Acts 20

Arabic Bible Morocco Version - 2012 (الترجمة المغربية القياسية)

← Chapter 19 Jump to: Chapter 21 →

1الْفَصْلْ عْشْرِينْ وْمْلِّي تّْهَدّْنَاتْ الْفُوضَى فْأَفَسُسْ، جْمَعْ بُولُسْ التّْلَامْدْ وْشَجّْعْهُمْ، وْمْنْ بَعْدْ تّْوَادْعْ مْعَاهُمْ وْسَافْرْ لْمَكِدُونِيَة.

2وْبْدَا كَيْتّْنَقّْلْ فْدُوكْ الجّْوَايْهْ كُلّْهُمْ، كَيْشَجّْعْ الْمُومْنِينْ بْكْلَامْ كْتِيرْ، حْتَّى وْصَلْ لْلْيُونَانْ.

3وْݣْلَسْ تْمَّ تْلْتْ شْهُورْ. وْمْلِّي بْدَا كَيْوَجّْدْ بَاشْ يْسَافْرْ فْالْبْحَرْ لْسُورِيَا، تَّافْقُو لِيهُودْ بَاشْ يْقْتْلُوهْ، وْبَانْ لِيهْ يْرْجَعْ عْلَى طْرِيقْ مَكِدُونِيَة.

4وْمْشَى مْعَاهْ سُوبَاتَرُسْ بْنْ بِرُّسْ مْنْ بِيرِيَّة، وْأَرِسْتَرْخُسْ وْسَكُونْدُسْ مْنْ تْسَالُونِيكِي، وْغَايُوسْ مْنْ دَرْبَة، وْتِيمُوتَاوُسْ، وْتِيخِيكُسْ وْتْرُوفِيمُسْ اللِّي بْجُوجْ مْنْ آسْيَا.

5وْسْبْقُونَا لْتَرْوَاسْ وْتّْسْنَّاوْنَا تْمَّ.

6أَمَّا حْنَا مْنْ بَعْدْ عِيدْ الْخُبْزْ الْفْطِيرْ سَافْرْنَا فْالْبْحَرْ مْنْ فِيلِبِّي، وْلْحَقْنَا عْلِيهُمْ مْنْ بَعْدْ خَمْسْ يَّامْ لْتَرْوَاسْ وْݣْلَسْنَا فِيهَا سْبَعْ يَّامْ.

7وْفْالنّْهَارْ اللّْوّْلْ دْ السِّيمَانَة، مْلِّي كْنَّا مْجْمُوعِينْ بَاشْ نْتّْشَارْكُو فْالْعْشَا دْيَالْ الرَّبّْ، بْدَا بُولُسْ اللِّي كَانْ بَاغِي يْسَافْرْ الْغَدّْ لِيهْ كَيْتّْكَلّْمْ مْعَ الْحَاضْرِينْ، وْطَوّْلْ فْالْكْلَامْ حْتَّى لْنَصّْ اللِّيلْ.

8وْكَانْ فْالْبِيتْ الْفُوقَانِي فِينْ تّْجْمَعْنَا، بْزَّافْ دْيَالْ الْقْنَادْلْ.

9وْكَانْ تْمَّ وَاحْدْ الشَّابْ سْمِيتُه أَفْتِيخُوسْ ݣَالْسْ حْدَا الشَّرْجَمْ، وْبْدَا كَيْدِّيهْ النّْعَاسْ. وْمْلِّي طَوّْلْ بُولُسْ فْكْلَامُه، غْلَبْ عْلَى الشَّابْ النّْعَاسْ وْطَاحْ مْنْ الطَّبْقَة التَّالْتَة لْلْتَحْتْ. وْهْزُّوهْ مْيّْتْ.

10وْنْزَلْ بُولُسْ وْتّْحْنَى عْلَى الشَّابْ وْخْدَاهْ بِينْ دْرَاعُه وْݣَالْ لِيهُمْ: «مَا تّْقَلّْقُوشْ، رَاهْ حَيّْ».

11وْمْنْ بَعْدْ طْلَعْ بُولُسْ وْقَسّْمْ الْخُبْزْ وْكْلَا. وْتّْكَلّْمْ مْعَاهُمْ بْزَّافْ حْتَّى لْلْفْجَرْ وْمْنْ بَعْدْ مْشَى.

12وْدَّاوْ الشَّابْ حَيّْ لْدَارُه، وْتْشَجّْعُو بْزَّافْ.

