Ruth 3

Amharic Gofa GFBEVF (ጌሻ ማፃፋ)

← Chapter 2 Jump to: Chapter 4 →

1እስ ጋላስ ኑሃማ ባ ናአ ማችዉ፥ “ታ ናተ፥ ኔኒ ጊግን ዳና መላ ታኒ ነዉ ዉላ ኮያኮ ዋናኔ?

2ኔኒ ኤንታራ ጋምእዳ ማጫ አይለታ ጎዳይ፥ ቦኤዝ፥ ኑስ ማታ ዳቦ ግደነዬ? እ ሀች ቃማ ዉዱማን ባንጋ ፑናና።

3ኔኒ ሜጨታዳ ሽቶ ትየታ፤ ነ ሎኦ ማኡዋ ማአዳ፥ ዱገ ዉዱማን ባ፤ ባዳ ቦኤዝ ምድ ኡይድ ስማና ጋካናዉ እያ አይፈን ከዮፓ።

4እ ሂፃ አያ ዎደ እ አዉን ስክያኮ በአዳ፥ እያ አፍላ ቃራዳ እያ ቶሆሶን ዝንአ አጋ። ኔኒ ሀናናባ እ ነዉ ኦዳና” ያጋሱ።

5ኡሩታ፥ “ኔኒ ግዳባ ኡባ ታ ኦና” ያጋሱ።

6ሄሳ ግሾ፥ ኡሩታ ደንዳዳ ዱገ ሞ ባዳ፥ እ አዝና አይያ እዉ ኦድዳባ ኡባ ኦሱ።

7ቦኤዝ ምድ ኡይድ ባ ቦላ ፓሽክስዳፐ ጉየ፥ ካ ጫቻ ማታን አድ ዝንእስ። ኡሩታ ለፓራ ሺቃዳ፥ እያ ቶሁዋ ቃራዳ ዝንአሱ።

8ግድ ብላሄ ግድያደ እ ዳጋም ደንድድ ሽረትያ ዎደ፥ እስ ማጫስ እያ ቶሆሶን ዝንእዳሮ ደምስ።

9እካ፥ “ኔኒ ኦኔ?” ያግድ ኦይችስ። እያ፥ “ታኒ ነ አይልዉ ኡሩቶ፤ ኔኒ ታ አዝናስ ማታ ዳቦነ ታና ዎዛናዉ ዳንዳኤይ ነና ግድያ ግሾ ታ ቦላ ነ አፍላ የጋ” ያጋሱ።

10ቦኤዝ ዛሪድ፥ “ታ ናተ፥ ጎዳይ ነና አንጆ! ሀ ኬሀተይ ካሰ ነ ኦዳይሳፈ አስ። ኔኒ ማንቆ ዎይኮ ዱረ ግድዳ ናአተ አደ ኮያባካ።

11ሀእ ታ ናተ ባቦፋ። ኔኒ ኦይችዳባ ኡባ ነዉ ታኒ ኦና። ታ ካታማን ደእያ አሳ ኡባይ ኔኒ ሎኦ ማጫስ ግደይሳ ኤሬስ።

12ታኒ ማታ ዳቦ ግደይስ ቱማ፤ ሽን ታፐ ዳሮ ማተይ ደኤስ።

13ሀች ቃማ ሀይሳን አቃ። ዎንቶ እ ነና ዎዛናዉ ኮይኮ ሎኦ፥ ዎዞ። ሽን እ ዎዛናዉ ኮዮና እፅኮ፥ ደኦ ጎዳይ ኤርያ መላ፥ ታኒ ነና ዎዛና። ሳእ ዎንታና ጋካናዉ ሀይሳን ዝንአ” ያግስ።

14ሄሳ ግሾ፥ እያ ቦኤዛ ቶሆሶን ሳእ ዎንታና ጋካናዉ ዝንአዳ አቃሱ። ቦኤዝ፥ “ማጫስ ካ ሞ ይዳይሳ ኦንካ ኤሮፖ” ግዳ ግሾ ኡሩታ አስ አሰ ሻክድ ኤሮና ዎደ ዎንታ፥ ዳሮ ጉራ ደንዳሱ።

15ቦኤዝ እዮ፥ “ነ ማእዳ ይዳ ላፃና ሀ በሳ” ያግስ። እያ በስን ላታሙ ክሎ ግራመ ባንጋ ማክ ቆልድ እዮ ባእስስ። እካ ባአዳ ጉየ ካታማ ባሱ።

16ኡሩታ ባ አዝና አየኮ ስማዳ ይን፥ ኑሃማ፥ “ታ ናተ፥ ነ ብዳ አላለይ ዋንዴ?” ያጋዳ ኦይቻሱ። ኡሩታካ ቦኤዝ ኦዳባ ኡባ ኦዳሱ፤

17ጉጃዳካ፥ “ ‘ነ አዝና አየኮ መላ ኩሸ ቦፓ’ ግድ ሀይሳ ላታሙ ክሎ ግራመ ባንጋ እሚስ” ያጋሱ።

18ያግን ኑሃማ፥ “ታ ናተ፥ አይብ ሀናኔኮ ኤረታና ጋካናዉ ናጋ። አደይ ሀች ሀ አላለይ ኦገ ኦይኮና ሸምፐና” ያጋሱ።

← Chapter 2 Jump to: Chapter 4 →