Philippians 4

Amharic Gofa GFBEVF (ጌሻ ማፃፋ)

← Chapter 3 Jump to:

1ታ እሻቶ፥ ታ ዶሰይሳቶ፥ ታ ላሞተይሳቶ፥ ታና ኡፋይሰይሳቶ፥ ታና ግታየይሳቶ፥ ህዛ፥ ጎዳን ምንድ ኤቅተ።

2ኤዎዳነ ስንፅካ፥ ህንተ ናምአይ፥ እስ ቆፋን፥ ምችዳ ጎዳን ዳናዳ ታኒ ህንተና ዞራይስ።

3ታራ ኦያ አማንይሶ፥ ኔኒ ሀ ማጫሳታ ማዳና መላ ታ ነና ዎሳይስ። ሀ ማጫሳት ታራ፥ ቀለምንፆሳራነ ኤንታ ሱንይ ፆሳ ደኦ ማፃፋን ፃፈትዳ ሀራታራ እስፈ ዎንገላ ኡባ በሳ ጋናዉ ዳቡርዶሶና።

4ጎዳራ ህንተ ደእያ ደኡዋን ኡባ ዎደ ኡፋይትተ። ታኒ ሄሳ ጉጃዳካ ኦዳይስ፤ ኡፋይትተ።

5አስ ኡባይ ህንተ አሽከተ ኤሮ፤ ጎዳይ ማታን ያና።

6ህንተ ፆሳ ዎስያ ዎደ ኡባን እያ ጋላትሸ፥ ህንተና ኮሽያባ ኡባስ ዎስተፐ አትሽን፥ አይብባስካ ህርጎፍተ።

7አሳ ኤራተ ኡባፈ አያ ፆሳ ሳሮተይ፥ ህንተ ዎዛናነ ህንተ ቆፋ ጎዳ የሱስ ክርስቶሳ ባጋራ ናጋና።

8ዉርሰን፥ ታ እሻቶ፥ ህንተ ዎዛናን ሎኦባነ ጋላትስያባ ቆፕተ። ቱማ ግድያባ ኡባ፥ ቦንቾባ ኡባ፥ ቆሆ ግዶናባ ኡባ፥ ጌሻባ ኡባ፥ ሲቆባ ኡባነ ኡፋይስያባ ኡባ ቆፕተ።

9ህንተ ታፐ ታማርዳባ፥ ኤክዳባ፥ ስእዳባነ በእዳባ ኡባ ኦተ። ሳሮተ እምያ ፆሳይ ህንተራ እስፈ ግዳና።

10ዳሮ ዎደፐ ጉየ፥ ህንተ ታባ ዛሪድ ቆፓናዉ ዶምዳ ግሾ ታኒ ጎዳን ዳሮ ኡፋይታይስ። ሄሳ ጉሳይ፥ ታዉ ቆፓናዉ ህንተዉ እንጀቶና እፅዳይሳፈ አትሽን፥ ታዉ ቆፋ አግበከታ።

11ታኒ ሄሳ ታና መትዳ ግሾ ጊከ፤ ታዉ ደእያባይ ግዳና ጉሱ ታማራስ።

12ታኒ መቶተትድ ደእያ ዱስ ኤራይስ፤ ቃስ ዱረትድ ደእያ ዱስካ ኤራይስ። አዉን ግድን ቃስ አይ ዎደካ ታኒ ካሎነ ኮሻ፥ ፓጨነ ፓላሀ ታማራስ።

13ክርስቶስ ታዉ እምያ ዎልቃን ኡባባ ኦናዉ ዳንዳአይስ።

14ግድኮካ፥ ህንተ ታ መቱዋ ታራ ኤክዳይሳን ሎኦ ኦደታ።

15ፍልጵስዩሳ አሳቶ፥ ዎንገላ ኮይሮ ኦዳናዉ ታኒ ማቀዶነፐ ከይያ ዎደ እምያባንካ ኤክያባንካ ህንተ ዎሳ ኬፈ አትሽን፥ ሀር ታና ማድቦናይሳ ህንተ ኤሬታ።

16ተሰሎንቀን መቶይ ጋክዳ ዎደካ ታና ዛር ዛሪድ ማድደታ።

17ታኒ፥ ህንተፈ እሞታ ኤካናዉ ኮያዳ ግዶናሽን፥ እሞፐ ያ አንጁዋ ህንተ ኤካና መላሳ።

18ታኒ፥ ህንተ እምዳ ኡባነ ግድድ ፓላሄይሳ ኤካስ። ህንተ የድዳ ኡባ ኤጳፍራድቱሳፐ ኤካስ፤ ኮሽያባ ኡባይ ታዉ ደኤስ። ህንተ ታዉ የድዳ እሞይ ፆሳስ ሳዎ ቶንኩ ግያ፥ እ ዶስያ፥ እ ኡፋይትያ ያርሾ መላ።

19ታ ፆሳይ ባ ቦንቾ ዱረተፈ፥ ክርስቶስ የሱሳ ባጋራ ህንተዉ ኮሽያባ ኡባ እማና።

20ኑ አዋ ፆሳስ መርናፐ መርና ጋካናዉ ቦንቾይ ግዶ። አምንእ።

21ክርስቶስ የሱሳ ባጋራ ፆሳባ ግድዳ ኡባ ሳሮ ጊተ። ታራ ደእያ እሻት ህንተና ሳሮ ጎሶና።

22ፆሳባ ግድዳ አሳ ኡባይ፥ ኡባፈ አድ ካዋ ቄሳረ ኬን ደኤይሳት ህንተና ሳሮ ጎሶና።

23ጎዳ የሱስ ክርስቶሳ አ ኬሀተይ ህንተራ ግዶ።

← Chapter 3 Jump to: