2 John 1

Amharic Gamo (ጋሞ ማጻፋ)

Jump to:

1ታፔ ጪማዛፔ፥ ቱማፔ ታ ዶሲዛ ዶሬቲዳ ጎዳቴይሲኔ ኢዚ ናይታስ፥ ታና ጻላ ጊዶንታ ቱማ ኤሪዛይቲ ዉሪ ዶሲዛሪስ ኪቴቲዳ ኪታ።

2ጋሶይካ ሃይሲ ቱማይ ሃኢካ ኑ ጊዶን ዲዛይሳኔ ሲንፌካ ሜርናስ ዳናይሳ።

3ጾሳ ኣዋፔኔ ኢዛ ና ዬሱስ ኪርስቶሳፔ ኪያቴ፥ ማሮቴኔ ሳሮይ ቱማኒኔ ሲቆን ኑናራ ጊዶ።

4ኔ ናይታፔ ባጋይቲ ኣዋፔ ኑስ ኢሜቲዳ ኣዛዞዛ ማላ ቱማን ሚኒ ዲዛይታ ታ ቤኢዳ ጊሻስ ዳሮ ኡፋዬታዲስ።

5ሃኢካ ጎዳቴዬ! ካሴፔካ ዲዛሮ ኣቲን ታ ኔስ ሃራ ኦራ ኣዛዞ ጻፊኬ፤ ሄሲካ ኑኒ ኑ ጊዶን ሲቄታናይሳ።

6ሄ ሲቆይካ ኑ ኢዛ ኣዛዞዛ ማላ ዳናይሳ፤ ኣዛዞዚካ ኢንቴ ኮይሮ ሲዪዳ ማላ ሲቆን ዳናሳ።

7ዬሱስ ኪርስቶሲ ኣሳ ኣሾ ማይኢዲ ዪቤና ጊዛ ኣማኖንታ ዳሮ ባሌዛይቲ ኣላሜ ቦላ ላሌቲዳ፤ ሄይታ ማላይ ኣይ ኣሲካ ኣስ ባሌዛዴኔ ኪርስቶሳራ ኤቄቲዛዴ።

8ኢንቴ ጊዲኮ ኢንቴ ዳቡራ ዋጋፔ ሜላ ኣቶንታ ማላኔ ኩሜ ዎይቶ ኤካና ማላ ኢንቴ ሁኤስ ናጌቲቴ።

9ኪርስቶሳ ቲሚርቴ ማላ ዶንታ ኣሲኔ ኢዛ ቲሚርቴፌ ባሌቲዲ ካሬ ኬዚዛ ኣሳን ኦናንካ ጾሲ ዴና፤ ኪርስቶሳ ቲሚርቴን ዲዛዴይ ጊዲኮ ኢዛስ ኣዋይኔ ኣዋ ናይ ዴቴስ።

10ኦኒካ ኢንቴኮ ዪሼ ሄሳ ሄ ቲሚርቴዛ ኤኪ ዮንታ ኣስ ሞኪ ኤኮፍቴኔ ሳሮካ ጎፒቴ።

11ሞኪ ኤኪዲ ባሶ ጌልዛዴይ ሄሳዴ ኦሶን ኢዛራ ኢሲኖ ጊዴስ።

12ታ ኢንቴስ ጻፋናስ ኮይዛ ዳሮ ሚሺ ዴሲሺን ዋራቃታኒኔ ቃላሜን ጻፋና ማላ ኮይኬ፤ ጊዲኮካ ኑ ኡፋይሳይ ኩሜ ጊዳና ማላ ታ ኢንቴኮ ባዳ ኢንቴ ሲንን ኢንቴናራ ሃሳያናስ ሂዶታ ኦይስ።

13ዶሬቲዳ ኔ ሚቼይ ናይቲ ኔና ሳሮ ጌቴስ።

Jump to: