Psalms 122

Awadhi

← Chapter 121 Jump to: Chapter 123 →

1जब लोग मोसे कहेन, “आवा, यहोवा क मन्दिर मँ चली तब मइँ बहोत खुस भएउँ।”

2हिआँ हम यरूसलेम क दुआरन पइ खड़ा अही।

3यरूसलेम नगर एक ठु संगठित नगर नाईं बनि गवा ह।

4उ उ जगहिया बा जहाँ उ परिवार समूह जात रहेन, जउन यहोवा क परिवार समूह अहइ, काहेकि इ इस्राएल क लोग दुआरा यहोवा क धन्यवाद देइ क नेम अहइ।

5इ उहइ जगहिया बा जहाँ दाऊद क परिवार क राजा लोगन आपन सिंहासन कायम किहेन। उ पचे आपन सिंहासन लोगन क निआउ करइ बरे कायम किहन।

6तू यरूसलेम मँ सान्ति हेतु बिनती करा। “अइसे लोग जउन तोहसे पिरेम राखत हीं हुआँ रच्छा मँ रहा।

7तोहरे परकोटन क भितरे सान्ति फइल जाइ, तोहरे बिसाल भवनन मँ सुरच्छा बनी रहइ।”

8मइँ पराथना करत हउँ आपन भाइयन अउ साथियन बरे कि हुवाँ सान्ति क बास होइ।

9यहोवा हमरे परमेस्सर क मन्दिर क भले बरे, मइँ पराथना करत हउँ कि इ नगर मँ भली बातन घटित होइँ।

← Chapter 121 Jump to: Chapter 123 →