Mark 3

Amharic Gofa GFBEVF (ጌሻ ማፃፋ)

← Chapter 2 Jump to: Chapter 4 →

1የሱሲ አይሁደ ዎሳ ኬ ስም ገልስ። ያን ኩሸይ ጉንድዳ እስ ኡራይ ደኤስ።

2እስ እስ አሳይ የሱሳ ሞታናዉ ኮይድ፥ ኩሸይ ጉንድዳ ኡራ ሳምባታ ጋላስ እ ፓኮነ አግኮ በአናዉ ኮይድ ምንድ ናጎሶና።

3የሱሲ ኩሸይ ጉንድዳ ኡራ፥ “ደንዳ ኤቃዳ ሃ ስን ያ” ያግስ።

4ሄሳፈ ጉየ፥ አሳኮ፥ “ሳምባታ ጋላስ ሎኦባ ኦይስ ዎገየ ኢታባ ኦይስ ዎጌ? አሳ ሸምፖ አሾየ ዎይኮ ዎ?” ያግድ ኦይችስ። ሽን አሳይ ስእ ግስ።

5የሱሲ ሀንቀትድ፥ ኤንታ ዩሽ አ ፄልድ፥ ኤንቲ ኦድን ስኦናይሳታ ግድያ ግሾ፥ ኤንታ ቦላ ዳሮ አዛንስ። ሄ አድያኮ፥ “ነ ኩሽያ ፕድ ኦ” ያግስ። ኡራይ ፕድ ኦን እያ ኩሸይ ፓፅስ።

6ኤለስድ ፋርሳወት አይሁደ ዎሳ ኬፈ ካረ ከይድ፥ የሱሳ ዋት ዎነኮ ማቀታናዉ ሄሮዲሳ ባጋታራ እስ ሶ ሺቅዶሶና።

7የሱሲ ባ ታማረታራ ጋልላ አባኮ ብስ። ጋልላፐነ ይሁዳፐ ይዳ ዳሮ አሳይ እያ ካልዶሶና።

8ቃስካ የሩሳላመፐ፥ ኤዶምያሳፐ፥ ዮርዳኖሰ ሻፋ ፕንፈ፥ ፅሮሳ ካታማፐነ ስዶና ካታማፐ የሱሲ ኦዳባ ስእድ፥ ዳሮ አሳይ እያኮ ይዶሶና።

