1 John 1

Amharic Gofa GFBEVF (ጌሻ ማፃፋ)

Jump to: Chapter 2 →

1ኑኒ ኮይሮፐ ዶምድ ደእያ፥ ኑ ሀይን ስእዳ፥ ኑ ፄልዳ፥ አይፈን በእዳ፥ ኑ ኩሸን ቦችዳ ደኦ ቃላባ ህንተዉ ፃፎስ።

2ሄ ደኦይ ቆንጭን፥ ኑኒ እያ በእድ፥ እያባ ማርካቶስ። አዋ ማታን ደእያ ኑስ ቆንጭዳ፥ መርና ደኡዋባ ህንተዉ አዋጆስ።

3ኑራ ህንተዉ እስፈተ ዳና መላ ኑኒ በእዳይሳነ ስእዳይሳ ህንተዉ ኦዶስ። ህንተዉ ኑራ እስፈተ ደእያ ግሾ፥ አዋራነ እያ ናኣ የሱስ ክርስቶሳራ እስፈተ ደኤስ።

4ኑ ኡፋይሳይ ፖሎ ግዳና መላ ሄሳ ህንተዉ ፃፎስ።

5ኑኒ ደኦ ግድዳ እያፐ ስእድ፥ ህንተዉ ኦድያ ኪታይ ሀይሳ፦ “ፆሳይ ፖኦ፤ እያን ም ባዋ” ያገይሳ።

6ኑስ እያራ እስፈተ ደኤስ ያግሸ ማን ደእኮ፥ ኑ ኦዳንነ ኑ ኦሱዋን ዎርዶቶስ።

7ሽን ፖኦን እ ደኤይሳዳ፥ ኑካ ፖኦን ደእኮ፥ ኑስ ዎል ግዶን እስፈተ ደኤስ። እያ ናኣ፥ የሱሳ ሱይ ናጋራ ኡባፈ ኑና ጌሼስ።

8ኑኒ፥ ኑናን ናጋር ባዋ ጊኮ ኑ ኑና ጭሞስ፤ ኑናን ቱም ባዋ።

9ሽን ፆሳስ ኑ ናጋራ ፓፅኮ፥ እ ኑ ናጋራ አቶ ጋናዉነ ኑ ቆሆ ኦሶ ኡባፈ ኑና ጌሻናዉ፥ አማነትዳይሳነ ቱማ።

10ኑኒ ናጋራ ኦቦኮ ጊኮ ፆሳ ዎርዳንቾ ከሶስ፤ እያ ቃላይካ ኑናን ዴና።

Jump to: Chapter 2 →