1 Corinthians 15

Arabic Bible Morocco Version - 2012 (الترجمة المغربية القياسية)

1الْفَصْلْ خْمْسْطَاشْ وْرَانِي كَنْفَكّْرْكُمْ آ الْخُوتْ بْالْإِنْجِيلْ اللِّي خَبّْرْتْكُمْ بِيهْ وْقْبَلْتُوهْ وْمَازَالْ تَابْتِينْ فِيهْ،

2وْبِيهْ غَتْنْجَاوْ إِلَا بْقِيتُو تَابْتِينْ فْالْكْلَامْ اللِّي خَبّْرْتْكُمْ بِيهْ، مْنْ غِيرْ إِلَا كْنْتُو آمْنْتُو بْلَا فَايْدَة.

3رَانِي وَصّْلْتْ لِيكُمْ فْاللّْوّْلْ دَاكْشِّي اللِّي قْبَلْتُه حْتَّى أَنَا، بْلِّي الْمَسِيحْ مَاتْ عْلَى وْدّْ دْنُوبْنَا كِيفْ مْكْتُوبْ فْكْتَابْ اللَّهْ،

4وْتّْدْفَنْ، وْفْالنّْهَارْ التَّالْتْ تّْبْعَتْ مْنْ الْمُوتْ كِيفْ مْكْتُوبْ فْكْتَابْ اللَّهْ.

5وْبَانْ لْصَفَا وْمْنْ بَعْدْ لْلتّْلَامْدْ بْطْنَاشْ،

6وْمْنْ بَعْدْ بَانْ لْكْتَرْ مْنْ خَمْسْمِيَّةْ خُو فْمَرَّة وَحْدَة، بْزَّافْ مْنّْهُمْ بَاقْيِينْ حَيِّينْ وَلَكِنْ شِي وْحْدِينْ مْنّْهُمْ مَاتُو.

7وْمْنْ بَعْدْ بَانْ لْيَعْقُوبْ، وْمْنْ بَعْدْ لْلرُّسُلْ كُلّْهُمْ.

8وْفْاللّْخْرْ مْنْ بَعْدْ كُلّْشِي، بَانْ لِيَّ حْتَّى أَنَا، بْحَالْ إِلَا تّْوْلَدْتْ قْبَلْ مْنْ الْوَقْتْ.

9حِيتْ شَانِي صْغَرْ مْنْ شَانْ الرُّسُلْ وْمَا نْسْتَاهْلْشْ نْتّْسَمَّى رَسُولْ، عْلَاحْقَّاشْ كْنْتْ كَنْتّْعَدَّى عْلَى كْنِيسْةْ اللَّهْ.

10وَلَكِنْ بْالنِّعْمَة دْ اللَّهْ وْلِّيتْ فْهَادْشِّي اللِّي أَنَا فِيهْ دَابَا، وْالنِّعْمَة دْيَالُه اللِّي تّْعْطَاتْ لِيَّ مَا كَانْتْشْ بَاطْلْ، عْلَاحْقَّاشْ ضْرَبْتْ تَمَارَة كْتَرْ مْنّْهُمْ كَامْلِينْ. مَاشِي أَنَا اللِّي دْرْتْ هَادْشِّي، وَلَكِنْ نِعْمَةْ اللَّهْ هِيَ اللِّي كَتْخْدَمْ فِيَّ.

11وْسْوَا أَنَا وْلَا هُمَ، رَاهْ هَكَّا كَنْخَبّْرُو بْالْبْشَارَة وْهَكَّا آمْنْتُو.

12وْإِلَا كَانْ الْمَسِيحْ اللِّي كَنْخَبّْرُو بِيهْ تّْبْعَتْ مْنْ الْمُوتْ، كِيفَاشْ شِي وْحْدِينْ مْنّْكُمْ كَيْݣُولُو: مَا كَايْنْشْ الْبَعْتْ مْنْ الْمُوتْ؟

13وْإِلَا الْبَعْتْ مْنْ الْمُوتْ مَا كَايْنْشْ، رَاهْ حْتَّى الْمَسِيحْ مَا تّْبْعَتْشْ مْنْ الْمُوتْ.

14وْإِلَا مَا كَانْشْ الْمَسِيحْ تّْبْعَتْ مْنْ الْمُوتْ، رَاهْ حْتَّى التّْبْشِيرْ دْيَالْنَا بَاطْلْ، وْحْتَّى إِيمَانْكُمْ بَاطْلْ.

