1 John 1

Arabic Bible (Tunisian) (Tunisian Arabic Version) 2018

Jump to: Chapter 2 →

1نِكْتْبِلْكُمْ عْلَى كِلْمِةْ الحَيَاةْ الِّي هِيَ المَسِيحْ الِّي كَانْ مِنْ الأُوِّلْ الِّي سْمَعْنَاهْ وْشُفْنَاهْ بْعِينِينَا وْمَسِّينَاهْ بِيدِينَا.

2وْرَاهِي الحَيَاةْ الِّي يَعْطِيهَا المَسِيحْ ظُهْرِتْ. وْبَعْدْ مَا شُفْنَاهَا نِشْهْدُولْهَا وْقَاعْدِينْ نْقُولُولْكُمْ فِي خْبَرْ الحَيَاةْ الأَبَدِيَّة الِّي كَانِتْ عِنْدْ الآبْ وْظُهْرِتْ قُداَّمْنَا.

3وْإِحْنَا نْبَشّْرُوكُمْ بِلِّي رِينَاهْ وِسْمَعْنَاهْ بَاشْ تْشَارْكُونَا فِي الحَيَاةْ الِّي عِنْدْنَا. وْإِحْنَا رَانَا مِتْشَارْكِينْ مْعَ الآبْ وِمْعَ ابْنُو يَسُوعْ المَسِيحْ فِي الحَيَاةْ الِّي عَنْدُو.

4نِكْتْبُولْكُمْ هَاذَا الكُلْ بَاشْ تِكْمِلْ فَرْحِتْنَا.

5وْهَاذَا هُوَ الِّي سْمَعْنَاهْ مِالمَسِيحْ وِنْبَشّْرُوكُمْ بِيهْ: إِنُّو اللهْ نُورْ وْمَا فِيهِشْ ظْلاَمْ بِالكُلْ.

6كَانْ نْقُولُوا الِّي أَحْنَا مِتَّحْدِينْ مْعَاهْ آمَا بَاقِي نْعِيشُوا فِي الظْلاَمْ رَانَا قَاعْدِينْ نِكْذْبُوا وْمَانَاشْ نَعْمْلُوا فِي الصْحِيحْ.

7آمَا إِذَا كُنَّا نْعِيشُوا فِي النُّورْ كِيفْ مَا هُو فِي النُّورْ، تْكُونْ عِنْدْنَا عَلاَقَة مْعَ بْعَضْنَا وْدَمْ يَسُوعْ المَسِيحْ إِبْنْ اللهْ يْطَهِّرْنَا مِنْ ذْنُوبْنَا الكُلْ.

8وْإِذَا قُلْنَا الِّي أَحْنَا مَا عِنْدْنَاشْ ذْنُوبْ نْغَلّْطُوا فِي رْوَاحْنَا وْحَقْ اللهْ مُوشْ فِينَا.

9وْإِذَا سْتَعْرِفْنَا بِذْنُوبْنَا هُوَ أَمِينْ وْعَادِلْ بَاشْ يِغْفْرِلْنَا ذْنُوبْنَا وِيْطَهِّرْنَا مِنْ كُلْ شَرْ.

10وْكِنْقُولُوا الِّي أَحْنَا مَا عْمَلْنَاشْ ذْنُوبْ رَانَا نْكَذّْبُوا فِي رَبِّي وْكِلْمْتُو مَا تْكُونِشْ فِينَا.

Jump to: Chapter 2 →