Song of Solomon 2

Amharic Gofa GFBEVF (ጌሻ ማፃፋ)

← Chapter 1 Jump to: Chapter 3 →

1ታኒ ሳሮናን ዶልያ ጪሻነ ዛንጋራን ዶልያ ሱፈ ጪሻ መላ።

2ታ ሲቅያ ማጫሳ ግዶን በእያ ዎደ፥ አጉን ግዶን በንትያ ሱፈ ጪሻ መላ።

3ታ ሲቆይ ሀራ ፓንታ ግዶን ፄልያ ዎደ ዎራን ደእያ አፕለ ም መላ። ታና ዳሮ ኡፋይስን፥ እያ ኩያ ግዶን ኡታስ፤ እያ አይፈይ ምን ታና ማልኤስ።

4እ ታና ግብራ ምያ ኬ ገልስስ፤ ባ ሲቁዋ ባንድራዳ ታ ቦላ ቁ ቁ ኦስ።

5ታኒ እያ ሲቁዋን ኦይከታዳ ሀርግዳ ግሾ፥ ዛብበ አይፈ ሙዝድ ታና ጋሽትስተ፤ አፕለ ሙዝድ ታ ዎልቃ ምንተ።

6ባ ሀድርሳ ኩሽያ ታና ቦርኮትስስ፤ ባ ኡሻቻ ኩሽያን ታና ቆምስ።

7ህንተኖ፥ የሩሳላመ ያላጋ ማጫሳዉ፥ ሲቆይ ባዉ ዶስድ ደንዳና ጋካናዉ፥ እያ ህንተ ባርከና መላ፥ ታ ህንተና ገንኤንነ ዎራ ዎሽኤን አማታይስ።

8ታ ሲቁዋ ግርሳይ ደርያ ቦላራ ጉፕሸነ፥ ዙማ ቦላራ ፆንገትሸ የይስ ስኤቴስ።

9ታ ሲቆይ ዎሽኤ ዎይኮ ገንኤ ማር ዳኔስ፤ ሄኮ፥ ኑ ኬ ማታን ኤቅስ፤ ማስኮተራ ሶ ፄሌስ፤ ማጋራጁዋ ግዶራ ፄሌስ።

10ታ ሲቆይ፥ ሀይሳዳ ያጌስ፤ “ታ ሲቀ፥ ደንዳ! ታ የገልሰ፥ ሃያ፥ እስፈ አነ ቦስ።

11ሄኮ፥ ባልጎይ አስ፤ እራይካ ኤቅስ።

12ቢታን ጪሽ ጪይስ፤ የ የፅያ አጌናይ ጋክስ፤ ሆለ የ ኑ ቢታን ስኤትስ።

13ባላሰ ምይ አይፈ ዶምስ፤ ዎይነይ ጪይስ፤ ጪሻ ሳዎይ ቢታን ቶንኩ ጌስ። ታ ሲቀ፥ ደንዳ፤ ታ የገልሰ፥ ሃያ፤ አነ እስፈ ቦስ።”

14አፎ ዶናን ዛላ ቆጶን፥ ቆሰትዳ ሆለ ዳንያረ፤ አነ እስ ቶሆ ታና ነ ሶምኡዋ በሳ፤ ነ ግርሳ ስሳ። ነ ቃላይ ታና ማልኤስ፤ ነ ሶምኦይ ዳሮ ሎኤስ።

15ኑ ዎይነይ ጪይስ፤ ኑ ዎይነ ጋድያ ኢስያ ዎርካናታ፥ ሄ ጉ ቡታለታ ፅሄን ኦይክተ።

16ታ ሲቆይ ታባ፤ ታንካ እያባ፤ ጪሻታ ግዶን እ ባ ዉድያ ሄሜስ።

17ሳእ ጌያና ጋካናዉ፥ ኩያይ ያና ጋካናዉ፥ ታ ሲቁዋዉ፥ ገንኤዳ ዎይኮ ዎሽኤ ማራዳ፥ አፎትያ ደርያራ ዎፃሸ ሃ ስማ።

← Chapter 1 Jump to: Chapter 3 →