15وْحْتَّى حْنَا غَنْكُونُو شْهُودْ دْ الزُّورْ عْلَى اللَّهْ، عْلَاحْقَّاشْ شْهَدْنَا عْلَى اللَّهْ بْلِّي بْعَتْ الْمَسِيحْ مْنْ الْمُوتْ اللِّي هُوَ مَا بْعْتُوشْ، إِلَا مَا كَانُوشْ الْمُوتَى كَيْتّْبَعْتُو مْنْ الْمُوتْ،

16حِيتْ إِلَا مَا كَانُوشْ الْمُوتَى كَيْتّْبَعْتُو مْنْ الْمُوتْ، رَاهْ حْتَّى الْمَسِيحْ مَا غَيْكُونْشْ تّْبْعَتْ مْنْ الْمُوتْ.

17وْإِلَا مَا تّْبْعَتْشْ الْمَسِيحْ، رَاهْ إِيمَانْكُمْ بَاطْلْ، وْرَاكُمْ بَاقْيِينْ فْدْنُوبْكُمْ.

18وْعْلَى هَادْ الْحْسَابْ حْتَّى هَادُوكْ اللِّي مَاتُو وْهُمَ مُومْنِينْ بْالْمَسِيحْ تّْهَلْكُو!

19وْكُونْ كَانْ عَنْدْنَا الرّْجَا فْالْمَسِيحْ غِيرْ فْهَادْ الْحَيَاةْ، كُونْ رَاهْ حْنَا مْتْعُوسِينْ كْتَرْ مْنْ ݣَاعْ النَّاسْ.

20وَلَكِنْ فْالْحَقِيقَة، الْمَسِيحْ تّْبْعَتْ مْنْ بِينْ الْمُوتَى، وْهُوَ الْبْكَرْ بِينْ هَادُوكْ اللِّي مَاتُو.

21وْحِيتْ بْسْبَابْ إِنْسَانْ جَاتْ الْمُوتْ، هَكَّا حْتَّى الْبَعْتْ مْنْ الْمُوتْ جَا بْسْبَابْ إِنْسَانْ.

22عْلَاحْقَّاشْ كِمَا غَيْمُوتْ كُلّْشِي فْآدَمْ، هَكَّا غَيْحْيَا كُلّْشِي فْالْمَسِيحْ،

23وَلَكِنْ كُلّْ وَاحْدْ فْالْمَرْتَبَة دْيَالُه: الْمَسِيحْ هُوَ اللّْوّْلْ، وْمْنْ بَعْدْ الْمُومْنِينْ بِيهْ مْلِّي غَيْرْجَعْ.

24وْمْنْ بَعْدْ هَادْشِّي غَيْجِي يُومْ الْآخِرَة، مْلِّي غَيْرَدّْ الْمَسِيحْ الْمُلْكْ لْلَّهْ الْآبْ، بَعْدْمَا يْغْلَبْ ݣَاعْ الرُّؤَسَا، وْݣَاعْ السُّلُطَاتْ، وْݣَاعْ الْقُوَّاتْ.

25حِيتْ خَاصّْ الْمَسِيحْ يْمْلَكْ حْتَّى يْدِيرْ اللَّهْ عْدْيَانُه كُلّْهُمْ تَحْتْ رْجْلِيهْ.

26وْالْعْدُو اللّْخْرَانِي اللِّي غَيْتّْغْلَبْ هُوَ الْمُوتْ.

27حِيتْ كْتَابْ اللَّهْ كَيْݣُولْ: «اللَّهْ مْلَّكْ كُلّْشِي تَحْتْ رْجْلِيهْ». وْمْلِّي كَيْݣُولْ: «مْلَّكْ كُلّْشِي»، رَاهْ كَيْبَانْ بْلِّي كْلْمَةْ \كُلّْشِي\ مَا دَاخَلْشْ فِيهَا اللَّهْ اللِّي مْلَّكْ الْمَسِيحْ عْلَى كُلّْشِي.

28وَلَكِنْ مْلِّي غَيْكُونْ كُلّْشِي تَحْتْ رْجْلِيهْ، دِيكْ السَّاعَة الْوَلْدْ بْرَاسُه غَيْكُونْ خَاضْعْ لْلَّهْ اللِّي مَلّْكُه عْلَى كُلّْشِي، بَاشْ يْكُونْ اللَّهْ هُوَ اللِّي غَيْمْلَكْ عْلَى كُلّْشِي.