9አሳ ዳሮተፈ ደንዶይሳን እያ ኡንኤና መላ እያ ታማረት ዎጎሎ እያዉ ጊግሳና መላ ኪትስ።

10ዳሮ አሳ እ ፓዳ ግሾ፥ ሀርግያ አሳ ኡባይ እያ ቦቻናዉ ሱገቶሶና።

11ቱና አያናይ ኦይክዳ አሳት እያ በእዳ ዎደ እያ ስንን ኩንድድ፥ ባንታ ቃላ ቁ ኦድ፥ “ኔኒ ፆሳ ናኣ ግድኪ?” ያጎሶና።

12ሄ ቱና አያናት እያ ኦናተ ኦደስካ ቆንጭሶና መላ ኤንታዉ ምንድ ኦድስ።

13የሱሲ ደርያ ቦላ ከይድ፥ ባ ኮይዳ አሳታ ባኮ ፄግስ፤ ኤንትካ እያኮ ብዶሶና።

14ኤንቲ ባራ ዳና መላነ ቃላ ታማርሳና መላ ታማነ ናምአታ ዶርድ፥ ኤንታ፥ “ሀዋረታ” ግድ ሱንስ።

15ቱና አያናታካ ከሳና መላ ኤንታዉ ማታ እሚስ።

16እ ዶርዳ ታማነ ናምአት ሀይሳታ፦ ጰፅሮሳ ያግድ ሱንዳ ስሞና፥

17ቦአነርገስ (ዳዳ ናይታ) ያግድ ሱንዳይሳታ፥ ዛብድዮሳ ናይታ ያይቆባነ ያይቆባ እሻ ዮሃንሳ፥

18እንድርያሳ፥ ፍልጶሳ፥ ባርተለሞሳ፥ ማቶሳ፥ ቶማሳ፥ እልፍዮሳ ናአ ያይቆባ፥ ታድዮሳ፥ ባ ቢታስ ምሸትያ ስሞናነ፥

19የሱሳ አድ እምዳ አስቆሮታ ይሁዳ።

20ሄሳፈ ጉየ፥ የሱሲ ሶ ብስ። ቃስ ዳሮ አሳይ ሺቅን፥ እነ እያ ታማረት ሀር አቶሽን ካ ማናዉካ ዳንዳእቦኮና።

21አሳይ እያ፥ “ጎዬስ” ግያ ግሾ፥ እያ ዳቦት ሄሳ ስእድ እያ ኤካናዉ ብዶሶና።

22ህገ አስታማረታፐ እሶት እሶት የሩሳላመፐ ይድ፥ “እያ ቦላ ብኤል-ዘቡል ደኤስ”፥ እ፥ “ፃላሄይ ዎልቃን ቱና አያናታ ከሴስ” ያግድ ኦደትዶሶና።

23የሱሲ አሳ ባኮ ፄግድ ሌምሶ ኦድስ። “ፃላሄይ ፃላሄ ዋት ከሳናዉ ዳንዳኢ?

24እስ ካዎተይ ባ ግዶን ሻከትኮ ሄ ካዎተይ ኤቃናዉ ዳንዳኤና።

25ሄሳዳካ፥ እስ ኬ አሳይ ባንታ ግዶን ሻከትኮ ያናፐ አትሽን፥ ዳናዉ ዳንዳኦኮና።

26ህዛ፥ ፃላሄይ ባራ ካጨትድ ሻከትኮ ዮፐ አትሽን፥ ዳናዉ ዳንዳኤና።

27“ሽን ኮይሮትድ ዎልቃማ ኡራ ቃቾና ደእሸ እያ ኬ ገልድ፥ እያ ሚሽያ ቦንቃናዉ ዳንዳእያ አስ ባዋ። ቃች ስሚድ እያ ኬ ቦንቃናዉ ዳንዳኤስ።

28“ታኒ ህንተዉ ቱማ ኦዳይስ፤ ፆሳይ አሳ ናይታስ ናጋራ ኡባነ ኤንቲ ጫይያ ጫሸ ኡባ አቶ ጋና።

29ሽን ጌሻ አያና ቦላ ኢታባ ኦደትያ ኦደስካ መርና ናጋራ ግዳናፐ አትሽን፥ ፆሳይ ኡባራካ እያ ማረና” ያግስ።

30የሱሲ ሄሳ ግዳይ፥ እስ እስ አሳት፥ “እያ ቦላ ቱና አያናይ ደኤስ” ያግዳ ግሾሳ።

31እያ አያነ እያ እሻት ይድ ካረን ኤቅድ፥ እያኮ አሰ ኪትድ እያ ፄግዶሶና።

32እያ ማታን ኡትዳ ዳሮ አሳት፥ “ሄኮ፥ ነ አየራነ ነ እሻታራ ካረን ኤቅድ ነና ኮዮሶና” ያግዶሶና።

33የሱሲ ዛሪድ፥ “ታ አይያ ኦኔ? ቃስ ታ እሻት ኦናንቴ?” ያግስ።

34ባ ማታን ኡትዳ አሳ ዩሽ አ ፄልድ፥ “ሄኮ፥ ታ አያነ ታ እሻት ሀይሳታ።

35ፆሳይ ሸንያ ኦያ ኡባይ ታ እሻ፥ ታ ምቾነ ታ አዮ” ያግስ።

← Chapter 2 Jump to: Chapter 4 →