Galatians 3

Aymara 1997

← Chapter 2 Jump to: Chapter 4 →

1¡Galacia markankir pisi amuyt'an jaqinaka! ¿Khitirak jumanakar sallqjapxtamsti? Jumanakar yatiyapksma ukapachax, naya pachpaw jumanakar sum qhanañchapxsma, kunjämättix Jesucristox cruzan ch'akkatat jiwkän uka.

2Jichhax sapxitaya: ¿Moisesan kamachip phuqhatanakam laykuti Diosan Ajayup katuqapxtasti, jan ukax, suma yatiyäwir iyawsapxatam laykuch katuqapxtaxa?

3Ukatix ukhamächi ukasti, ¿kunatarak pisi amuyt'an jaqir tukupxtasti? Diosan Ajayupan ch'amapampi machaq jakañ qalltkasina, ¿kunatarak jichhasti uk jumanakan ch'amamampik phuqhachañ munapxtasti?

4¿Ukataq t'aqhisitanakamax inamayakïxiti? ¡Janiw ukax inamayatakïkaspati!

5Diosax Ajayup jumanakar churapktam ukapacha, jumanak taypin muspharkay luräwinak lurki ukapachasa, ¿kunatsa ukham luri? Janiw kamachirjam phuqhatanakam laykuti, jan ukasti, ist'apkta uka suma yatiyäwi arunakar iyawsatanakam laykuw luri.

6Abrahamax Diosar iyawsänwa, Diosasti iyawsatap laykukiw askit katuqarakïna.

7Yatipxam, iyawsäwi layku jakir jaqinakaw, Abrahaman chiqpach wawanakapaxa.

8Qillqatax nayratpach qhanañchäna, Diosax jan judiöpkis uka jaqinakar iyawsäwi laykuw katuqarakini sasa. Nayratpacharakiw Abrahamarux aka suma yatiyäwi yatiyatayna: “Jumïpan taqpach markanakax askinakampi phuqt'at uñjasipxani” sasa.

9Ukhamasti iyawsañanïpki jupanakax Abraham tuqiw askinakampi phuqt'at uñjasipxani, Abrahaman iyawsañan jaqïtap layku.

10Ukampis kamachin luräwipar alkatirinakax, ñanqhachatäpxiwa. Qillqatansti akham siwa: “Kamachin qillqatäki uka arunakarjam jan phuqhirinakax, ñanqhachatäpan” sasa.

11Qhanakïskiwa, janiw khitis kamachi phuqhatap laykux Diosan nayraqatapan askit katuqatäkiti; Qillqatan akham siwa: “Aski jaqix, iyawsäwi laykuw jakani” sasa.

12Kamachi tuqitix wiñay jakañ jikxatañax utjaspaxa, Diosar iyawsañax janiw wakiskaspati; kamachi arunakar jaysañakïspawa. Qillqatan siwa: “Kamachinak phuqhirix, jaysatap laykuw qhispiyasini” sasa.

13Cristow kamachin ñanqhachäwipat qhispiyistu, jupax juchanakas laykuw ñanqhachäwi katuqi, Qillqatan akham siwa: “Taqi khititix mä lawaru warkkatat jiwki ukax, ñanqhachatäpan” sasa.

14Ukatpï, kuna askinaktix Diosax Abrahamar arskäna ukax jan judiöpki ukanakatakirakixa. Ukhamasti, Jesucristorutix iyawsañänixa, Diosan arsutaparjamaw Ajay katuqañäni.

15Jilatanaka, jakañxat amuyt'ayapxäma: Kunapachatix mä jaqix yaqha jaqimpi mä arust'äwi lurki ukapachax, sutipampiw qillqanti, uksti janiw khitis ina ch'usar tukuykaspati, janirakiw yapxatkarakispasa.

16Diosax Abrahamar arsuwaykän ukanakax, Abrahamampitaki, jupat saraqirimpitakïnwa. Qillqatan janiw “Saraqirinakat” parlkiti, walja jaqïkaspas ukhama, jan ukasti mayni sapatak parli: “Juman saraqirimaru” sasa, ukasti Cristowa.

17Nayasti sistwa: Diosax Abrahamampiw mä arust'äwi lurawayi, uksti qhanañchawayiwa. Diosan arsutapax janiw ina ch'usar tukuyatäkaspati, uka arust'äwis janirakiw pusi patak kimsa tunkan mara qhipat Moisesar churat kamachimp inamayar tukuyatäkaspati.

18Diosax churañ arski ukatix Moisesan kamachipar jaysañ laykukïspaxa, janiw mä arust'äkxaspati; chiqpachansa Diosaw Abrahamar inak churañatak arsuwayi.

19Ukhamasti, ¿kunatakirak kamachisti askïspasti? Abrahamar arsutap qhipatxa, Diosax kamachi arunak churistu, jan wali lurapkäyätansa uk jiwasanakar uñacht'ayañataki. Ukampis uka kamachix Diosan arsutap katuqkatayna uka Abrahaman saraqirip jutañapkamakiw askïnxa. Diosax angelanak tuqiw kamachinak Moisesar churäna, ukat jiwasanakar uka kamachinak churañapataki.

20Ukampis mä sapa jaqikïtap laykux janiw yaqha sumankthapiyirix munaskxiti, Diosasti mä sapakiwa.

21Ukhamasti, ¿janit Moisesan kamachipasti Diosan arsutanakap yäqkpachasti? ¡Janiw kunäkipansa ukhamäkiti! Kamachinakatix wiñay jakañ churasapän ukaxa, kamachir phuqhatas laykuw Diosax katuqistasapäna.

22Qillqatan siski ukarjamax, taqiniw juchan katuntat jakapxi, ukax ukhamaw khitinakatix Jesucristor iyawsapki jupanakan, Diosan arsutap katuqapxañapataki.

23Iyawsäwi janïr jutkipan, kamachin munañapar katuntataw jakäyätan, iyawsäwin yatiyasiñap suyasa.

24Ukhamasti kamachix yatichirir uñtataw irpawayistu, Cristor irpkatañkama, jupar iyawsatas layku Diosampi katuqatäñasataki.

25Jichhax Jesucristor iyawsañ urunakan purinxatapatxa, janiw kamachin jiwasar irpañapa, yatichañapas wakiskxiti.

26Jumanakax Tatit Jesucristor iyawsatanakam laykux Diosan wawanakapäpxtawa.

27Bautismo katuqasinxa, Cristompi mayachatarakiw uñjasipxtaxa, Cristompix mä isimpi isthapitäpkasmas ukhamäpxtawa.

28Tatit Jesucristor mayachatäxasin, janiw judío jaqïñasa, griego jaqïñasa, t'aqhisiyat jaqïñasa, antutnukut jaqïñasa utjkxiti, chachasa, warmisa yaqhäkiti; taqi jumanakax mayakïxapxtawa.

29Jumanakatix Cristonkapxstaxa, Abrahaman wawanakapäpxaraktawa, Diosax jupar arsuwaykän uksa katuqapxarakïtawa.

← Chapter 2 Jump to: Chapter 4 →