John 3

Amharic Gofa GFBEVF (ጌሻ ማፃፋ)

← Chapter 2 Jump to: Chapter 4 →

1ፋርሳወታ ያራፐ ግድዳ፥ አይሁደታ ሀላቃይ፥ ንቆድሞሳ ጌተትያ እስ አደይ ደኤስ።

2ንቆድሞስ ቃማ የሱሳኮ ይድ፥ “አስታማርያዉ፥ ኔኒ ፆሳይ ኪትዳ አስታማረ ግደይሳ ኑኒ ኤሮስ። አይስ ጊኮ፥ ፆሳይ እያራ ዶና እፅኮ ሀ ኔኒ ኦያ ማላታ ኦናዉ ዳንዳእያ አስ ባዋ” ያግስ።

3የሱሲ ዛሪድ፥ “ታኒ ነዉ ቱማ ኦዳይስ፤ ኦንካ ዛር የለቶና እፅኮ ፆሳ ካዎተ በአናዉ ዳንዳኤና” ያግስ።

4ንቆድሞስ፥ “ጬጋ አስ ዋንድ ዛር የለታናዉ ዳንዳኢ? ባ አየ ኡሎ ስም ገልድ ዛር የለታናዉ ዳንዳኢ?” ያግስ።

5የሱሲ ዛሪድ፥ “ታኒ ነዉ ቱማ ኦዳይስ፤ ኦንካ ሃፈነ ጌሻ አያናፐ የለቶና እፅኮ፥ ፆሳ ካዎተ ገላናዉ ዳንዳኤና።

6አሾ ናአተ አዉፐነ አይፐ ዬስ፤ ፆሳ ናአተ ጌሻ አያናፐ እመቴስ።

7ታኒ፥ ‘ህንተ ዛር የለታናዉ በሴስ’ ጋዳ ህንተዉ ኦድዳ ግሾ ኔኒ ማላለቶፋ።

8ጫርኮይ ባ ኮይዳ በሲ ጫርኬስ። ኔኒ እያ ኮሽንቻ ስአሳፐ አትሽን፥ እ አዉፐ ያኮ ዎይኮ አዉ ብያኮ ኤራካ። አያናፐ የለትዳ ኡባይ ሄሳ መላ” ያግስ።

9ያትን ንቆድሞስ፥ “ሄስ ዋንድ ሀናናዉ ዳንዳኢ?” ያግድ ኦይችስ።

10የሱሲ ዛሪድ፥ “ኔኒ እስራኤለታ አስታማረ ግዳሸ ሀይሳ ኤርኪ?

11ታኒ ነዉ ቱማ ኦዳይስ፤ ኑ ኤርያባ ኦዶስነ በእዳባ ማርካቶስ፥ ሽን ኑ ማርካተ ህንተ ኤከከታ።

12ታኒ ህንተዉ ሳአባ ኦድን ህንተ አማኖናባ ግድኮ ሳሎባ ኦድን ዋትድ አማናኔ?

13ሳሎፐ ዎዳ አሳ ናኣፐ አትሽን፥ ሳሎ ከይዳይ ኦንካ ባዋ፤ [ሳሎን ደእያ አሳ ናአይ ታና”] ያግስ።

14ሙሰይ መላ ቢታን ናሰ ብራታ ሾሽ ካቅዳይሳዳ ታና አማንዳ ኡባይ መርና ደኡዋ ኤካና መላ አሳ ናአይ ቁ ጋናዉ በሴስ።

16ፆሳ ናኣ አማንያ ኡባይ መርና ደኡዋ ላታናፐ አትሽን፥ ዮና መላ ፆሳይ ሀ አላምያ ዳሮ ዶስዳ ግሾ ባ እስ ናኣ እሚስ።

17ፆሳይ ባ ናኣ ሀ አላምያ ኪትዳይ አላምያ ፕርዳናዉ ግዶናሽን አላምያ እያ ባጋራ አሻናሳ።

18ናኣ አማንያ ኦንካ ፕርደተና፥ ሽን ናኣ አማኖና ኦንካ እስ ፆሳ ናኣ አማንቦና ግሾ ሀእ ፕርደትስ።

19ፕርዳይካ ሀይሳ፦ ፖኦይ አላምያ ይስ፥ ሽን አሳ ኦሶይ ኢታ ግድያ ግሾ አሳይ ፖኡዋፐ አድ ማ ዶሴስ።

20ኢታባ ኦያ ኦንካ ፖኦ እፄስ። አይስ ጊኮ፥ ባ ኦሶይ ቆንጮና መላ ፖኡዋኮ ዬና።

21ሽን ቱማ ኦያ ኦንካ ፆሳይ ኪትዳይሳዳ እ ኦዳይሳ ፖኦይ ቆንጭሳና መላ ፖኡዋኮ ዬስ።

22ሄሳፈ ጉየ፥ የሱሲነ እያ ታማረት ይሁዳ ቢታ ብዶሶና። የሱሲ ያን ፃማቅሸ ኤንታራ ጉ ዎደ ኡትስ።

23ቃስ ዮሃንስ ሳሌማ ማታን ደእያ ሄኖና ግያ በሳን ግድያ ሃ ደእያ ግሾ አሳ ያን ፃማቄስ። አሳይካ ያ ብድ ፃማቀቶሶና።

24ሄ ዎደ ዮሃንስ ቡሮ ቃሸትቤና።

25ሄሳፈ ጉየ፥ ዮሃንሳ ታማረትነ እስ አይሁደ አደይ ጌሾ ዎጋባ ፓላምዶሶና።

26ኤንቲ ዮሃንሳኮ ብድ፥ “አስታማርያዉ፥ ዮርዳኖሰ ሻፋፐ ሄፍንን ኔራ ደኤይስ፥ ኔኒ እያባ ማርካትዳይስ፥ ሄኮ ፃማቄስ። አሳ ኡባይካ እያኮ ቦሶና” ያግዶሶና።

27ዮሃንስ ዛሪድ፥ “ፆሳይ እሞና አስ አይብባካ ኤካናዉ ዳንዳኤና።

28‘ታኒ ክርስቶሳ ግድከ፥ ሽን እያፐ ስን ኪተታስ’ ግዳይሳስ ታዉ ህንተ፥ ህንተ ሁጰን ማርካ።

29ገሎስ ጊግዳራ ኤከናዉ ጊግዳይሳሳ። ኤከይሳ ላገይ እያ ማታን ኤቅድ እ ገይሳ ስእያ ዎደ ዳሮ ኡፋይቴስ። ሄሳ ግሾ፥ ሀይስ ታ ኡፋይሳይ ፖለትስ።

30እ ግታታናዉ ታኒ ጉፃናዉ በሴስ” ያግስ።

31ቦላፈ የይስ ኡባፈ ቦላ። ሳአፐ በንትዳይስ ሳአባ። እ ሳአባ ኦዴስ። ሳሎፐ የይስ ኡባፈ ቦላ።

32እ ባ በእዳባነ ስእዳባ ማርካቴስ፥ ሽን እያ ማርካተ ኤከይ ባዋ።

33እያ ማርካተ ኤክያ ኦንካ ፆሳይ ቱማ ግደይሳ ቆንጭሴስ።

34ፆሳይ ባ ጌሻ አያና እያዉ ኩመ እምያ ግሾ ፆሳይ ኪትዳይስ ፆሳ ቃላ ኦዴስ።

35አዋይ ባ ናኣ ዶስድ ኡባባ እያ ኩሸን ዎስ።

36ናኣ አማንያ ኡራስ መርና ደኦይ ደኤስ። ሽን ናኣ አማኖናይሳ ቦላ ፆሳ ሀንቆይ ደኤስፐ አትሽን፥ እ ደኦ ደመና።

← Chapter 2 Jump to: Chapter 4 →