Daniel 2 — Aymara 1997

1Nabucodonosor reyix niya pä mara marka apnaqkäna ukapachaw jupax walja samkanak samkasitayna, ukham samkasitapatsti wal llakisxäna, janirakiw ikthapkänsa.

2Ukat jupax yatirinakaru, layqanakaru, taqi yatiñani jaqinakar jawsayanïna uka samkanak tuqit juparu qhanañchapxañapataki. Uka jaqinakasti reyin nayraqataparuw uñstapxäna,

3reyisti jupanakarux sänwa: —Nayax mä samka samkasta, ukat jichhax wal llakista, uka samkax kun sañsa munpacha uk yatiñ munasa —sasa.

4Uka yatiñani jaqinakasti reyirux arameo arun sapxarakïna: —¡Jach'añchatäman rey! Munañan rey, nanaka luqtirimaru samkam yatiyapxita, nanakasti samkam qhanañchapxämawa —sasa.

5Reyisti ukxarux sarakïnwa: —Nayan amtäwixax akhamawa: Janitix jumanakax uka samka amtasiyapkitäta, janitix uka samka qhanañchapkarakitätaxa, jumanakax jisk'a jisk'a tukjataw uñjasipxäta, utanakamasa t'unthapitarakïniwa.

6Ukampisa, jumanakatix uka samka amtasiyapxitäta, uka samka qhanañchapxarakitätaxa, nayax walja waxt'äwinak churapxäma, walja askinakamp katuqapxäta, jach'ar aptatäpxätawa. Ukhamasti, uka samka amtayapxita, uk qhanañchapxarakita —sasa.

7Yatiñan jaqinakasti wasitat reyir sapxäna: —Jach'a rey, uka samkam nanakar sapxita, nanakasti uka samkat qhanañchapxämawa —sasa.

8Reyisti jupanakarux sarakïnwa: —Amtäwix ist'asin jumanakax jank'akiw kuns lurañ munapxtaxa.

9Ukhamasti, janitix jumanakax samka yatiyapkitätaxa, taqi jumanakax uka pachpa mutuñ katuqapxäta, jumanakasti nayarux k'ari arunakampi sallqjañ amtapxtaxa, kunatix jan chiqapäki ukanakampi, ukhamat jan uka mutuñax jumanakxar puriñapataki. Jichhax samka amtayapxita, ukhamat nayax yatirakï uka samka qhanañchirjamäpxatamsa —sasa.

10Yatiñani jaqinakasti ukxarux sapxarakïnwa: —Janiw khitis aka uraqin utjkiti reyin mayitaparjam qhanañchirixa. Janipuniw khiti reyisa, qawqha jach'a munañanïskpasa ukham maykänti, khiti yatirirusa, layqa jaqirusa, yatiñani jaqirusa.

11Sinti ch'amapuniw juma reyin mayitamaxa, janiw khitis uka mayitamarux qhanañchkaspati, inas diosanakax qhanañchapxchispan; ¡ukampis uka diosanakax janiw jaqinak taypin jakapkiti! —sasa.

12Uk ist'asasti reyix walpun phiñasïna, ukat Babilonia uraqin utjir taqi yatiñani jaqinakar jan mayani jiwarayatäñapatak arsüna.

13Reyin arsutap yatiyatatsti, Danielampiru, jilat masinakapampir jiwarayañatakiw thaqhapxarakïna.

14Ukhamasti Danielax wali amuyumpi, wali ch'ikhi kankañampiw reyin uñjirinakapan jilïripa, Arioc jaqimpix parläna, uka Arioc jaqisti niyaw taqi yatiñani jaqinakaru jiwarayañatak wakichasiskarakïna.

15Danielasti juparux akham jiskt'äna: —¿Kunatarak reyisti uka yatiñan jaqinakar jank'ak jiwarayañatak amtisti? —sasa. Arioc jaqisti ukxat qhanañcharakïna.

16Ukat Danielax reyin ukar sarasin reyir achikt'asïna, kuntix uka samkax sañ munki uk qhanañchañatak mä qawqha pacha suyt'añapataki.