13وْرْكَبْنَا فْالسّْفِينَة قْبَلْ مْنْ بُولُسْ بَاشْ نْمْشِيوْ لْأَسُّوسْ، نَاوْيِينْ نَاخْدُوهْ مْعَانَا مْنْ تْمَّ، حِيتْ هُوَ بْغَا يْمْشِي لِيهَا فْالْبْرّْ.

14وْمْلِّي لْحَقْ عْلِينَا لْأَسُّوسْ، رَكّْبْنَاهْ فْالسّْفِينَة وْمْشِينَا لْمِيتِيلِينِي.

15وْمْنْ تْمَّ سَافْرْنَا فْالْبْحَرْ وْوْصَلْنَا الْغَدّْ لِيهْ لْجِهْةْ خِيُوسْ. وْالْغَدْ لِيهْ دْزْنَا حْدَا سَامُوسْ، وْفْالنّْهَارْ اللِّي مْنْ بَعْدُه وْصَلْنَا لْمِيلِيتُسْ،

16حِيتْ بُولُسْ قَرّْرْ بَاشْ مَا يْدُوزْشْ عْلَى أَفَسُسْ فْالسّْفَرْ دْيَالُه بَاشْ مَا يْتّْعَطّْلْشْ فْبْلَادْ آسْيَا. عْلَاحْقَّاشْ كَانْ بَاغِي يْزْرَبْ بَاشْ يْوْصَلْ دْغْيَا لْأُورْشَلِيمْ إِلَا قْدَرْ فْيُومْ الْخَمْسِينْ.

17وْمْنْ مِيلِيتُسْ صِيفْطْ بُولُسْ لْشْيُوخْ كْنِيسْةْ أَفَسُسْ بَاشْ يْجِيوْ.

18وْمْلِّي جَاوْ لْعَنْدُه، ݣَالْ لِيهُمْ: «رَاكُمْ كَتْعَرْفُو كِيفَاشْ كْنْتْ مْعَاكُمْ هَادْ الْمُدَّة كُلّْهَا، مْنْ نْهَارْ حَطِّيتْ رْجْلِي فْبْلَادْ آسْيَا.

19وْكْنْتْ كَنْخْدَمْ الرَّبّْ وْأَنَا مْتْوَاضْعْ وْكَنْبْكِي بْدْمُوعْ كْتِيرَة، وْقَاسِيتْ الْمْحَايْنْ بْفْعَايْلْ لِيهُودْ.

20وْمَا قَصّْرْتْ حْتَّى فْشِي حَاجَة اللِّي يْمْكَنْ لِيهَا تْنْفَعْكُمْ، وَلَكِنْ كْنْتْ كَنْبَيّْنْ لِيكُمْ وْكَنْعَلّْمْكُمْ قُدَّامْ النَّاسْ وْمْنْ دَارْ لْدَارْ.

21وْطْلَبْتْ مْنْ لِيهُودْ وْالْيُونَانِيِّينْ بَاشْ يْتُوبُو وْيْرْجْعُو لْلَّهْ وْيْآمْنُو بْرَبّْنَا يَسُوعْ.

22وْأَنَا دَابَا غَادِي لْأُورْشَلِيمْ كِمَا آمْرْنِي الرُّوحْ الْقُدُسْ، وْمَا عَارْفْشْ أَشْنُو غَيْطْرَا لِيَّ تْمَّ.

23وَاخَّا الرُّوحْ الْقُدُسْ كَانْ كَيْخَبّْرْنِي فْكُلّْ مْدِينَة بْلِّي الْحَبْسْ وْالْمْصَايْبْ كَيْتّْسْنَّاوْنِي.

24وَلَكِنْ رَاهْ مَا كَنْدِيرْشْ حْسَابْ لْحْيَاتِي وْمَا عَنْدِي لِيهَا قِيمَة، مَا حَدّْنِي كَنْدِيرْ جْهْدِي بَاشْ نْكَمّْلْ خْدَمْتِي وْالْخْدْمَة اللِّي خْدِيتْهَا مْنْ الرَّبّْ يَسُوعْ بَاشْ نْخَبّْرْ النَّاسْ بْالْإِنْجِيلْ دْيَالْ نِعْمَةْ اللَّهْ.

25وْدَابَا أَنَا عَارْفْ بْلِّي مَا غَادِيشْ تْشُوفُونِي مَرَّة خْرَى، نْتُمَ اللِّي ضْرْتْ بِينَاتْكُمْ كُلّْكُمْ كَنْخَبّْرْ بْمَمْلَكَةْ اللَّهْ.

26عْلَى هَادْشِّي رَانِي كَنْشْهَدْ قُدَّامْكُمْ الْيُومْ بْلِّي رَانِي بَارِي مْنْ دْمّْكُمْ كُلّْكُمْ،

27حِيتْ مَا خَلِّيتْ حْتَّى شِي حَاجَة مَا عَلّْمْتْهَاشْ لِيكُمْ مْنْ مُرَادْ اللَّهْ كُلُّه.

28إِيوَا دَابَا رْدُّو الْبَالْ لْرَاسْكُمْ وْلْݣَاعْ النَّاسْ اللِّي دَارْكُمْ الرُّوحْ الْقُدُسْ مْسْؤُولِينْ عْلِيهُمْ، بَاشْ تْقَابْلُو كْنِيسْةْ اللَّهْ اللِّي شْرَاهَا بْالدّْمْ دْيَالُه.

29وْأَنَا عَارْفْ بْلِّي شِي دْيَابْ كَيْخَطْفُو، غَادِي يْدَخْلُو وَسْطْكُمْ مْنْ بَعْدْمَا نْرْحَلْ وْمَا غَادِيشْ يْحَنُّو فْجْمَاعْةْ الْمُومْنِينْ.

30وْمْنْ وَسْطْ مْنّْكُمْ نْتُمَ غَادِي يْنُوضُو شِي وْحْدِينْ وْيْنَطْقُو بْالْكْدُوبْ بَاشْ يْخَرّْجُو التّْلَامْدْ عْلَى الطّْرِيقْ وْيْجَرُّوهُمْ مُورَاهُمْ.

31عْلَى هَادْشِّي خَاصّْكُمْ تْكُونُو عْلَى بَالْ، وْنْتُمَ كَتّْفَكّْرُو بْلِّي تْلْتْ سْنِينْ هَادِي وْأَنَا كَنْوَصِّي كُلّْ وَاحْدْ مْنّْكُمْ لِيلْ وْنْهَارْ بْالدّْمُوعْ فْعِينِيَّ.

32وْدَابَا آ خُوتِي غَادِي نْخَلِّيكُمْ فْيْدِّينْ اللَّهْ وْكْلَامْ النِّعْمَة دْيَالُه اللِّي قَادْرْ يْبْنِيكُمْ وْيْخَلِّيكُمْ تْوَرْتُو مْعَ ݣَاعْ النَّاسْ الْمْقَدّْسِينْ.

33عَمّْرْنِي مَا طْمَعْتْ فْفْلُوسْ شِي وَاحْدْ وَلَا فْالدّْهَبْ دْيَالُه وَلَا فْحْوَايْجُه،

34نْتُمَ كَتْعَرْفُو بْلِّي بْيْدِّيَّ هَادُو خْدَمْتْ بَاشْ نْصْرَفْ عْلَى رَاسِي وْعْلَى اللِّي مْعَايَ.

35وْوْرِّيتْكُمْ فْكُلّْ حَاجَة كِيفَاشْ خَاصّْنَا نْخَدْمُو وْنْدِيرُو كُلّْ مَا فْجَهْدْنَا بَاشْ نْعَاوْنُو النَّاسْ الْفُقَرَا، وْنْتّْفَكّْرُو كْلَامْ الرَّبّْ يَسُوعْ مْلِّي ݣَالْ: الْوَاحْدْ كَيْتّْبَارْكْ إِلَا عْطَى كْتَرْ مْنْ إِلَا خْدَا».

36وْمْلِّي كَمّْلْ بُولُسْ كْلَامُه، سْجَدْ مْعَاهُمْ كُلّْهُمْ وْصْلَّى.

37وْبْكَاوْ كَامْلِينْ بْزَّافْ وْعَنّْقُو بُولُسْ وْبَاسُوهْ.

38وْاللِّي حْزَّنْهُمْ بْزَّافْ هُوَ الْكْلَامْ اللِّي ݣَالْ لِيهُمْ: «مَا غَادِيشْ تْشُوفُونِي مَرَّة خْرَى». وْمْنْ بَعْدْ وَصّْلُوهْ لْلسّْفِينَة.

← Chapter 19 Jump to: Chapter 21 →