Jonah 2

Amharic Gofa GFBLVF (Geeshsha Maxaafa)

← Chapter 1 Jump to: Chapter 3 →

1Yoonasi moluwa ulon de7ishe, ba Godaa Xoossaa haysada yaagidi woossis.

2“Taani ta waayan de7ashe nena xeegas; neka taw si7adasa. Taani Si7oole ciimmuwa giddon de7ashe, maado koyada neeko waassas Neka ta waasuwa si7adasa.

3Neeni tana abba ciimmuwan duge yeggadasa. Haathi ta yuushuwa teqis; wolqaama zuley ta bollara aadhis.

4‘Taani ne sinthafe wora holetas, Shin ne Geeshsha Keetha zaarada be7ana’ gada qopas.

5Haathi taw qoodhe gakis, Abbaa ciimmoy tana mittis. Abban de7iya maatay ta huuphen xaaxetis.

6Taani haatha garsan de7iya dereta baasuwa gakada mitettas, biitta wulay merinaw ta bolla gordetis, Shin ta Godaw Xoossaw, neeni ta shempiw iita ollafe kessadasa.

7Ta shempiya doccida wode, Godaw ta nena qopas; ta woosay neeko ne Geeshsha keethaa gakis.

8Hada gidida eeqa xoossata bolla zempeysati, new de7iya banta ammanetetha aggoosona.

9Shin taani galata mazmure new yarshana. Ta qangidabaaka new gathana. Ayis giiko, atotethay Xoossafe” yaagis.

10Hessafe guye, Goday moluwa kiittis. Moloy Yoonasa mela biitta bolla cooyis.

← Chapter 1 Jump to: Chapter 3 →