2 Samuel 3

Aymara 1997

← Chapter 2 Jump to: Chapter 4 →

1Saúl reyin jaqinakapampi, Davidan jaqinakapampix jaya maranakaw ch'axwankapxäna, Davidan jaqinakapax juk'at juk'at ch'amañchasïna, ukampis Saúl reyin jaqinakapax sapa kutiw aynacht'arakïna.

2Davidax Hebrón markan jakkän ukapachaw jupatak wawanakapax yurirapïna: Amnón sutinïki ukax jilïr wawänwa, Jezreelankir Ahinóam warmin wawapänwa;

3payïr wawapasti Quilab sutinïnwa, Carmel chiqan utjasir Nabal chachan ijmapäkän uka Abigail warmin wawaparakïnwa; kimsïri wawapasti Absalón satänwa, Maacá warmin wawapänwa, uka warmisti Guesur markan reyipa Talmai sat jaqin phuchhapänwa;

4pusïr wawapasti Adonías sutinïnwa, Haguit warmin wawaparakïnwa; phisqïr wawapasti Sefatías satarakïnwa, Abital warmin wawapänwa.

5Suxtïr wawapasti Itream sutinïnwa, Eglá warmin wawapa, jupasti Davidan yaqha warmipänwa. Uka yuqall wawanakasti Davidax Hebrón markan jakkän ukapachaw yuripxäna.

6Saúl reyin jaqinakapampi, Davidan jaqinakapampisti nuwasiskakïnwa, ukchañkamasti Abner chachax Saúl reyin jaqinakapxar juk'amp munañaniw tuküna.

7Saúl reyin mä uñt'atapaw utjatayna Rispá sutini, Aiá jaqin phuchhapänwa, Abnerasti uka warmimpiw sarnaqxarakitayna. Ukat Is-bóset chachax Abnerar sarakïna: —¿Kunatarak awkixan uñt'at warmipamp ikintastasti? —sasa.

8Abnerasti ukham satapat wal q'apisïna, ukat Is-bóset jaqir sarakïna: —¿Nayasti anütti, khitirutix jan kun katuqas Judá markan luqtirïñapatakisti? Nayax Saúl awkiman utapankirinakatakix taqi chuymaw taqi kuns lurta, ukhamaraki jilanakapatakisa, masinakapatakisa, jumarusti janiw Davidan amparapar katuyksmati. ¿Ukatti jichhax, mä warmimp jucha lurataxat juchañchitäta?

9¡Tatitux mutuyitpan, Davidar juramentompi arskäna uk phuqhasiñapatak jan kuns lurkä ukaxa! Tatituw jupar arsuwayi

10Saúl reyin qunuñap churañataki, ukatsti taqpach Israel markxaru, Judá uraqxar reyit utt'ayañataki, Dan sat chiqata, Beerseba sat aynach chiqakama —sasa.

11Is-bóset jaqisti ukxarux janiw mä arumpsa arskxänti, Abnerar axsaratap layku.

12Ukat Abnerax jaqinak Hebrón markar khithäna Davidar akham sañataki: “¿Khitinkis aka markaxa? Mä arust'äwi lurañäni, nayaw yanapt'äma taqpach Israel markax jumampïñapataki” sasa.

13Davidasti ukxarux sarakïnwa: “Walikiwa, ukhamax jumampi mä arust'äwi lurañäni, ukampis mä amtäwimpi: jutkät ukapachaxa, Saúl reyin Mical phuchhaparuw irpanïta” sasa.

14Ukhamarus Davidax Is-bóset jaqin ukarux jaqinak khitharakïna, akham sasa: “Mical warmixar kutt'ayxita, jupampisti filisteonakan chhuxurasiñanakapat patak lip'ichinak churasaw jaqichasta” sasa.

15Mical warmix Lais chachan Paltiel yuqapampiw jakäna, Is-bóset jaqisti jupat irparanipxañapatakiw jaqinak khithäna.

16Ukampis Paltiel jaqix warmipan qhipapat Bahurim sat chiqakamaw jacht'asis arkäna. Ukan Abnerax Paltiel jaqir säna: “¡Jan jachkxamti! ¡Utamar kuttawayxam!” sasa. Paltiel jaqisti iyawsasaw kuttawayxäna.

17Uka qhipatsti Abnerax Israelankir jilïr jaqinakampiw parläna, jupanakarusti sarakïnwa: “Walja maräxiw Davidar jumanakan reyimatak munapxatamaxa.

18¡Uka urux purinxiwa! Amtasipxam, kuntix Tatitux Davidar arskäna uka, Israel markaparux jupa tuqiw filisteonakata, taqi uñisirinakapan amparapat qhispiyani” sasa.

19Abnerasti Benjamín ayllunkir jaqinakampiw parlarakïna, ukatsti Hebronaruw Davidar yatiyir saräna, kuntix Israelampi, Benjamín ayllunkir jaqinakamp amtkatayna ukanakata.

20Jupasti pä tunk jaqimpiw Hebronarux purïna, Davidan ukaru, Davidasti Abnerampitaki, jaqinakampitakix mä jach'a manq'äwi wakicharapïna.