17Ukatsti Danielax jank'akiw utapar sarxäna, purisinsti taqi ukanak Ananías, Misael, Azarías masinakaparuw yatiyarakïna,

18uka jan qhanañchañjama samka tuqita alaxpach Tatitun yanapap mayipxañapataki, ukhamat jupanakax Babiloniankir yatiñan jaqinakamp chik jan jiwarayat uñjasipxañapataki.

19Uka arumpachaw Danielax uka jan qhanañchañjam samkat mä unañchäwi tuqi uñjäna, ukat jupax alaxpachankir Tatitur

20jach'añchäna akham sasa: “Tatitun sutipax wiñayatak jach'añchatäpan, yatiñasa, ch'amasa jupankiwa.

21Jupaw pachanaksa, maranaksa mayjt'ayi, jupaw reyinakar utt'ayi, juparakiw jaquqaraki. Yatiñaninakarux juk'amp yatiñ churi, ch'ikhinakarusti juk'amp ch'ikhi chuyma churaraki.

22Jupaw jamasan imantatanak qhanañchi; jupaw kunatix ch'amakankki uk uñt'i, jupampiw qhanax jaki.

23Nayra awkinakaxan Diosapay, jumaruw nayax yuspagarsma, yupaycharaksma, jumaw yatiñ kankañ churista, ch'am churarakista; jichhasti jumaw mayipksma uk yatiyista: reyir llakisiykän uksa qhanañchapxarakista” sasa.

24Uka qhipatsti, Danielax Arioc jaqimpi jikisiriw saräna, reyix juparuw mayitayna Babiloniankiri taqi yatiñan jaqinakar jiwarayañapataki, juparusti sänwa: —Babiloniankiri yatiñan jaqinakarux jan jiwarayamti; reyin ukar irpita, ukat nayaw jupar taqi samkasitap qhanañchä —sasa.

25Arioc jaqisti jank'akiw Danielarux reyin ukar irpäna, ukat Nabucodonosor reyir akham sarakïnwa: —Judá markat apanit judío jaqinak taypin mayniruw jikxatta, jupaw juma jach'a reyirux samkamat qhanañchätam —sasa.

26Ukat reyix Danielar säna, khitirutix Beltsasar sasa sutichkäna ukaru: —¿Jumasti nayan samkax yatiyitasmati? ¿Kuntix uka samkax sañ munki uk qhanañcharakitasmati? —sasa.

27Danielasti sarakïnwa: —Janiw mayni yatiñani jaqisa, yatirisa, warawaranak uñtasin yatir jaqis utjkiti, jach'a munañan reyix kuntix yatiñ munki uk qhanañchirixa.

28Ukampis mä Diosaw alaxpachan utji, jupax jan amuyt'kayanak qhanañchiriwa, juparakiw juma jach'a reyirux yatiytam kunatix akat qhiparu utjkani taqi ukanaka. Nayaw juma jach'a reyir qhanañchäma kunanaktix ikkasina samkaskta, unañchäwinaksa uñjkarakta taqi ukanakata:

29Jach'a munañan rey, ikiñamankkasaw lup'iskäyätaxa, kunatix akat qhiparu utjkani ukanak tuqita, ukatsti imantatanak qhanañchiriw kunatix utjañapäki ukanak uñachayaraktamxa.

30Nayarusa uka imantata jan amuyt'kay unañchäwinak uñjayarakituwa, ukampis janiw nayan taqi jaqinakat sipan wali yatiñanïtax laykükiti, jan ukasti, kuntix uka samkax sañ munki uka tuqit reyir qhanañchañaxatakiwa, ukhamat chuymaman lup'itanakap amuyañamataki.

31“Samkaman jumax rey, mä jach'a jaqi uñjtaxa, k'ajkiri, axsarkañjama uñnaqani.

32Uka jaqin p'iqipasti qurikamakïnwa, kunkat purak amstäxampi, amparanakapampix qullqit luratänwa, purakapampi, lankhu charanakapampisti broncet luratarakïnwa,

33kayunakapax hierrot luratänwa; mä chikat takt'añ kayupasti hierrot luratänwa, mä chikatax ñiq'it luratarakïnwa.

