Obadiah 1

Amharic Gofa GFBEVF (ጌሻ ማፃፋ)

Jump to:

1አብድዩይ በእዳ ቆንጨ። ጎዳ ፆሳይ ኤዶመባ ሀይሳዳ ያጌስ: ኤዶመባ ጎዳይ፥ ባ ኪትያ አድያ ቦላ ካዎተታስ ኪትዳይሳ ኑኒ ስእዳ፤ “ደንድተ! ኤዶመ ኦላናዉ ቦስ” ያግስ።

2“ሄኮ፥ ታ ነና ካዎተታ ግዶን ላፋ ከሳና፤ ኔኒ ዳሮ ካትዳይሳ ግዳና።

3ነኖ፥ ዛላ ቆጶ ግዶን ደኤይሶ፥ ነ ኬ ቃ ደረታ ቦላ ኬፅዳይሶ፥ ነ ዎዛናን፥ ‘ታና ሀይሳፈ ሳአን ዎሳናይ ኦኔ?’ ያገይሶ፥ ነና ነ ዎዛና ኦቶሮይ ጭምስ።

4ነ አርጋንዳ ፑደ ሃካዳ ፕራኮካ፥ ነ ኬ ፆልንቶታ ግዶን ኬፅኮካ፥ ታ ነና ያፐ ዱገ ዎሳና” ያጌስ ፆሳይ።

5“ካይሶይ ዎይኮ ባንቅያ አስ ቃማ ዪኮ፥ ባንታዉ ግደይሳ መላ ፃላላ ካይሶቶኮናዬ? ዎይነ ማፀይሳት ማፅሸ፥ ፖሽለ አሾኮናዬ? ሽን ነ ሞርከት ነና ፖሎ ይሳና።

6አቤት ኤሳዌይ ዋንድ ቦንቀታንዴ? ቆሳን ደእያ እያ ሻሎይ ዋንድ ኤከታንዴ?

7ኔራ ጫቅዳይሳት ኡባይ ነና ነ ቢታፈ ጎዳና፤ ቃስ ነ አማነትዳ ላገት ጭምድ ነና ፆናና። ነ ካ ምዳይሳት ነ ኦገን ግተ የጋና፥ ሽን ኔኒ ሄሳ አኬካካ” ያጌስ።

8“ሄ ጋላስ ታኒ ኤዶመፐ ጭንጫታነ ኤሳዌ ዙማፐ አኬካ ይሳና።

9ህንተኖ፥ ተማና አሳቶ፥ ህንተ ኦላንቾት ዳጋማና፤ ኤሳዌ ዙማ ቦላ ደእያ አሳ ኡባይ ጎይረታና” ያጌስ ጎዳይ።

10ነ እሻ ያይቆባ ቦላ ነ ኦዳ ኢታባ ግሾ፥ ነ ዬላ ማአና፤ ነ መርናዉ ያና።

11እማትነ አላጋት እያ ሻሉዋ ቦንቅያ ጋላስ ኔኒ ጋፃ ከያዳ ኤቃ ፄላዳሳ። ቃስ እያ ፐንገራ ገልድ፥ የሩሳላመ ካታማ ቦላ ሳማ የግያ ዎደ ኔኒ ኤንታፈ እሱዋ መላ ግዳዳሳ።

12ኔኒ ነ እሻይ መቶትያ ጋላስ እያ መቱዋን ኡፋይታናዉ በሰናሽን፤ ይሁዳ አሳ ቦላ ዋየይ ጋክያ ጋላስ ሀሹ ጋናዉ በሰናሽን። ኤንታ ኡንአ ጋላሳን ኦቶሮን ኦደታናዉ በሰናሽን!

13ኔኒ ኤንታ መቱዋ ጋላስ ታ አሳይ ደእያ ካታማ ገላናዉ፥ ኤንታ ዋያን ኔኒ ኡፋይታናዉነ ኤንታ መቱዋ ጋላስ ኤንታ ሻሉዋ ቦንቃናዉ በሰናሽን!

14ባቃተይሳታ ዎናዉ ኔኒ ዳጋላ ኦገን ናጋናዉነ አትዳይሳታ ኤንታ ኡንኣ ጋላስ ሞርከታስ አዳ እማናዉ በሰናሽን!

15ጎዳ ፕርዳ ጋላሳይ ካዎተታ ኡባ ቦላ ማትስ። ነኖ ኤዶመ፥ ኔኒ ሀራታ ቦላ ኦዳባይ ነ ቦላ ኦሰታና፤ ነ ኦሶይ ነ ቦላ ስማና።

16ታ ጌሻ ዙማ ቦላ ነ ኡይዳይሳ መላ ካዎተ ኡባይ ቃንፆና ኡያና፤ ጉጅድካ ኡያና፤ ኤንቲ ካሰ ሀን ኤሮናባ ሀናና።

17“ሽን ፅዮነ ዙማን ከስ ኤክዳይሳት ዳና፤ ፅዮነይ ጌሽ ግዳና፤ ያይቆባ ኮቻይ ባንታ ቢታ ዛር ላታና።

18ያይቆባ ኮቻይ ታማ ግዳና፤ ዮሰፋ ኮቻይ ላጮ ግዳና፤ ኤሳዌ ኮቻይ ቡረ ግዳና። ታም ቡረ መይሳዳ፥ ያይቆባ ዘረይነ ዮሰፋ ኮቻይ ኤሳዌ ኮቻ ምድ ፖሎ ይሳና” ያጌስ ጎዳይ።

19ነገበ መላ ቢታን ደእያ አሳይ ኤሳዌ ዙማ ላታና፤ ጋ ቢታን ደእያ አሳይ ፍልስፄመ ቢታ፥ ኤፍሬማ ቢታነ ሳማረ ቢታ ላታና። ቃስ ብንያመ ኮቻይ ጋላዳ ቢታ ላታና።

20ድኤተፈ ስምዳ እስራኤለ አሳይ፥ ካናነፐ ብድ ስራፍታ ጋካናዉ ደእያ ቢታ ላታና። የሩሳላመፐ ደኤትድ፥ ሳፋራዳ ጌተትያ በሳን ደእያ አሳት ነገበ ካታማታ ላታና።

21አሸይሳት ኤሳዌ አሳ ሃራናዉ ፅዮነ ዙማ ቦላ ከያና፤ ካዎተይ ጎዳባ ግዳና።

Jump to: