Nahum 3

Amharic Gamo (Geeshsha Maxaafa)

← Chapter 2 Jump to:

1Suuththa katamays aayye ana; wordoynne bonqqay izin kumides; izippe qociretti shiiqidayssi efinkka wurenna.

2Xurqafe giirissi, irizo cenggurssi, pilata para adaraasoy, para-gaareta giirissi siyettides.

3Toganchchay toggees; mashshay popol7u gees; tooray xolqettees; daroy hayqqides; ahay aha bolla korettides; izas qoodaykka deenna; aadhdhi bizasoykka beettibeenna.

4Hayssi ubbay haniday buute aaththada as baleththizanne muurenniza laymay gaasonna. Iza ba laymateththan kawoteththa, maroteththan dereza ayllesidaaro.

5Ubbaafe Wolqqama GODAY, «Hanne tani ne bolla morkketeththan dendadis; tani ne qamisa qaara ne ayfeso kammana; ne kalloteththaa deraas, yeellateththaa kawoteththatas ta bessana.

6Tani ne bolla buura olana; ta nena kadhana; qidheska aaththa immana.

7Nena be7izayti neeppe baqatishe, ‹Nannawey laalettadus; izis yeekkanay oonee?› gaana. Nena minththeththanaade ta awappe demmanee?» gides.

8Neni Abbaye shaafa achchan diza, haaththan doodetta diza No7e Amooneppe goobay? Shaafazi izis teqe haaththazikka izis gimbe.

9Tophphiyaynne Gibxey izis zaway baynda wolqqa; Puuxeynne Liibiyay izo maaddizayta;

10Gido attiin iza di7ettadus; goodetta badus; izi nayti ogeta tiixa bolla dinccettida; izi daannata bolla saamay wodhdhides; izi gita asati ubbay sansalatan qashettida.

11Nenikka qasse maththottananne qotettana; morkketappe attizaso ne koyana.

12Ne miixati ubbay muussas gakkida balase miththas koyro ayfe mala; istti qaaxxiza wode istta ayfeti mizaade doonan wodhdheettes.

13Hekko ne ola asay wurikka macca xalla! Ne zawati ne morkketas waggi gi doyettida; istta kolatatakka tamay mides.

14Nena giddoththiza wodes haath duuqqa; nees teqe minththa giigsa; mana urqqa koya; Urqqaa yedhdhada xuube ooththa.

15Nena heen tamay maana; Mashshayka nena qanxxana; gumbaroy miza mala nena garccana; gumbaro mala yeletta; boole mala dara.

16Ne zal7anchchata salo xoolinttepekka darsadasa. Istti gidikko biittayo boole mala pitti miidi piradhdhi bida.

17Nena naagizayti boole mala; ne gita asati meego gallas gimbe garsan uttiza gumbaro mala. Istti arshey kezishin piradhdheettes; istti piradhdhi bizasoy awakko erettenna.

18Asoore kawoo, ne heenththanchchati dhiskida; ne gita asati woppu gi ichchida; ne derey shiishshizay dhayiin zuma bolla laalettides.

19Ne madunth paththana dandayzay deenna; neni hayqos gaththiza meqo meqqadasa; ne gishshas siyida ubbay ne kundeththaan ufayetti kushe baqqana; zaway baynda ne menxe iitateththi bochchonttay oonee?

← Chapter 2 Jump to: