Acts 17

Arabic TU2022 (العهد الجديد بالدارجة التونسية)

← Chapter 16 Jump to: Chapter 18 →

1وبَعْدْمَا تْعَدَّاوْ عْلَى مُدُنْ أَمْفِيۑُولِيسْ وأَۑُولُونِيَّة، وُصْلُوا لِمْدِينِةْ تْسَالُونِيكِي. وكَانْ فِيهَا مَعْبِدْ لِلْيْهُودْ.

2وكِيمَا عَادْتُو، دْخَلْ بُولِسْ لِلمَعْبِدْ وقْعَدْ يْنَاقِشْ فِيهُمْ مِالكْتُبْ المُقَدْسَةْ لْمُدِّةْ ثْلَاثَة أَسْبَاتْ.

3وفَسْرِلْهُمْ ووَرَّاهُمْ الِّي المَسِيحْ كَانْ لَازْمُو يْمُوتْ ويْقُومْ مِنْ بِينْ المُوتَى، وقَالِلْهُمْ: «يَسُوعْ الِّي آنَا تَوَّا قَاعِدْ نْبَشِّرْ فِيكُمْ بِيهْ هُوَّ المَسِيحْ».

4يَاخِي اقْتَنْعُوا جْمَاعَة مِنْهُمْ ووَلَّاوْ مْعَ بُولِسْ وسِيلَا، ومْعَاهُمْ بَرْشَة يُونَانِيِّينْ مِلِّي يِعْبْدُوا فِي رَبِّي، وبَرْشَة نْسَاء مِنْ أَعْيَانْ البْلَادْ.

5يَاخِي اليْهُودْ كْلَاتْهُمْ الغِيرَة، وَلَّاوْ لَمُّوا نَاسْ أَشْرَارْ مِنْ وْلَادْ الشَّارِعْ وكَوْنُوا عِصَابَة وعَمْلُوا خُوضَة فِي البْلَادْ، ومْبَعِّدْ هِجْمُوا عْلَى دَارْ يَاسُونْ، يْلَوْجُوا عْلَى بُولِسْ وسِيلَا بَاشْ يْخَرْجُوهُمْ لِلشَّعْبْ.

6وكِي مَا لْقَاوْهُمْشْ جَابُوا يَاسُونْ وجْمَاعَة مِالإِخْوَة وهَزُّوهُمْ لْحُكَّامْ المْدِينَة، وهُومَا يْصِيحُوا: «النَّاسْ هَاذُمْ هُومَا الِّي قِلْبُوا الدِّنْيَا الكُلْ، وهَاهُمْ جَاوْ لِمْدِينِتْنَا أَحْنَا زَادَا.

7ويَاسُونْ مْضَيِّفْهُمْ فِي دَارُو. والكُلْهُمْ قَاعْدِينْ يْخَالْفُوا فِي أَوَامِرْ القَيْصِرْ، ويْقُولُوا الِّي فَمَّة مَلِكْ آخِرْ إِسْمُو يَسُوعْ».

8يَاخِي تْقَلْقُوا النَّاسْ والحُكَّامْ كِي سَمْعُوا الكْلَامْ هَاذَا.

9ومَا سَيْبُوا يَاسُونْ وبْقِيِّة الإِخْوَة كَانْ مَا خْذَاوْ كَفَالَة.

10وبِالوَقْتْ، دُوبْ مَا طَاحْ اللِّيلْ، بَعْثُوا الإِخْوَة بُولِسْ وسِيلَا لِمْدِينِةْ بِيرِيَّة. وَقْتِلِّي وُصْلُوا، مْشَاوْ لْمَعْبِدْ اليْهُودْ الِّي فِيهَا.

11ويْهُودْ بِيرِيَّة كَانُوا مِتْجَاوْبِينْ أَكْثِرْ مِنْ يْهُودْ تْسَالُونِيكِي، وقِبْلُوا كِلْمِةْ الرَّبْ بْحَمَاسْ، وكَانُوا يَقْرَاوْ فِي الكْتُبْ المُقَدْسَة كُلْ يُومْ بَاشْ يِتْأَكْدُوا إِنُّو التَّعْلِيمْ الِّي كَانُوا يِسْمْعُوا فِيهْ صْحِيحْ.

12هَاذَاكَا عْلَاشْ أَمْنُوا بَرْشَة يْهُودْ، وبَرْشَة يُونَانِيِّينْ، مِنْهُمْ نْسَاء مِنْ أَعْيَانْ البْلَادْ ومِنْهُمْ رْجَالْ.

13وكِي عَرْفُوا اليْهُودْ الِّي فِي تْسَالُونِيكِي الِّي بُولِسْ يْبَشِّرْ بْكِلْمِةْ اللَّهْ فِي بِيرِيَّة، خَلْطُوا وْرَاهْ، وبْدَاوْ يْهَيْجُوا عْلِيهْ فِي النَّاسْ.

14يَاخِي بِالوَقْتْ بَعْثُوا الإِخْوَة بُولِسْ لِلبْحَرْ بَاشْ يْسَافِرْ، وبْقَاوْ سِيلَا وتِيمُوثَاوُسْ غَادِي.

15والمُؤْمْنِينْ الِّي مْشَاوْ مْعَ بُولِسْ وَصْلُوهْ لْأَثِينَا، ورَجْعُوا بَعْدْمَا وَصَّاهُمْ بُولِسْ بَاشْ يَبْعْثُولُو سِيلَا وتِيمُوثَاوُسْ فِي أَقْرِبْ وَقْتْ مُمْكِنْ.

16وَقْتِلِّي بُولِسْ كَانْ يِسْتَنَّى فِيهُمْ فِي أَثِينَا، شَافْ الِّي المْدِينَة مِلْيَانَة بِالأَصْنَامْ. يَاخِي تْقَلَّقْ بَرْشَة.

17وبْدَا يْنَاقِشْ فِي النَّاسْ الِّي يِعْبْدُوا رَبِّي فِي المَعْبِدْ مِاليْهُودْ وغِيرْهُمْ، ويْنَاقِشْ زَادَا فِي النَّاسْ الِّي يُعْرْضُوهْ كُلْ يُومْ فِي السُّوقْ.

18وصَارْ نِقَاشْ مْعَ الفَلَاسْفَة الأَبِيقُورِيِّينْ والرِّوَاقِيِّينْ، يَاخِي جْمَاعَة مِنْهُمْ قَالُوا: «آشْ يْحِبْ يْقُولْ هَلِّي يَحْكِي بَرْشَة؟». أُخْرِينْ قَالُوا: «ظَاهِرْ إِنُّو يَحْكِي عْلَى آلْهَة غْرِيبَة»، عْلَى خَاطِرْ بُولِسْ كَانْ يْبَشِّرْ بْيَسُوعْ والقْيَامَة مِالمُوتْ.

19يَاخِي هَزُّوهْ لْمَجْلِسْ المْدِينَة الِّي يِتْسَمَّى الأَرْيُوبَاغُوسْ وقَالُولُو: «نْحِبُّوا نَعْرْفُوا التَّعْلِيمْ الجْدِيدْ الِّي تَحْكِي عْلِيهْ.

20أَحْنَا قَاعْدِينْ نِسْمْعُوا فِي كْلَامْ غْرِيبْ، ونْحِبُّوا نَعْرْفُوا آشْ مَعْنَاهْ».

21وكَانُوا أَهْلْ أَثِينَا والبْرَايْنِيَّة السَّاكْنِينْ فِيهَا يْعَدِّيوْ مُعْظِمْ وَقْتْهُمْ يِتْنَاقْشُوا فِي الأَفْكَارْ الجْدِيدَة.

22ووْقِفْ بُولِسْ فِي وُسْطْ المَجْلِسْ وقَالْ: «يَا أَهْلْ أَثِينَا، ظَاهِرْينْ الِّي إِنْتُومَا مِدَّيْنِينْ بَرْشَة، وفِي كُلْ شَيْ.

23عْلَى خَاطِرْ وَقْتِلِّي كُنْتْ نْدُورْ فِي مْدِينِتْكُمْ ونُخْزُرْ لِلْمْعَابِدْ مْتَاعْكُمْ، لْقِيتْ مَذْبَحْ مَكْتُوبْ عْلِيهْ: "لِلإِلَاهْ المَجْهُولْ". وآنَا رَانِي قَاعِدْ نْبَشِّرْ فِيكُمْ بِالإِلَاهْ المَجْهُولْ هَاذَا الِّي تِعْبْدُوا فِيهْ مِنْ غِيرْ مَا تَعْرْفُوهْ.

24اللَّهْ الِّي خْلَقْ العَالِمْ وكُلْ مَا فِيهْ، رَبْ السْمَاء والأَرْضْ، الِّي مَا يُسْكُنْشْ فِي مَعَابِدْ بْنَاوْهَا البَشَرْ،

25مَا يِسْتْحَقِّشْ لِلنَّاسْ بَاشْ تِخْدْمُو، عْلَى خَاطْرُو هُوَّ الِّي يَعْطِيهُمْ الكُلْ الحَيَاةْ والنْفَسْ ويَعْطِيهُمْ كُلْ شَيْ.

26خْلَقْ الشُّعُوبْ الكُلْ مِنْ إِنْسَانْ وَاحِدْ، بَاشْ يُسْكْنُوا فِي الأَرْضْ الكُلْ، وحَدِدِّلْهُمْ مِنْ قَبْلْ مُدِّةْ وُجُودْهُمْ والبْلَايِصْ الِّي بِشْ يْعِيشُوا فِيهَا.

27عْلَى خَاطْرُو يْحِبْهُمْ يْلَوْجُوا عْلِيهْ، فَمَّاشْ مَا يِتَهْدَاوْ ويَلْقَاوَهْ، رَغْمِلِّي هُوَّ مُشْ بْعِيدْ عْلَى كُلْ وَاحِدْ فِينَا.

28رَانَا نَحْيَاوْ ونِتْحَرْكُوا ونِتْوِجْدُوا بِيهْ هُوَّ. وكِيمَا قَالْ وَاحِدْ مِنْ شُعَرَاءْكُمْ: "أَحْنَا زَادَا ذُرِّيتُو".

29«ومَادَامْنَا ذُرِّيِّةْ اللَّهْ، مَالَا مَا يِلْزِمْنَاشْ نْفَكْرُوا الِّي الإِلَاهْ هُوَّ صَنْبَة مِالذْهَبْ وَلَّا مِالفِضَّة وَلَّا مِالحْجَرْ يَصْنَعْهَا الإِنْسَانْ كِيفْ مَا يْحِبْ.

30وإِذَا كَانْ اللَّهْ عَدَّى أَيَّامَاتْ الجَهْلْ الِّي فَاتِتْ، رَاهُو اليُومْ يُأْمُرْ النَّاسْ الكُلْ فِي كُلْ بْلَاصَة بَاشْ يْتُوبُوا.

31عْلَى خَاطْرُو حَدِّدْ نْهَارْ بَاشْ يْحَاسِبْ فِيهْ العَالِمْ بِالعَدْلْ عْلَى يِدْ رَاجِلْ إِخْتَارُو، وبَيِّنْ لِلنَّاسْ الِّي هُوَّ إِخْتَارُو كِي قَوْمُو مِالمُوتْ».

32كِي سَمْعُوهْ يَحْكِي عَالقْيَامِة مِالمُوتْ، فَمَّة شْكُونْ مِنْهُمْ بْدَاوْ يِتْمَسْخْرُوا. آمَا فَمَّة نَاسْ أُخْرِينْ قَالُولُو: «مَذَابِينَا كَانْ تْزِيدْ تَحْكِيلْنَا عَالمَوْضُوعْ هَاذَا مَرَّة أُخْرَى».

33وَلَّى خْرَجْ بُولِسْ مِنْ بَحْذَاهُمْ.

34آمَا فَمَّة جْمَاعَة مِنْهُمْ وَلَّاوْ مْعَاهْ وأَمْنُوا، مِنْهُمْ دْيُونِيسْيُوسْ الِّي كَانْ عُضُوْ فِي مَجْلِسْ المْدِينَة، ومْرَا إِسْمْهَا دَامَارِيسْ، وبَرْشَة نَاسْ أُخْرِينْ.

← Chapter 16 Jump to: Chapter 18 →