Exodus 24

Amharic Gamo (ጋሞ ማጻፋ)

← Chapter 23 Jump to: Chapter 25 →

1ጎዳይ ሙሴ፥ «ኔኒ፥ ኣሮኔይ፥ ናዳቤይ፥ ኣቢሁይኔ ኢስራኤሌፔ ላፑን ታሙ ዴሬ ሃላቃቲ ጎዳኮ ዙማ ቦላ ፑዴ ኬዚዲ ሃሆን ኤቂዲ ታስ ጎይኒቴ።

2ጊዶ ኣቲን ኔኒ ኔርካ ታኮ ሺቃ፤ ሃራቲ ታ ማታ ሺቆፔቶ። ቃሴ ኣሳይካ ኔናራ ፑዴ ኬዞፖ» ጊዴስ።

3ሙሴይ ዪዲ ጎዳ ቃላኔ ኢዛ ዎጋ ኡባ ኣሳስ ዮቲን ኣሳይ ዉሪ ኢሲ ቃላን፥ «ጎዳይ ዮቲዳይሳ ኡባ ኑኒ ኦና» ጊዴስ።

4ሙሴይ ጎዳይ ዮቲዳይሳ ኡባ ጻፊዴስ። ዎንቴ ጋላስ ማላዶ ዎንታራ ዴንዲዲ ዙማ ጋርሳን ያርሺዛሶ ጊግሲዲ ኢስራኤሌ ኣሳ ታማኔ ናምኡ ቆሞታ ሱንን ታማኔ ናምኡ ሹች ቱሳ ማላ ኤሲዴስ።

5ኢዚ ኢስራኤሌ ኣሳፔ ናቴ ኣቱማ ናይታ ኪቲን፥ ኢስቲ ቢዲ ጎዳስ ሚርጎታ ጹጌቲዛ ያርሾኔ ኢሲፌቴ ያርሾ ሂስቲ ያርሺዳ።

6ሙሴይ ሱፌ ባጋ ኤኪዲ ኬሬታን ቆሊዴስ፤ ኣቲዳ ሱ ያርሾ ያርሺዛ ሶሆዛን ጫጫፊዴስ።

7ሄሳፌ ጉዬ ጫቆ ቃላ ማጻፋ ኤኪዲ ኣሳስ ቁ ሂስቲዲ ናባቢን ኣሳይ፥ «ጎዳይ ዮቲዳይሳ ኡባ ኑኒ ኦናኔ ኣዛዜታና» ጊዴስ።

8ሙሴይካ ኬሬታን ኣቲዳ ሱ ኤኪዲ ኣሳ ቦላ ዉጺዲ ኣሳ፥ «ቤኢቴ፥ ሃይሲ ጎዳይ ሃይታ ቃላታ ኢንቴስ ኢሚሼ ኢንቴናራ ዎዳ ጫቆ ሱ» ጊዴስ።

9ሄሳፌ ጉዬ ሙሴይ፥ ኣሮኔይ፥ ናዳቤይ፥ ኣቢሁይኔ ኢስራኤሌ ሃላቃታፔ ላፑን ታማቲ ፑዴ ኬዚዲ፥

10ኢስራኤሌ ጾሳ ቤኢዳ፤ ኢስቲ ቤኦይሲካ ኢዛ ቶሆፔ ጋርሳራ ሳሎ ማላ ጌዪ ኡቲዳ ሲምፔሬ ጌቴቲዛ ሹቻፌ ኦሴቲዳ ሚሽ ሚሳቲዛ ዉይጌ ዲዛይሳኮ።

11ጊዶ ኣቲን ጾሲ ኢስራኤሌ ኣሳ ሃላቃታ ዎቤና፤ ኢስቲ ጾሳ ቤኢዳ፤ ኢዛ ሲንን ሚዳኔ ኡዪዳ።

12ጎዳይ ሙሴስ፥ «ኔኒ ታኮ ዙማ ቦላ ፑዴ ሃያ፤ ሃ ታኮ ኬዛዳ ሃን ጋምኣ፤ ሂስቲኮ ኔኒ ዎጋ ታማርሳና ማላ ታኒ ዎጋኔ ኣዛዞ ኢዛ ቦላ ጻፊዳ ሎቻ ሹቻታ ኔስ ኢማና» ጊዴስ።

13ሄሳፌ ጉዬ ሙሴይ ባ ኣይሌ ኢያሶራ ባና ኬዚን ሙሴይ ፑዴ ጾሳ ዙማ ቦላ ኬዚዴስ።

14ኢስራኤሌ ኣሳ ሃላቃታ ኢዚ፥ «ኑኒ ኢንቴኮ ሲማናሼ ጋካናስ ሃይሳን ዲሺቴ፤ ኣሮኔይኔ ሁሬይ ሃን ኢንቴናራ ዴቴስ፤ ዮኦይ ዲዛ ኣሲ ኦኒካ ኢስታኮ ቦ» ጊዴስ።

15ሙሴይ ዙማ ቦላ ፑዴ ኬዚን ጾሳ ሻራይ ዙማ ካሚዴስ።

16ጎዳ ቦንቾይካ ሲና ዙማ ቦላ ዎ ጋምኢዴስ፤ ኡሱፑን ጋላስ ጋካናስ ሻራዚ ዙማ ጎዚ ኦይኪዴስ፤ ላፑን ጋላሳን ሻራ ጊዶራ ጎዳይ ሙሴ ጼይጊዴስ።

17ኢስራኤሌ ናይታስ ጎዳ ቦንቾይ ዙማ ጼራን ኤጺዛ ታማ ሚሳቲዲ ቤቲዴስ።

18ሄሳፌ ጉዬ ሙሴይ ሄ ሻራ ጊዶ ጌሊዲ ፑዴ ዙማ ቦላ ኬዚዲ ሄን ኦይዱ ታሙ ጋላሲኔ ኦይዱ ታሙ ቃማ ጋምኢዴስ።

← Chapter 23 Jump to: Chapter 25 →