaa darii al77o shittuwaa akkaade yaaddu; he bilqqaasiyaa menthaade shittuwaa Yesuusa huuphiyan tigaaddu.

4Hewaan de7iyaa asaappe ittu ittu hanqqettiide, "Ha shittuwaa coo ayaw bayizzay? Ha shittuwaa heezzu xeetu biraa santtimiyaan zali77iide, miishshaa hiyyeesaw immanaw danddayettee" yaagiide barenttu giddon haasayiino; yaatiide he mishiratto darissi hanqqetteeddino.

6Shin Yesuusi hawaadan yaageedda; "Ha mishiratto aynne gooppite; izo ayissi metoothiitee? Iza taw lo77obaa oothaaddu.

7Hiyyeesatuu ubba wode hinttenttunna de7iino; hintte koyyeedda wode awudenne unttuntta maaddanaw danddayiita; shin taani ubba wode hinttenttunna de7ikke.

8Iza barew danddayetteeddawaa oothaaddu; qassi ta asatethay moogettanaappe kasetaade moogoo giigissanaw shittuwaa okkaaddu.

9Taani hinttenttoo tumuwaa oday; sa7aa ubbaan wonggalaa mishiraachchuwaa odiyaasan haqaninneekka, asay izo qoppana mala, ha iza ootheeddawe odettana" yaageedda.

10Tammanne laa77u Yesuusa kaalliyaawanttuppe ittuu Yihudaa Asqqorootu giyaawe, Yesuusa qeesatuwaa kaappatuwaassi aathiide immanaw unttunttukko beedda.

11Unttunttu hewaa siseedda wode nashettiide, "Nuuni new miishshaa immana" yaageeddino; Yihudaa Asqqorootu Yesuusa aathiide immanaw injjetiyaa wodiyaa wochchee.

12Caalibeenna ukithaa miyaa baalaa gallassaa bonchchiya koyro gallassi, Paasigaa qumaa maanaw dorssaa shukkiyaa wode, Yesuusa kaalliyaawanttu A, "Paasigaa bonchchiya gallassi neeni maana qumaa nuuni haqa biide giigissanee?" yaagiide oochcheeddino.

13Yesuusi barena kaalliyaawanttuppe laa77atuwaa hawaadan yaagiide kiitteedda; "Katamaa biite; hintte biishshin, otuwan haathaa tookkeedda itti bitani hinttenttunna gakettanawaa; A kaallite.

14I biide geliyaa golliyaawuwaa, 'Tamaarissiyaawe neena, "Taani taana kaalliyaawanttunna Paasigaa qumaa maanaw ta imathaa kifili haqanee?" yaagee' yaagite.

15Golliyaawuu hinttentta pooqiyaa bollan de7iyaa giigi utteedda aako kifiliyaa bessana; hewaan nuussi giigissite" yaageedda.

16He laa77u Yesuusa kaalliyaawanttu kesiide, katamaa beeddino; Yesuusi barenttoo odeeddawaadankka ubbabaa demmiide, Paasigaa qumaa giigsseeddino.

17Sa7ay omarssiyaa wode Yesuusi tammanne laa77u barena kaalliyaawanttunna yaa beedda.

18Unttunttu uttiide samppaappe qumaa miishshin, Yesuusi unttuntta, "Taani hinttenttoo tumuwaa oday; hinttenttuppe ittu taananna miyaawe, taana aathiide immanawaa" yaageedda.

19A kaalliyaawanttu loythi sisettina, huuphiyan huuphiyan A, "Tumu taaneeshsha?" giyaawaa doommeeddino.

20Yesuusi zaariide, "I ha hinttenttu tammanne laa77atuwaappe ittuwaa; I taananna ittippe tushanaw bare daabbuwaa shaataan yeddiyaawaa.

21Taani, Asaa Na7ay, Xoossaa maxaafay hayqqana geeddawaadan hayqqana; shin taana, Asaa Na7aa, aathiide immiyaa uraw aayyeero; he uray yelettennaan atteeddentto, aw lo77a shin" yaageedda.

22Unttunttu miishshin, Yesuusi daabbuwaa akkiide, Xoossaa galateedda; he daabbuwaa menthiide, barena kaalliyaawanttoo immiidde, "Heyte; hawe ta ashuwaa" yaageedda.

23Xuu7aa akkiide, Xoossaa galatiide, unttunttoo immeedda; ubbay he xuu7aappe usheeddino.

24Yesuusi, "Hawe ooratha caaquwaan cora asaa diraw gukkiyaa ta suuthaa.

25Taani hinttenttoo tumuwaa oday; taani Xoossaa kawutethaan ooratha woyiniyaa eessaa ushana gallassay gakkanaw, laa7enthuwaa ha woyiniyaa eessaa ubbakka ushikke" yaageedda.

26Mazimuriyaa yexxeeddawaappe guyyiyan, Debre Zayte Deriyaa beeddino.

27Yesuusi barena kaalliyaawanttoo, "Hinttenttu ubbay taana yeggiide woxxanita; ayissi gooppe, Xoossaa Maxaafay, 'Xoossay dorssaa heemmiyaawaa wodhana; hewaappe guyyiyan dorssay ubbay laalettana gee' yaageedda.

28Shin taani hayquwaappe denddeeddawaappe guyyiyan, hinttenttuppe kasetaade Galiilaa baana" yaageedda.

29Phexiroosi zaariide, "Unttunttu ubbatuu neena yeggiide booppekka, taani neena mulekka yeggikke" yaageedda.

30Yesuusi Phexiroosa, "Taani new tumuwaa oday; hachche qamma kuttuu laa7ethuwaa waassanaappe kase, neen taana heezzu gede kaddanaassa" yaageedda.

31Shin Phexiroosi kasewaappekka minissiide, "Taani haray atto, neenanna ittippe hayqqinttokka, neena mulekka kaddikke" yaageedda. Qassi haratuu ubbatuukka hewaadan geeddino.

32Geetesemaane giyaa sa7aa beeddino; Yesuusi barena kaalliyaawantta "Taani Xoossaa woossanaassi, hinttenttu hawaan uttiishshite" yaageedda.

33Yesuusi Phexiroosa, Yayiqoobanne Yohaannisa barenanna afeedda; darii kayyotteeddanne metooteedda.

34Qassi unttuntta, "Taani hayqqana gakkanawukka kayyottay; hawaan takkishshite; gemi77ishoppite" yaageedda.

35Guuthaa sinthakko shiiqiide, sa7aan guufanniide, danddayettiyaawaa gidooppe, he wodii bareppe aadhdhana mala, Xoossaa woosseedda.

36Qassikka, "Abbabbo, ta Aabboo, ubbabay new danddayettee; ha xuu7aa taappe digga; shin ne sheniyaadan hanoppe attin, ta sheniyaadan hanoppo" yaageedda.

37Yesuusi barena kaalliyaawanttukko simmi yiide, gemi77isheeddawantta demmiide Phexiroosa, "Simoonaa, gemi77ishaaddii? Neen itti saatenttonne naaganaw danddayabeykkii?

38Paaciyaan hintte gelenna mala, naagettitenne Xoossaa woossite; ayyaanay giigi utteedda; shin ashuu daaburanchcha" yaageedda.

39Qassikka biide kasewaadankka Xoossaa woosseedda.

40A kaalliyaawanttukko guyye simmiide I yiyaa wode, gemi77isheeddawantta demmeedda; unttunttu ayfiyaa gemi77ishuu goozzi wotheedda diraw, aw ayaa haasayiinonttokka eribeykkino.

41Heezzenthuwaa unttunttukko yiide, "Ha77i gakkanawukka gemi77ishiiteenne shemppiitee? Gidana; wodii gakkeedda; be7ite, taana, Asaa Na7aa, nagaranchcha asatuwaa kushiyaan aathiide immiyaa wodii gakkeedda.

42Denddina boytte; be7ite, taana aathiide immiyaawe haweku gakkeedda" yaageedda.

43Yesuusi hewaa biro haasayishshin, tammanne laa77u A kaalliyaawanttuppe ittuu, Yihudaa Asqqorootu, ellekka gakki wodhdheedda; qassi qeesatuwaa kaappatuu higgiyaa tamaarissiyaawanttunne cimatuu kiittina, mashshaanne xam77aa oyqqeedda cora asay aananna ittippe yeedda.

44Yesuusa aathi immiyaawe he cora asaw, "Taani yeriyaawe A; A oyqqiide loythi naagiide, afite" yaagiide mallaa odi wotheedda.

45Yihudaa Asqqorootu gakkosaannakka Yesuusakko shiiqiide, "Tamaarissiyaawoo" yaagiide Yesuusa yeri akkeedda.

46He cora asay Yesuusa minissi oyqqeedda.

47Shin matan eqqeeddawanttuppe ittuu bare cubiyaa shoddinne qeesatuwaa ubbatuwaa kaappuwaa qoomaa shociide, A haythaa qanxxi oleedda.

48Yesuusi zaariide, he shiiqeedda cora asaa, "Taana bonqqanchcha kessiide, bonqqanchchaa oyqqiyaawaadan oyqqanaw cubiyaanne xam77aa oyqqiide yeedditee?

49Taani Geeshsha Golliyan tamaarissaadde, gallassan gallassan hinttenttunna de7iyaa wode taana oyqqibeykkita; shin Xoossaa Maxaafatuu geeddawe polettanaw bessee" yaageedda.

50Yesuusa kaalliyaawanttu ubbatuu A yeggiide bii aggeeddino.

51Naxalaa xalalaa mayyeedda itti yalaga bitani Yesuusa kaalliyaawaa asay oyqqeedda.

52Shin he bitani naxalaa oliide, kallo xiira woxxeedda.

53Asay Yesuusa qeesatuwaa ubbatuwaa kaappuwaa soy, qeesatuwaa kaappatuwaa ubbatuu, cimatuunne higgiyaa tamaarssiyaawanttu shiiqeeddasaa afeeddino.

54Phexiroosi qeesatuwaa ubbatuwaa kaappuwaa dirssaa gidduwaa gakkanaassi haakuwaan A kaalleedda; yaani naagiyaawaanna tamaa kashiidde, utti aggeedda.

55Qeesatuwaa kaappatuunne hewaan shiiqeedda asay ubbay Yesuusa wodhanaw A bolla markkaa koyyeeddino; shin aynne demmibeykkino.

56Ayissi gooppe, cora asatuu A bollan wordduwaa markkatteeddino; shin unttunttu markkatethay itti mala gidenna.

57Itti itti asatuu denddi eqqiide Yesuusa bolla, "I, 'Taani asay keexxeedda ha Geeshsha Golliyaa kolaade, asay keexxibeenna hara Geeshsha Golliyaa heezzu gallassaa giddon keexxana' giishshin, nuuni siseeddo" yaagiide wordduwaa markkatteeddino.

59Shin haray atto unttunttu markkatethay hewaan itti mala gidibeenna.

60Qeesatuwaa ubbatuwaa kaappuu asaa ubbaa sinthan denddi eqqiide Yesuusa, "Hawanttu neena mootiyaa mootoo new zaariyaabay baawee?" yaagiide oochcheedda.

61Shin Yesuusi co77u giide, aynne zaaribeenna; qeesatuwaa ubbatuwaa kaappuu A, "Anjjetteedda Xoossaa Na7ay Kiristtoosi neenee?" yaagiide laa7enthuwaa oochcheedda.

62Yesuusi zaariide, "E, taana; hintte taana, Asaa Na7aa, wolqqaama Xoossaappe ushechcha bagganna uttide7ishshinanne saluwaa shaariyaanna yiishshin be7ana" yaageedda.

63Qeesatuwaa ubbatuwaa kaappuu bare mayuwaa peedhi oliide, "Nuuna hawaappe sinthan ayissi hara markkaa koshshii?

64Hinttenttu A boriyaa siseeddita; hintte qofay ayee?" yaageedda; unttunttu ubbay, "I hayqqana bessee" yaagiide A bolla pirddeeddino.

65Unttunttuppe ittu ittu A bolla cushethaa doommeeddino; A ayfiyaa kammi dechchiide, "Neena dechcheeddawe oone? Ane timbbitiyaa oda!" yaageeddino; qassi naagiyaawanttukka A qinxxalliyaa baqqiidde afeeddino.

66Phexiroosi dirssaa giddon hirkkinna de7ishshin, qeesatuwaa ubbatuwaa kaappuwaa macca ashikkaratuwaappe ittinna yaaddu.

67Phexiroosi tamaa kashiyaawaa be7aade, cadda xeellaade, "Neenikka Naazireetiyaa Yesuusanna ittippe de7aa" yaagaaddu.

68Shin Phexiroosi, "Neeni giyaawe ayentto taani erikke; taw akeekettenna" yaagiide kaddeedda; yaatiide dirssaa penggiyaakko keseedda; kuttuukka waasseedda.

69He ashikkaratta Phexiroosa be7aade, A matan eqqeedda asatuwaa, "Ha bitaniikka unttunttunna de7ee" gaade gujjaade oduwaa doommaaddu.

70Shin Phexiroosi qassikka kaddeedda. Guuthaa gami77ishshin, matan eqqeedda asatuu laa7enthuwaa Phexiroosa, "Neeni tuma unttunttunna ittippe de7aa; ayissi gooppe, neeni Galiilaa gadiyaa asaa" yaageeddino.

71Shin Phexiroosi, "Taani hewaa hintte giyaa bitaniyaa erikke!" yaagiide barena sheqaanne caaquwaa doommeedda.

72Elekka kuttuu laa7ethuwaa waassii aggeedda; Phexiroos barena Yesuusi, "Neeni kuttuu laa7ethuwaa waassanaappe kase heezzu gede taana kaddanaassa" geeddawaa hassayiide, darii yeekkeedda.