Jonah 3

Amharic Gofa GFBEVF (ጌሻ ማፃፋ)

← Chapter 2 Jump to: Chapter 4 →

1ጎዳ ቃላይ ናምአን ዮናሳኮ ሀይሳዳ ያግድ ይስ።

2“ደንዳዳ ግታ ካታማ ናናወ ባ፤ ታ ነዉ ኦድያ ቃላ ኤንታዉ አዋጃ” ያግስ።

3ዮናስ ጎዳስ ኪተትድ ናናወ ብስ። ናናወይ ዳሮ ግታ ካታማ። ሀ ጋፃፐ ህን ጋፃ ጋካናዉ ሄ ቃማ ሄመስ።

4ዮናስ ካታማ ገልድ እስ ጋላሳ ኦገ ሄመትድ፥ “ናናወይ ኦይታሙ ጋላሳፐ ጉየ ያና” ያግድ አዋጅስ።

5ናናወ አሳይ ፆሳ አማንዶሶና። ፆማ አዋጅዶሶና፤ ጉፈ ግታ ጋካናዉ አስ ኡባይ ካዮ ማኦ ማእዶሶና።

6ናናወ ካዎይ ሄ ኦዳ ስእዳ ዎደ ባ ካዎተ አራታፐ ዎድ፥ ካዎተ ማኡዋ ቃርድ ካዮ ማኦ ማእድ ብዶ ቦላ ኡትስ።

7ናናወ ደርያስ ሀይሳዳ ያግድ አዋጅስስ፦ “ካዋፐነ እያ ሞርናታፐ ከይዳ ኪታዳ ሀችፈ ዶምድ ህንተራነ ህንተ መሄታራ፥ አይብባካ ሞና መላ ኡዮና መላ።

8አስነ መሄ ኡባይ ካዮ ማኦ ማኦ። እስ እስ አስ ምንድ ፆሳኮ ዋሶ። ባ ኢታ ኦግያፐ ስሞ፥ ባ ኢታ ኦሱዋካ አጎ።

9ፆሳይ ኑስ ቃትድ፥ ኑኒ ዮና መላ ባ ዎልቃማ ሀንቁዋፈ ስማነኮ ኦን ኤር!” ያግስ።

10ኤንቲ ባንታ ኢታ ኦግያፐ ስምዳይሳ ፆሳይ በእዳ ዎደ ኤንታዉ ቃትድ ኤንታ ቦላ ኤሀና ግዳ ኢታባ አጋግስ።

← Chapter 2 Jump to: Chapter 4 →