21Ukan Abnerax Davidar säna: —Jichhax taqpach Israel jaqinakar tantacht'ir sarxañaxawa, ukat juma, reyimpi mä arust'äwi lurapxañapataki, ukhamat juma reyix kunjämarutix munkta ukhamarjam apnaqañamataki —sasa. Davidasti Abnerarux mä sum khithanukxäna, Abnerasti k'uchikirakiw sarxäna.

22Joab chachampi, Davidan soldadonakapampix mä nuwasïwit purisinipkäna, uñisirinakapat aparanipkatayna uka walja yänakas apt'ata. Abnerax janiw Davidamp chika Hebronan jikxataskxänti, jan ukasti Davidan khithanukutax k'uchikiw jupax sarxatayna.

23Joab chachan taqpach ejercitopamp chika purxipansti, Abner jaqin reyimp jikisir jutatapa, reyin jupar sum khithanukxatap jupar yatiyapxäna.

24Ukanak ist'asinsti Joab jaqix reyin ukaruw saräna, ukat jupar sarakïna: —¿Kunatarak juma reyisti uk lurtasti? Abneran juman ukar jutkipansti, ¿kamisarak ukhamak khithanukxtasti?

25¿Janit yatktasti, Abner jaqix jumar sallqjiri, jumar uñaqiriki, ukatsti taqi kuntix juma reyix lurkta uk yatxatirik jutatapsti? —sasa.

26Joab jaqix Davidamp parlañ tukuyxasin mistunxatapatsti, Abner jaqir thaqtayiriw jaqinak khithäna, Davidar jan yatiyasaki, ukatsti uka khithanakax Sirá sat uma phuch'u chiqat Abnerar kutt'ayanipxäna.

27Abneran Hebronar puripansti, Joab jaqix markat mistuñ punkut khursa tuqiruw jupar irpäna, jupampikis parlañ munkaspa ukhama. Ukan purakat chhuqhuntasin Abnerar jiwayäna, Asael jilapar jiwayatapat phuqsusisa.

28Uka qhipatsti, Davidax uk yatisin säna: “Nayampi, markaxampix Tatitu nayraqatan janiw kuna juchanïpktsa, Ner jaqin Abner yuqapan jiwatapatxa.

29¡Taqi juchas Joab jaqin p'iqipxar puriskpan, ukhamaraki taqi wila masinakapxarusa, utapansti utjapunpan wila apa usumpi t'aqhisirixa, lepra usunisa, wixchutirisa, jan ukax jaqin jiwayatasa, manq'atjam t'aqhisirisa!” sasa.

30Ukhamaw Joab jaqimpi, Abisai jilapampix phuqsusisin Abnerar jiwayapxäna, jupanakan Asael jilapar Gabaón chiqan Abneran jiwayatap layku.

31Ukat Davidax Joab jaqimpiru, jupamp chika ukankir jaqinakampir säna: “Llakisiñat isinakam ch'iyanuqasipxam, chhankha isinakamp uchasipxam, Abneran jiwatapat jachapxam” sasa. David reyisti jiwat amaya kallirinak qhipap saräna,

32Abnerarusti Hebrón markaruw imt'xapxäna. Ukansti reyix Abneran sepulturap jak'an wali jach'atpun jachäna, taqpach markaw jupamp chik jachäna.

33Reyisti Abneran jiwatapat aka jachkañ q'uchu q'uchüna: “Abner, ¿kunatarak jumasti ukham jiwta, jan wali ñanqha jaqjamasti?

34Janiw amparanakamax chinuntatäkänti, janirakiw kayunakamas cadenampi ñach'antatäkänti. ¡Jan wali jaqinakan amparapan jiwapki, ukhamaw jiwawaytaxa!” sasa. Jaqinakasti Abneratjam jachasipkakïnwa.

35Ukatsti taqiniw Davidar jak'achasisin achikt'apxäna janïr jayp'untkipan manqt'asiñapataki, ukampis Davidax juramento luräna, akham sasa: —¡Diosax wal mutuyitpan nayatix mä t'ant'sa, jan ukax kunsa janïra inti jalantkipan mallt'ä ukapachaxa! —sasa.

36Davidan arunakap taqiniw sum amuyapxäna, ukatsti walikiw sapxarakïnwa, reyin luratanakapax jaqinakan chuymapar purt'kirïnwa.

37Ukürusti israelit jaqinakax sum amuyxäna, Abneran jiwañapatakix Davidan jan kuna juchanïtapa.

38Reyisti yanapirinakaparux sarakïnwa: —¿Amuyapxtati? Jichhürux Israel markan mä jach'a jilïri, aytat jaqiw jiwi.

39Ukat nayax Tatitun ajllita reyïkasinsa, Seruiá jaqin yuqanakapan jan wali luratanakap uñjasax t'ukhaw uñjasta. ¡Tatitux ukham ñanqha luririrux luratapatjam mutuypan! —sasa.

← Chapter 2 Jump to: Chapter 4 →