29وْإِلَا كَانُو الْمُوتَى مَا كَيْتّْبَعْتُوشْ مْنْ الْمُوتْ، آشْ مْنْ فَايْدَة عَنْدْ هَادُوكْ اللِّي كَيْتّْعَمّْدُو عْلَى وْدّْ الْمُوتَى؟ وْعْلَاشْ كَيْتّْعَمّْدُو عْلَى وْدّْهُمْ؟

30وْعْلَاشْ كَنْخَاطْرُو حْنَا بْحْيَاتْنَا كُلّْ سَاعَة؟

31رَاهْ كُلَّ نْهَارْ كَنْشُوفْ الْمُوتْ، وْأَنَا كَنْݣُولْ هَادْشِّي آ الْخُوتْ، حِيتْ كَنْفْتَخْرْ بِيكُمْ فْالْمَسِيحْ يَسُوعْ رَبّْنَا.

32وْإِلَا أَنَا غِيرْ بْنَادْمْ وْتّْحَارْبْتْ مْعَ الْوْحُوشْ اللِّي فْأَفَسُسْ، آشْ مْنْ فَايْدَة عَنْدِي؟ وْإِلَا الْمُوتَى مَا كَيْتّْبَعْتُوشْ، خَلِّيوْنَا نَاكْلُو وْنْشَرْبُو حِيتْ غْدَّا غَنْمُوتُو.

33مَا تْغَلْطُوشْ: «الْعْشْرَة الْفَاسْدَة كَتْفْسَدْ التَّرْبِيَّة الْمْزْيَانَة».

34رْجْعُو لْلرّْزَانَة دْيَالْكُمْ وْمَا تْدَنْبُوشْ، حِيتْ كَايْنِينْ شِي وْحْدِينْ مَا كَيْعَرْفُوشْ اللَّهْ. كَنْݣُولْ لِيكُمْ هَادْشِّي بَاشْ نْحَشّْمْكُمْ.

35وَلَكِنْ غَيْسْوّْلْ شِي حَدّْ: «كِيفَاشْ غَيْتّْبَعْتُو الْمُوتَى؟ وْبْآشْ مْنْ دَاتْ غَيْرْجْعُو؟».

36آ الْحْمَقْ! رَاهْ الزّْرِّيعَة اللِّي كَتْزْرَعْهَا مَا غَتْحْيَاشْ إِلَا مَا مَاتْتْشْ.

37وْرَاهْ دَاكْشِّي اللِّي كَتْزَرْعُه مَاشِي هُوَ النّْبْتَة اللِّي غَتْطْلَعْ مْنْ بَعْدْ، وَلَكِنْ هُوَ الزّْرِّيعَة اللِّي تْقْدَرْ تْكُونْ دْيَالْ الْݣْمْحْ وْلَا شِي زْرِّيعَة خْرَى،

38وْاللَّهْ غَيْعْطِيهَا الدَّاتْ اللِّي بْغَا هُوَ، وْكُلّْ زْرِّيعَة غَيْعْطِيهَا دَاتْ خَاصَّة بِيهَا.

39رَاهْ حْتَّى دَاتْ مَا كَتْشْبَهْ لْدَاتْ خْرَى، الدَّاتْ دْيَالْ بْنَادْمْ بُوحْدْهَا، وْالدَّاتْ دْيَالْ الْبْهَايْمْ بُوحْدْهَا، وْالدَّاتْ دْيَالْ الطّْيُورْ بُوحْدْهَا، وْالدَّاتْ دْيَالْ الْحُوتْ بُوحْدْهَا.

40وْكَايْنَة الدَّاتْ دْيَالْ السّْمَا وْالدَّاتْ دْيَالْ الْأَرْضْ، وَلَكِنْ الزِّينْ دْيَالْ السّْمَا بُوحْدُه، وْالزِّينْ دْيَالْ الْأَرْضْ بُوحْدُه.

41الزِّينْ دْيَالْ الشّْمْسْ بُوحْدُه، وْالزِّينْ دْيَالْ الْقَمَرْ بُوحْدُه، وْالزِّينْ دْيَالْ النّْجُومْ بُوحْدُه، وْكُلّْ نْجْمَة زِينْهَا مْخْتَلْفْ عْلَى لْخْرَى.

42وْهَكَّا حْتَّى فْالْبَعْتْ دْيَالْ الْمُوتَى: الدَّاتْ كَتّْزْرَعْ مْيّْتَة، وْمْنْ بَعْدْ كَتّْبْعَتْ حَيَّة.

43كَتّْزْرَعْ بْلَا قِيمَة وْكَتّْبْعَتْ فْالْعَزّْ. كَتّْزْرَعْ ضْعِيفَة وْكَتّْبْعَتْ قْوِيَّة.

44كَتّْزْرَعْ دَاتْ طَبِيعِيَّة وْكَتّْبْعَتْ دَاتْ رُوحِيَّة، وْكِمَا كَايْنَة دَاتْ طَبِيعِيَّة رَاهْ كَايْنَة دَاتْ رُوحِيَّة.

