Leviticus 2

Amharic Gofa GFBEVF (ጌሻ ማፃፋ)

← Chapter 1 Jump to: Chapter 3 →

1ኦንካ ካ ያርሾ ጎዳስ ያርሽያ ዎደ ሄ ያርሾይ ሎኦ ለ ግዶ፤ እያ ቦላ ዛይተነ እፃነ ጉጆ።

2ሄሳ ካህነ ግድዳ አሮና ናይታኮ ኤሆ፤ ካህነት ሄ ሎኦ ልያፈ እስ ኩጫ ኤክድ፥ ዛይተነ እፃነ ኡባ ጉጅድ ያርሾ በሳ ቦላ ታማን ፁጎ። ሄስ ጎዳስ ታማን ፁገትያ ሳዎ ቶንኩ ግያ ቆፍሶ ያርሾ ግዳና።

3ካ ያርሹዋፈ አትዳይስ አሮናስነ እያ ናይታስ ግዳና። ሄስ ጎዳስ ታማን ፁገትዳ ኡባፈ ጌሻ ያርሾ ግዳና።

4ያርሸትያ ኡይይ ጮጨን ኮምፐትዳ ግድኮ፥ ዛይተራ ሙኑቀትዳ ሎኦ ለ ግዶ። ሄ ኡይይ እርሾይ ባይና ዛይተን ሙኑቀትዳይሳ ዎይኮ ሌኦን ኡከትድ ዛይተን ትየትዳይሳ ግዶ።

5ያርሸትያ ኡይይ በሸን ኡከትዳባ ግድኮ፥ እርሾይ ባይና ዛይተን ሙኑቀትዳ ሎኦ ለ ግዶ።

6እያ መንዳ እያ ቦላ ዛይተ ትጋዳ ካ ያርሾ ኦዳ ያርሻ።

7ነ ያርሽያ ካይ ኦቶን ካፅዳባ ግድኮ ዛይተን ሙኑቀትዳ ሎኦ ለ ግዶ።

8ሄሳዳ ሀንድ ጊግዳ ካ ያርሹዋ ጎዳስ ኤሀዳ ካህንያስ እማ፤ ካህነይ ሄሳ ኤክድ ያርሾ በሳን ያርሾ።

9ካህነይ ሄ ካ ያርሹዋ ኤክድ፥ ያርሾ በሳን ፁሳ ያርሾ ኦድ ታማን ፁጎ። ሄስ ጎዳስ ታማን ፁገትያ ሳዎ ቶንኩ ግያ ቆፍሶ ያርሾ ግዳና።

10ካ ያርሹዋፈ አትዳይስ አሮናስነ እያ ናይታስ ግዳና። ሄስ ጎዳስ ታማን ፁገትዳ ኡባፈ ጌሻ ያርሾ ግዳና።

11ኔኒ እርሾ ዎይኮ ኤስ ጎዳስ ታማን ፁጋዳ ያርሻናዉ በሶና ግሾ ጎዳስ ህንተ ኤህያ ካ ያርሾይ እርሾይ ደእያባ ግዶፖ።

12ሀይሳታ ባይራ ያርሾ ኦድ ጎዳስ ያርሻናዉ ዳንዳኤታ፥ ሽን ሳዎ ቶንኩ ግያ ያርሾ ኦድ ጎዳስ ያርሾ በሳን ፁጎፍተ።

13ማፅነይ፥ ኔኒ ነ ፆሳራ ጫቅዳ ጫቁዋስ ማላ ግድያ ግሾ ነ ካ ያርሾ ኡባን ማፅነ የጋ። ነ ካ ያርሾ ኡባ ማፅነን ማልኤ።

14ኔኒ ካፈ ባይራ ጎዳስ ኤህያ ዎደ ጫጨትድ ሽርከትዳ ትያ ግዳናዉ በሴስ።

15ሄስ ካ ያርሾ ግድያ ግሾ እያ ቦላ ዛይተ ትጋ፤ እፃነ ዎ።

16ካህነይ ሄ ጫጨትድ ሽርከትዳነ ዛይተይ ትገትዳ ካ ያርሹዋፈ ባጋ ኤክድ እፃነ ኡባራ ቆፍሶ ያርሾ ኦድ ጎዳስ ታማን ፁጎ።

← Chapter 1 Jump to: Chapter 3 →