Habakkuk 3

Amharic Gofa GFBEVF (ጌሻ ማፃፋ)

← Chapter 2 Jump to:

1ማዝሙረን ሽቅዳ ናብያ እንባቆመ ዎሳይ ሀይሳ፦

2አቤት ጎዳዉ፥ ኔኒ ካሰ ኦዳባ ታኒ ስአዳ ያያስ። ጎዳዉ፥ ኑ ዎድያንካ ሄ ኦሶታ ዛራዳ ኦ፤ ኤንቲ ኑ ዎድያንካ ኤረቶ። ነ ሀንቀትያ ዎደ ነ ማሮታ ቆፓ።

3ፆሳይ ተማና ቢታፈ ዬስ፤ ጌሻይ ፓራና ደርያፐ ዎስ። እያ ቦንቾይ ሳሉዋ ካምስ፤ እያ ጋላታይ ሳኣ ኩምስ።

4እያ ፖኦይ ጶልያ አዋ መላ፤ እያ ዎልቃይ ቆሰትድ ኡትዳ እያ ኩሽያፐ ፆልቅያ ፖኦይ ከዬስ።

5ጋዶይ እያ ስንን ቤስ፤ ታማ ላጮይ እያ ቶሁዋፐ ከዬስ።

6እ ኤቅን ቢታይ ቃፅስ፤ እ ፄልን ካዎተት ኮኮርዶሶና። መርና ደረት ዎድዶሶና፤ እ ኤንታ ቦላ ሄመትያ በንፐ ደእያ ዙማት ላለትዶሶና።

7ታኒ ቶጰ አሳ ዱንካነይ መቶትሽን በአስ፤ ምድያመ ቢታ አሳይ ኮኮርሽን በአስ።

8አቤት ጎዳዉ፥ ኔኒ አይስ ሀንቀታዲ? ሻፋት ነና ሀንቀዶና? ዎይኮ ነ ሀንቆይ አባ ቦሌ? አካይ፥ ኔኒ ነ ፓራታነ ነ ፓራ ጋረታ ቶግዳይ ነ አሳስ ፆኖ እማናሳ ግደኔ?

9ኔኒ ነ ዶንግያ ዋፃዳሳ፤ ዱካናዉ ጊግሳዳሳ፤ ቢታ ጳልቃዳ ሃ ከሳዳሳ።

10ደረት ነና በእድ ያሻን ኮኮርዶሶና፤ ክፃ ሃይ አስ። ጪሞ ሃት ዋስዶሶና፤ ባንታ ዙልያ ቁ ቁ ኦሶና።

11ነ ዶንግያ ዱካን፥ ነ ቶራ ጶለን፥ አውነ አጌን ባንታ ደእያ በሳን ኤቅዶሶና።

12ኔኒ ሀንቁዋን ቢታ ኡባ ዩያዳሳ፤ ካዎተታ ነ ሀንቁዋን የዳሳ።

13ነ አሳነ ነ ትይዳይሳ አሻናዉ ከያዳሳ፤ ኢታታ ሀላቃ ሾጫዳሳ፤ እያ ማኡዋ ቃራዳ ካሎ አሻዳሳ።

14ኑና ላላናዉ ጎተዳ ይዳ ኑ ሞርክያ፥ መቶታንቾታ ምታናዉ ጌማን ቆሰትዳይሳ፥ እያ ቶራን እያ ጫዳዳሳ።

15ኔኒ ነ ፓራታራ አባ ቦላ ሄመታዳሳ፤ ዳሮ ሃ የዳሳ።

16ታኒ ሄሳ ኡባ ስእን ታ ዎዛናይ ዳጋምስ፤ ታ መተርሻይ ኮኮርስ። ታ መቀይ ዳጋምስ፤ ታ ቶሆይ ጉንድስ። ኑ ሞርከታ ጎዳይ ሴራና ጋካናዉ፥ ታኒ መቱዋ ጋላሳ ዳንዳአን ናጋና።

17ባላሰ ምይ አይፎና እፅኮካ፥ ዎይንያ ቦላ አይፈይ በንቶና እፅኮካ፥ ሻማሆይ አይፎና እፅኮካ፥ ጎሻን ካ ካፅናኮካ፥ ግርበን ዶርስ ይኮካ፥ ዛዳሎን መሄይ ይኮካ፥

18ታኒ ጎዳን ኡፋይታና፤ ታና አሽያ ፆሳን ኡፋይሳን ኩማና።

19ታ ዎልቃይ ኡባ ሃርያ ጎዳ፤ እ ታ ቶሁዋ ጋራ ቶሆዳ ምንስ፤ እ ታና ቃ በሳን ሄመስ።

← Chapter 2 Jump to: