1 Chronicles 20

Aymara 1997

← Chapter 19 Jump to: Chapter 21 →

1Reyinakax phanchhir urunakan nuwasirix mistupxirïna, Joab chachax soldadonakap sarañatak wakicht'äna, ukatsti amonitanakarux q'alpun tukjäna. Ukatsti Rabá markar sarasaw muyuntäna, katuntasinsti q'alpun tukjäna. Ukañkamasti Davidax Jerusalén markaruw qhiparäna.

2Uka qhipatsti Davidax Rabá markankir reyin quri pillup p'iqipat asaqäna, uka pillux suma lliphipkir qalanakanïnwa, kimsa tunka kimsan kilorakiw tupt'asïna; ukatsti Davidaruw ukampix asxatapxäna. Davidax uka markat walja jila alani yänakampi apsunirakïna,

3uka markan jilt'ir jaqinakarusti, marka anqäxar irpsusax serruchonakampi, rastrillonakampi, hachanakampiw irnaqayäna. Davidasti amonita jaqinakarux uka kipkarak lurayäna, uka qhipatsti tamanakapampix Jerusalén markaruw kutt'anxäna.

4Uka qhipatsti, Guézer chiqan filisteonakampix mä nuwasïwiw utjäna. Uka urusti, Husá chiqankir Sibecai jaqiw Sipai chacharux jiwt'ayäna, ukhamat jisk'ar tukuyasa, jupax jach'a tansa jaqinakat saraqirin wawapänwa.

5Filisteonakampi yaqha nuwasiñax utjkän ukkhaxa, Jaír chachan Elhanán yuqapax Lahmí chacharuw jiwt'ayäna, jupasti Gat chiqankir Goliat chachan jilapänwa, lanzapan lawapax mä telaran lawapjam wali jach'änwa.

6Gat chiqansti yaqha nuwasïwiw utjäna. Ukansti mä jach'a tansa jaqiw utjäna, pä tunka pusin luk'anani: sapa amparan suxta luk'anani, sapa kayunsti suxta luk'anani. Uka jaqix jach'a tansa jaqinakat saraqir wawaparakïnwa,

7ukampis Israel markatakiw sayt'asïna, ukatsti juparux Simá chachan Jonatán yuqapaw jiwayäna, Davidan jilaparu.

8Uka jach'a tansa jaqinakax Gat chiqankir Refá chachat saraqir wawanakapänwa, ukampis Davidana, jilïrinakapan jiwarayataw uñjasipxäna.

← Chapter 19 Jump to: Chapter 21 →