Joel 3

Amharic Gofa GFBLVF (Geeshsha Maxaafa)

← Chapter 2 Jump to:

1“He gallasaninne he wodiyan taani Yihudanne Yerusalaame asaa di7etethaafe zaarada anjana.

2Taani kawotethatan de7iya asaa shiishada, Yoosafexa zangaara wodhisana. Ta asaa Isra7eele bolla enti oothida iita oosuwa gisho, taani enta yan pirdana. Enti kawotethata giddon ta asaa laallidosona; ta biitta bantaw shaaki ekidosona.

3Ta asaa bolla saama yeggidosona; laymatiya maccas demmanaw, adde nayta immidosona; woyne ushshas macca nayta bayzidosona.

4“Hinteno, Xiroosa, Sidoonanne Filisxeeme biitta asato, hinte ta bolla ay oothanaw qopidetii? Ta bolla halo keyanaw koyeetii? Hinte hessa koyiko, taani ellesada hinte oosuwa hinte bolla zaarana.

5Ta bira, ta worqanne ta al7o miishiya ubbaa ekidi hinte eeqa keethaa gelsideta.

6Yihudanne Yerusalaame asaa enta biittafe haassi efidi, Girike asaas bayzideta.

7Heko, hinte bayzida bessaafe taani ha77i enta kessada hinte oothidaba ubbaa hinte huuphen zaarana.

8Taani hinte adde naytanne hinte macca nayta Yihuda asaas aatha immana. Enti haaho biittan de7iya Saaba asaas enta bayzana. Taani Goday haysa odas.

9“Haysada yaagidi kawotethata giddon awaajite; Olas giigite; mino asata denthethite, olanchoti shiiqidi olas keyo.

10Hinte marasha mashshe, hinte baaca toora oothidi qoxite! Daaburanchoy, ‘Taani mino!’ yaago.

11Hinteno, yuushuwan de7iya kawotethato, elle keyite; haa shiiqite” yaagite. Abeeti Godaw, ne olanchota duge yedda!

12“Kawotethati dendidi, Yoosafexa zangaara yo; Isra7eele yuushuwan de7iya kawotethata, ubbaa bolla pirdanaw taani yan uttana.

13Enta iitatethay daro; caka wodey gakida kathada enta cakite. Woyne ayfey ollan kumin yedheysada, enta yedhite.

14Pirda zangaaran Goday pirdiya gallasay gakis; hessa gisho, taybon daro asay he zangaaran shiiqis.

15He gallas awinne ageeni dhumana; xoolintoti banta poo7uwa diggana.

16Goday Xiyoonen gididi dechana; Yerusalaamen ba qaala sissana; saloynne sa7i kokorana. Shin Goday ba asaas, Isra7eeles baqatidi attiya bessi gidana.”

17“He wode hinte, taani ta geeshsha zumaa bolla, Xiyoonen de7iya Godaa hinte Xoossaa gideysa erana. Yerusalaame katamay geeshshi gidana; allagati zaaridi Yerusalaame olokona.

18He gallas dereti mal7anto woyne ushshan xokana; zumati maathi goggana. Yihuda biittan de7iya shaafa ubban haathi pultana. Godaa keethan pultoy dhuuqana; Seexima zangaara ushshana.

19“Gibxey baysa gidana; Edoomey booddila bazzo gidana. Enti Yihuda asaa bolla iitabaa oothidosona; xillo asaa suuthaa gussidosona.

20Shin Yihudinne Yerusalaamey merinaw, yeleta ubbaas de7iya bessi gidana.

21Taani halo keyonna aggida enta suuthaa haluwa buroo keyana” yaagees Goday.

← Chapter 2 Jump to: