Zechariah 2

Amharic Gofa GFBEVF (ጌሻ ማፃፋ)

← Chapter 1 Jump to: Chapter 3 →

1ሀራ ቆንጨን ባ ኩሸን ዋ ዎዶሮ ኦይክዳ እስ አስ በአስ።

2ታኒ፥ “ኔኒ አዉ ባይ?” ያጋዳ ኦይቻስ። እ ዛሪድ፥ “ታኒ የሩሳላመ ዳልጋተይነ አዱሳተይ አይ መለኮ ዋናዉ ባይስ” ያግስ።

3ሄሳፈ ጉየ፥ ታራ ሃሳያ ኪታንቾይ ከይድ ብስ፤ እያራ ጋሄታናዉ ሀራ ኪታንቾይ ይስ።

4ይዳ ኪታንቾይ፥ “ዎፃ ባዳ፥ ናአተ አድያኮ፥ ‘የሩሳላመን ዳሮ አስነ ዳሮ መሄይ ዳና ግሾ፥ ካታማ ዩሾን ግምበ ድርስ ኮሸና።

5ታኒ እያ ዩሹዋን ታማ ድርስ ግዳና፤ ታኒ እያዉ ቦንቾ ግዳና’ ያጌስ ጎዳይ።

6“ታኒ ህንተና ቢታ ኦይዱ ባጋ ላልዳ ግሾ፥ ያፐ ከይተ፤ ኤለ ከይተ፤ ፑደሀ ባጋ ቢታፈ ባቃትተ” ያጌስ ጎዳይ።

7“ነኖ፥ ፅዮነ ከያ፤ ባብሎነ ማጫ ናይታ ግዶን ደእያረ፥ ኤንታ ግዶፈ ባቃታ” ያጌስ ጎዳይ።

8ኡባፈ ዎልቃማ ጎዳይ እያ ቦንቹዋ ቆንጭሳና መላ፥ ባ አሳ ቦንቅዳ ካዎተታኮ ታና ኪትድ፥ “ህንተና ቦችያ ኡራይ እያ አይፍያ ቡሉዋ ቦቼስ።

9ታኒ ታ ኩሽያ ኤንታ ቦላ ደንና፤ ኤንታ አይለት ኤንታ ዛሪድ ቦንቃና። ሄ ዎደ ህንተ ኡባፈ ዎልቃማ ጎዳይ ታና ኪትዳይሳ ኤራና።”

10“ታኒ ያዳ ህንተ ግዶን ዳና ግሾ፥ ፅዮነ አሳዉ፥ ዛማርተ፤ ኡፋይትተ!” ያጌስ ጎዳይ።

11ሄ ዎደ ዳሮ ካዎተት ጎዳራ ጋሄትድ እያ አሰ ግዳና። እ ህንተ ግዶን ዳና፤ ኡባፈ ዎልቃማ ጎዳይ ታና ህንተኮ ኪትዳይሳ ሄ ዎደ ህንተ ኤራና።

12ጌሻ ቢታን ይሁዳ፥ ባና ጋክዳ ግሾ ኦድ ላታና፤ የሩሳላመ ዛሪድ ዶራና።

13ጎዳይ ባ ደእያ ጌሻ በሳን ደንድዳ ግሾ፥ አሾ ማእዳ ኡባይ እያ ስንን ስእ ጎ!

← Chapter 1 Jump to: Chapter 3 →