Numbers 35

Amharic Gofa GFBEVF (ጌሻ ማፃፋ)

← Chapter 34 Jump to: Chapter 36 →

1እያርኮፈ ሄፍንን፥ ዮርዳኖሰ ሻፋ ማታን ደእያ ሞአበ ደንባን፥ ጎዳይ ሙሰኮ ሀይሳዳ ያግስ፤

2“እስራኤለት ባንታ ላታፐ ሌወት ዳና ካታማታነ ኤንታ ዩሹዋን ሄን ቢታ እማና መላ ኤንታዉ ኦዳ።

3ሄ ካታማት ኤንታዉ ዱሳ በሲ ግዶ፤ ሄን ቢታት ኤንታ ሚዛስ፥ ኤንታ ዶርሳስነ ኤንታ ሀራ መሄታስ ግዶ።

4ህንተ ኤንታዉ እምያ ሄን ቢታይ ኡባ ባጋራ ካታማ ግምበ ድርሳፈ እስ ሙኩሉ ዋ ግዶ።

5ካታማ ግዶ ኦድ ዶሎሀ ባጋራ ናምኡ ሙኩሉ ዋ፥ ዱገሀ ባጋራ ናምኡ ሙኩሉ ዋ፥ ዉሎሀ ባጋራ ናምኡ ሙኩሉ ዋነ ፑደሀ ባጋራ ናምኡ ሙኩሉ ዋ ዋተ። ሌወት ሄ ሄራ ባንታ ካታማስ ሄን ቢታ ኦ።

6“ሌወታስ ህንተ እምዳ ካታማት፥ አሰ ዎዳ ኡራይ ባቃትድ አትያ ኡሱፑን ካታማታ፤ ሄሳታ ቦላ ጉጅድካ፥ ኦይታማነ ናምኡ ሀራ ካታማታ ኤንታዉ እምተ።

7ኦይታማነ ሆስፑን ካታማታ ኤንታ ሄን ቢታራ እስፈ ሌወታስ እምተ።

8እስራኤለ አሳ ላታፐ ኤንታ ላታ መላ ዳሮ ኮቻፈ ዳሮ ካታማ፥ ጉ ኮቻፈ ጉ ካታማ ኤክድ ሌወታስ እምተ” ያግስ።

9ጎዳይ ሙሰኮ፥

10“እስራኤለ አሳኮ ሀይሳዳ ያጋ፤ ዮርዳኖሰ ሻፋ ፕንድ፥ ካናነ ቢታ ህንተ ገልያ ዎደ፥

11እስ አስ ቆፖና አሰ ዎዳባ ግድኮ ሄ ኡራይ ባቃትድ አታና መላ ካታማታ ህንተዉ ዶርተ።

12ያን ሱ ዛራናዉ ኮያ ሀይቅዳ ኡራ ዳቦታፐ እ አቴስ። ሸምፖ ዎዳ ደርያ ስንን ፕርዳስ ሺቆና ሀይቃናዉ በሰና።

13ሀ ህንተ እምያ ኡሱፑን ካታማት ህንተ ባቃትድ አትያ ካታማ ግዶ።

14ሄ ካታማት ዮርዳኖሰ ሻፋፐ ዶሎሀ ባጋን ግዶ፤ ቃስ አትዳ ሄት ካናነ ቢታን ግዶ።

15ሀ ኡሱፑን ካታማት ኤሮና አሰ ዎዳ እስራኤለ አሳይ፥ በታንቾትነ ጉ ዎደስ ህንተ ግዶን ደእያ አሳት ባቃትድ አትያ በሲ ግዶ።

16“እስ አስ ሀራ አስ ብራታ ሚሸን ሾጭድ ዎኮ ሄ ኡራይ ሸምፖ ዎስ፤ እ ሀይቆ።

17እስ አስ ዎናዉ ዳንዳእያ ሹቻን ሀራ አስ ጫድድ ዎኮ ሄ ኡራይ ሸምፖ ዎስ፤ እ ሀይቆ።

18እስ አስ ዎናዉ ዳንዳእያ ም ሚሸን ሀራ አስ ሾጭድ ዎኮ ሄ ኡራይ ሸምፖ ዎስ፤ እ ሀይቆ።

19ሱ ዛርያ ማታ ዳቦይ ሄ ሸምፖ ዎዳይሳ ደምኮ ዎ።

20“እስ አስ ሀራ አስ ባ ዎዛናን ሞርክድ ሱግ የግኮ ዎይኮ ሀይቆ ግድ እያ ቦላ እስባ ሆልን ሄ ኡራይ ሀይቅኮ፥

21ዎይኮ ሞርክድ ባ ኩሸ ጩጩምድ ደችን ሄ ኡራይ ሀይቅኮ፥ እ ሸምፖ ዎስ፤ እ ሀይቆ። ሱ ዛርያ ማታ ዳቦይ ሸምፖ ዎዳይሳ ደምኮ ዎ።

22“ሽን ሞርከተ ባይናን፥ እስ አስ ሀራ አስ አኬኮና ሱግድ ዎይኮ ቆፖና እያ ቦላ እስባ ሆልኮ፥

23ዎይኮ ዎናዉ ዳንዳእያ ሹቹ እ በኦና እያ ቦላ ሆልን፥ ሄ ኡራይ ሀይቅኮ፥ ሄሳን ሞርከተ ባይና ግሾነ እያ ቆሀናዉ ቆፕድ ደንዶና ግሾ፥

24ዱላታይ እያ ግዶንነ እያ ሱ ዛራናዉ ኮያ ኡራ ግዶን ፕርድያ ዎጋይ ካልድ ደእያ ዎጋ ግዶ።

25ኤሮና ዎዳይሳ ሱ ዛራናዉ ኮየይሳ ኩሸፐ ሄ ኡራ ዱላታይ አሽድ፥ እ ባቃትድ አትያ ካታማ ዛሮ። ሄ ዎደ ደእያ ዛይተን ትየትዳ ካህነ ሀላቃይ ሀይቃና ጋካናዉ እ ያን ደኦ።

26“ሽን ኤሮና ዎዳይስ ባቃትድ አትያ ካታማ ዛዋፐ በትኮ፥

27ሀይቅዳ ኡራ ዳቦይ እያ ደምድ ዎኮ፥ ሸምፖ ዎን ኦይሸተና።

28ሄ ዎደ ደእያ ካህነ ሀላቃይ ሀይቃና ጋካናዉ ሄ ኤሮና ዎዳ ኡራይ ባቃትድ አትያ ካታማን ኡቶ። ሽን ሄ ካህነ ሀላቃይ ሀይቅዳፐ ጉየ ኤሮና ዎዳ ኡራይ ባ ሶ ስማናዉ ዳንዳኤስ።

29“ሀ ዎጋይነ ህገይ ህንተ ደእያ ቢታን ህንተዉነ ህንተ ዘረስ ኤቅድ ደእያ ዎጋ ግዶ።

30“አሰ ዎዳ ኦንካ እ ሸምፖ ዎዳይሳ ናምኡ ዎይኮ ሄ ማርክ ማርካትኮ ሀይቆ፥ ሽን እስ አሳ ማርካተን ኦንካ ሀይቃናዉ በሰና።

31ቃስ ሸምፖ ዎዳ አሳፐ አጫ ኤኮፍተ፤ እ ሀይቃናዉ በሴስ።

32ባቃትድ አትያ ካታማ በትዳ ኦደፈካ ካህነ ሀላቃይ ሀይቃናፐ ስን ባ ሶ ስማና መላ አጫ እያፐ ኤኮፍተ።

33ሱ ቢታ ቱንስያ ግሾ ሱ ጉሶፍተ። ሱ ጉስዳ ኡራ ሱፈ አትሽን፥ ሱ ጉክዳ ቢታ ሀራ ኦገራ ቱናተፈ ጌሽያ ዎግ ባዋ።

34ታኒ፥ ጎዳይ እስራኤለ አሳ ግዶን ደእያ ግሾ፥ ህንተ ደእያ ቢታ፥ ታኒ አቅያ ቢታ ቱንሶፕተ” ያግስ።

← Chapter 34 Jump to: Chapter 36 →