Hosea 4

Amharic Gofa GFBLVF (Geeshsha Maxaafa)

← Chapter 3 Jump to: Chapter 5 →

1Ha biittan de7iya asa ubbaa, Goday mootiyabay de7iya gisho, Isra7eele asato, Godaa qaala si7ite. Hessika, biitta bolla ammanetethi, siiqoynne Xoossaa eroy baawa.

2Ha biitta bolla de7ey baadethi, wordo, shempo wodho, kaysotonne layma xalaala. Enti woga ubbaa menthosona; suuthu gussoosona.

3Hessa gaason biitta ubbay yeekana; biittan de7iya ubbay daaburana. Sa7a do7ati, salo kafotinne abba moloti hayqana.

4Hinteno, kahineto, taani hintena mootiyabay de7iya gisho, oonika hara asara palametofo; woyko hara asi mootopo.

5Hinte gallasinne qamma dhubeteeta; nabetika hintera dhubetoosona. Hessa gisho, taani hinte aayiw dhaysana.

6Ta asaas eratethi bayna gisho dhayidosona. Hinte eratethi ixida gisho, taka hinte taw kahine gidonna mela ixas. Hinte Xoossaa higgiya dogida gisho, taka hinte nayta dogana.

7Kahineta tayboy dari dari biya wode tana guji guji naaqidosona; taani enta bonchuwa qaarada yeellayana.

8Ta asaa nagaray entaw kathi gidida gisho enti ta asay balaba oothana mela koyoosona.

9Kahineti deriyape dummatibokona. Taani enta hanota gisho, enta seerana; enta oosuwada entaw zaarana.

10Enti Godaa aggida gisho maana, shin kallokona; laymatana, shin na7a yelokona.

11Laymatethi, gam7ida woyne ushshinne mal7anto woyne ushshi ta asaa wozanaa dhaysis.

12Enti mithafe oosetida eeqa misile zore oychoosona; enta xam7ay enta oysha zaarees. Laymatetha ayyaanay enta balethis; enti banta Xoossaafe haakidi laymatidosona.

13Dereta huuphen yarsho yarshoosona; lo77o kuyay de7iya wolaa garsan, xiidda garsan ixaane cuyisoosona. Hessa gisho, hinte macca nayti laymatoosona; hinte nayta macheti laammoosona.

14Hinte macca nayti laymatiya wodenne hinte nayta macheti laammiya wode taani seerike. Ayis giiko, addeti banta huuphen laymateysatara laggetoosona; entara yarshoosona. Hessa gisho, akeeki bayna derey dhayana.

15“Isra7eele asato, hinte laymatikoka, Yihuda asay hinteysada bala gidopo. Galgala boopite; Beet-Aweena (Iitatetha keethi) keyopite; ‘De7o Xoossay eriya mela’ gidi caaqofite.

16Isra7eele asay geella ussada geellatis. Yaatin, Goday entana dalga denban dorsa marada waatidi heemmanee?

17Efreemi eeqatara gahetis; enta aggaagite.

18Enti daro woyne ushsha uyi simmidi, laymatethi aggokona; enta halaqatika yeellayaba daro dosoosona.

19Enta carkoy efana; banta eeqas yarshida yarshota gaason enti yeellatana.”

← Chapter 3 Jump to: Chapter 5 →