1 Timothy 3

Amharic Gofa GFBEVF (ጌሻ ማፃፋ)

← Chapter 2 Jump to: Chapter 4 →

1ኦንካ፥ “ዎሳ ኬ ካለያ አስ ግዳናዉ ኮይኮ ሎኦባ አሞቴስ” ግያ ኦዳይ ቱማ።

2ዎሳ ኬ ካለያ አስ ቦረቶናይሳ፥ እስ ማቸ ፃላል ደኤይሳ፥ ማራን ደኤይሳ፥ ባና ሃረይሳ፥ በሰይሳዳ ኦይሳ፥ እማ ሞከይሳ፥ ታማርሳናዉ ዳንዳኤይሳ፥

3ማቶናይሳ፥ ኦየቶናይሳ፥ ፓላሞናይሳ፥ ሚሸ ሲቆናይሳ፥

4እያ ናይት እያዉ ኪተተይሳነ ቦንቸይሳ፥ ባ ኬ አይሳናዉ ዳንዳኤይሳ ግዳናዉ በሴስ።

5እስ አስ ባ ኬ አይሳናዉ ዳንዳኦና እፅኮ፥ ፆሳ ዎሳ ኬ ዋት አይሳናዉ ዳንዳኢ?

6ኦቶሮን ሱገትድ፥ ፃላሄይ ፆሳ ፕርዳን ኩንድዳይሳዳ ኩንዶና መላ፥ ኦራ አማንዳ አስ ግዳናዉ በሰና።

7ቦረንነ ፃላሄ ፅሄን ገሎና መላ ሄ ኡራይ አማኖና አሳ ማታን ናሸተይሳ ግዳናዉ በሴስ።

8ሄሳዳ ቃስ ዎሳ ኬ ዳቆነት ቦንቸትዳይሳታ፥ ናምኡ ዶና ኦደቶናይሳታ፥ ዳሮ ዎይነ ኡሹ ኡዮናይሳታ፥ ሚሸ ያረቶናይሳታ፥

9አማኑዋ ፁራ ጌሻ ካሀን ናገይሳታ ግዳናዉ በሴስ።

10ኤንቲ ኮይሮትድ ፓጨታናዉ ኮሼስ፤ ኤንታ ቦላ ቦረይ ባይና እፅኮ፥ ዎሳ ኬ ዳቆነ ግድድ ኦ።

11ሄሳዳካ፥ ኤንታ ማጫሳት ቦንቸትዳይሳታ፥ ዝግሮናይሳታ፥ ማራን ደኤይሳታ፥ ኡባባን አማነተይሳታ ግዳናዉ በሴስ።

12ዎሳ ኬ ዳቆነት እስ ማች ፃላል ደኤይሳ ግዶ። ባ ናይታነ ባ ኬ ሎይ አይሰይሳ ግዳናዉ በሴስ።

13ዎሳ ኬ ዳቆነ ግድድ፥ ሎኦ ኦሶ ኦይሳት፥ ኤንታዉ ግታ ቦንቾ ቃስ ክርስቶስ የሱሳን ባንታዉ ደእያ አማኑዋባ ኦዳናዉ ዳሮ ምኖተ ደማና።

14ታኒ ሀ ኪታ ነዉ ፃፋሸ፥ ኤለሳዳ ኔኮ ባና ጋዳ ኡፋይስ ዎይስ።

15ሽን ታኒ ቦና ጋምእኮ፥ ፆሳ ኬን አሳይ ዋንድ ዳናዉ በሲያኮ ኤራና መላ ሀይሳ ነዉ ፃፋይስ። ደኦ ፆሳ ኬይ ቱማተስ ቱስነ ባሶ።

16ኑ አማኑዋ ፁራይ ስይ ባይና ግታ። ክርስቶስ አሾ ማእድ ቆንጭስ፤ እያ ቱማተ ጌሻ አያናይ ማርካትስ። ኪታንቾታስ በንትስ፤ እ ካዎተ ኡባስ ሳባከትስ። አላመን ደእያ አሳን አማነትስ፤ ቦንቾን ሳሎ ኤከትስ።

← Chapter 2 Jump to: Chapter 4 →