34Juma reyix uka jach'a jaqi uñch'ukiskäyätaxa, ukchañkamaw qullut mä qalax jan khitin nukt'atak qurumt'anïna, ukatsti uka jach'a jaqin kayunakapar jaqkattasaw t'unjäna.

35Ukapachasti hierrosa, ñiq'isa, broncesa, qullqisa, qurisa laq'aruw tuküna, kunjämtix jawq'a pachan jawq'sut trigox khuysuski ukhama, thayasti jan akch'sa jilt'ayasaw uk apasxäna. Ukampis uka jaqiru jaqkattir qalasti, mä jach'a qulluruw tukuwayxäna, ukat uka qullux taqi aka uraqpachan phuqhantäna.

36“Ukaw samkaxa, jichhasti jach'a rey, kuntix samkax sañ munki uk qhanañcharakïma.

37Juma reyiwa, reyinakan reyipätaxa, alaxpachankir Diosaw aka marka apnaqaña, munañanïñ kankaña, ch'aman kankaña, aytat kankañsa churtamxa;

38kawkha chiqanakantix jaqinakasa, animalanakasa, jamach'inakasa jakapki uka chiqanak amparamaruw katuytam; jupaw ukanak apnaqañamatak taqpach katuytam.

39Juma qhipatsti, jan sinti yäqat yaqha reyiw utjani, ukxarusti kimsïri reyiw sartani, ukasti broncer uñtatäniwa, jupasti taqi aka uraqpach apnaqani.

40Uka qhipatsti pusïri reyiw sartarakini, ukasti hierror uñtat ch'ullqhïniwa. Aka reyix yaqha reyinakaruw t'unjani, kunjämtix hierrox taqi kun t'unjki ukhama.

41“Juma reyisti uñjaraktawa, uka jach'a jaqin kayunakapax hierrompita, ñiq'impitänwa; ukasti qhip qhipa apnaqäwix payar t'aqxtatäniwa sañ muni. Marka apnaqäwix hierror uñtat ch'ullqhïniwa, ukampis ñiq'ir uñtat jan ch'amanirakïniwa.

43Ukatsti samkaman uñjaraktawa, hierrompi, ñiq'impi kittata, ukhamarakiw marka apnaqirinakax jaqichasïwinak tuqi mayachasiñ munapxani; ukampis janiw mayar tukt'añar puripkaniti, kunjämatix hierrompi ñiq'impix jan mayachaski ukhama.

44Ukampisa, uka reyinakan marka apnaqäwip urunakansti, alaxpachankir Diosax mä rey khithanini, marka apnaqäwipasti wiñayatakïniwa, juparusti janiw khitis atipjkaniti, jan ukasti, jupaw taqi marka apnaqäwinakar tukjani.

45Uk sañ muni, qullut jan khitinsa nukt'kat qurumt'ankäna, jach'a jaqir t'unjkarakïna uka qalaxa. Jach'a ch'aman Diosaw juma reyirux uñacht'aytam kunatix akat qhiparu utjkani ukanaka. Uka samkax chiqawa, qhanañchäwipas chiqarakiwa.”

46Uk ist'asasti, Nabucodonosor reyix Danielan nayraqataparuw killt'asïna, p'iqipsa uraqkamaw alt'äna, ukatsti wilañchanaka, inciensonak jupar luqtayañatakiw arsurakïna.

47Danielarusti sarakïnwa: —Chiqpachapuniw jumanakan Tatitumax taqi diosanakan Diosapaxa; ¡taqi reyinakansa reyipawa! Jupax taqi kun yati, ukat jumax aka jan amuyt'kay samksa qhanañcharakistaxa —sasa.

48Uka qhipatsti reyix Danielar mä jach'a jilïrit utt'ayäna, juparusti walja churäwinak waxt'arakïna; ukhamarus Babilonia suyu apnaqañapatakiw utt'ayäna, ukxarusti uka markan utjir yatiñani jaqinakan jilïripat utt'ayarakïna.

49Reyisti Danielan mayitaparjamax, Babilonia suyu apnaqäwin Sadrac, Mesac, Abed-nego jupanakapar jilïrit uchäna. Danielasti, reyin pachpa utapan qhiparxarakïna.