45وْهَكَّا كَيْݣُولْ حْتَّى كْتَابْ اللَّهْ: «وْلَّى آدَمْ، بْنَادْمْ اللّْوّْلْ، دَاتْ حَيَّة». وْآدَمْ اللّْخْرْ رُوحْ كَيْعْطِي الْحَيَاةْ.

46فْاللّْوّْلْ مَا كَانْشْ بْنَادْمْ الرُّوحِي، وَلَكِنْ كَانْ بْنَادْمْ الْأَرْضِي وْمْنْ بَعْدْ جَا الرُّوحِي.

47بْنَادْمْ اللّْوّْلْ تّْصْنَعْ مْنْ تْرَابْ الْأَرْضْ، وْبْنَادْمْ التَّانِي جَا مْنْ السّْمَا.

48كِمَا بْنَادْمْ اللِّي تّْصْنَعْ مْنْ التّْرَابْ هَكَّا حْتَّى اللِّي هُمَ مْنْ التّْرَابْ، وْكِمَا بْنَادْمْ اللِّي جَا مْنْ السّْمَا هَكَّا حْتَّى اللِّي هُمَ مْنْ السّْمَا.

49وْكِمَا كْنَّا عْلَى صُورْةْ بْنَادْمْ اللِّي تّْصْنَعْ مْنْ التّْرَابْ، هَكَّا غَنْكُونُو حْتَّى عْلَى صُورْةْ بْنَادْمْ اللِّي جَا مْنْ السّْمَا.

50رَانِي نْݣُولْ آ الْخُوتْ بْلِّي الدَّاتْ اللِّي مْنْ اللّْحَمْ وْالدّْمْ مَا يْمْكَنْشْ تْوَرْتْ مَمْلَكَةْ اللَّهْ، وْاللِّي غَيْفْنَى مَا يْمْكَنْشْ يْوْرَتْ اللِّي مَا غَيْفْنَاشْ.

51هَا هُوَ وَاحْدْ السِّرّْ غَنْݣُولُه لِيكُمْ: رَاهْ مَا غَنْمُوتُوشْ كُلّْنَا، وَلَكِنْ كُلّْنَا غَنْتّْبَدّْلُو،

52وْدْغْيَا فْرَمْشَةْ عِينْ، مْلِّي غَيْتّْسْمَعْ الْبُوقْ اللّْخْرْ، حِيتْ غَيْتّْنْفَخْ فْالْبُوقْ، غَيْتّْبَعْتُو الْمُوتَى حَيِّينْ وْحْنَا غَنْتّْبَدّْلُو.

53حِيتْ لَابْدّْ تْلْبَسْ الدَّاتْ الْفَانْيَة الدَّاتْ اللِّي مَا غَتْفْنَاشْ، وْتْلْبَسْ الدَّاتْ الْمْيّْتَة الدَّاتْ اللِّي مَا غَتْمُوتْشْ.

54وْمْلِّي غَتْلْبَسْ الدَّاتْ الْفَانْيَة الدَّاتْ اللِّي مَا غَتْفْنَاشْ، وْتْلْبَسْ الدَّاتْ الْمْيّْتَة الدَّاتْ اللِّي مَا غَتْمُوتْشْ، دِيكْ السَّاعَة غَيْكْمَلْ الْكْلَامْ اللِّي جَا فْكْتَابْ اللَّهْ: «تّْهَلْكَاتْ الْمُوتْ وْكْمَلْ النّْصَرْ».

55فِينْ هِيَ شُوكْتْكْ آ الْمُوتْ؟ وْفِينْ هُوَ النّْصَرْ دْيَالْكْ؟

56رَاهْ شُوكْةْ الْمُوتْ هِيَ الدّْنُوبْ، وْالْقُوَّة دْ الدّْنُوبْ هِيَ الشّْرَعْ.

57وَلَكِنْ كَنْشَكْرُو اللَّهْ اللِّي عْطَانَا النّْصَرْ بْرَبّْنَا يَسُوعْ الْمَسِيحْ.

58إِيوَا آ خُوتِي الْعْزَازْ، كُونُو تَابْتِينْ وْمَا تّْزَعْزْعُوشْ، كَتّْرُو فْخْدْمَةْ الرَّبّْ فْكُلّْ وَقْتْ، وْرَاكُمْ كَتْعَرْفُو بْلِّي تَمَارَة دْيَالْكُمْ مَاشِي بَاطْلَة فْالرَّبّْ.

← Chapter 14 Jump to: Chapter 16 →