Habakkuk 1

Aymara 1997

Jump to: Chapter 2 →

1Tatituw mä uñjäwi tuqi Habacuc profetar aka yatiyäwi qhanañchawayi.

2Tatay, ¿kunapachkamarak juman jan ist'kata yanapt'am mayisa arnaqasïmasti? ¿Kunapachkamarak nuwasiñ jan utjañapatak arnaqasïma, qhispiyir jan jutkät ukasti?

3¿Kunatarak ukataq llakisiñanaka, t'aqhisiñanaksa uñjayistasti? Nayax t'aqhisiyañanakampi, tukjatäñanakampi muyuntatätwa; taqi chiqansa, ch'axwañanakampi, nuwasiñanakampikiw utjaski.

4Kamachinakax janiw phuqhaskxiti, chiqa uñjäwis takichasitawa, jan wali jaqisti, aski jaqirux arknaqiwa, chiqa uñjañasti maysar uñtayatawa.

5“Kawkïr markanakatix jumanakar muyuntapktam ukanakar uñtapxam; wali sustjasiñamp uñch'ukipxam. Nayax taqi akanak niyaw lurä, maynitix jumanakar taqi akanakat yatiyapxiristam ukkhasa, janiw chiqäpachaw sapkasmati.

6Babiloniankirinakaruw nuwantapxañapatak sartayä, jupanakasti wali qhuru jaqinakäpxiwa, uksarus aksarus sarantañatakix wakicht'atakïsipkiwa, kawkïr uraqinakatix jan jupanakankki ukanak katuntasiñataki.

7Sustjaskaña, axsarkaña jaqinakäpxiwa, jupanakan kamachinakapak ch'amampi phuqhayañ munapxaraki.

8Caballonakapasti leopardo sata laq'unakat sipansa juk'amp jalirinakawa, wasarankir manq'at awtjat qamaqinakat sipansa juk'amp qhurüpxarakiwa. Caballxat jalirinakapasti jach'a tamar tukusaw jalapxi, uñisirinakapar katurpayañatakiw tutukxatapxi, kunjämatix pakax katjañatak thuqxatki ukhama.

9Sarkasasti taq tukjawayapxi; ukham saratapampix wal axsarayapxi, katurat jaqinakaxa quta ch'allanakar uñtat waljanïpxiwa.

10Reyinakatsa, jilïr jaqinakatsa phiskasipxiwa, jach'a uyunakapatsa larusipxiwa, ukarusti laq'amp phuqkatasaw uka uyu pata mantasax katuntapxaraki.

11Mä jach'a tutuk thayjamaw q'al tukjawayapxi, jupanakan ch'amapaw diosapjamaxa.”

12Tatay, ¿janit wiñayatak jakkir qullan Diosäktasti? Tatay, jumaw nayan arxatt'irixäta, jumarakiw babiloniankirinakarus ch'am churasin markamar mutuyaraktaxa, ukhamata juman chiqa uñjäwim uñacht'ayañapataki.

13Juman sinti q'umätamatsti, janiw jan wali lurañxa uñjkasmati, janirakiw ñanqha luräwinakarus, walikiw siskasmati; ¿kunjämarak jiwayirinakarus amuk uñch'uktasti? ¿Kunatarak amukïtasti jan wali jaqinakax jupanakat juk'ampi askïpki ukanakar tukjapki ukkhasti?

14¿Kunatsa jumax nanakarux qutankir chawllanakjamak uñjapxista, jan khiti irpirin laq'unakäpkiristsa ukhamsti?

15Ukat babiloniankirinakax nanakarux jasak katuntapxitu, kunjämtix chawlla katurix anzuelonakampi, qänanakampi chawllanak katuntapki ukhama. Ukatsti mayar apthapita uñjasax wal kusisi.

16Ukatwa chawlla katurix qänanakaparu, anzuelonakaparusa, suma luqtäwinakampi, incienso q'aphinakampi waqaychi, ukanakäpan suma walja manq'anakax utjarapi.

17Ukhamasti, ¿babiloniankirinakax qänampjam katurasipkakitaniti? ¿jan jaqit khuyapt'ayasisas jiwarayasipkakpachäniti?

Jump to: Chapter 2 →