Jonah 1

Aymara 1997

Jump to: Chapter 2 →

1Mä urux Tatitux Amitai chachan Jonás yuqaparuw säna:

2“Sartam, Nínive jach'a markar saram, ukatsti yatiyanim, ñanqha luratanakapax nayraqataxaruw purini, ukat jupanakar q'al tukjä” sasa.

3Jonás chachasti Tatitur ist'kpachaxa, nayraqatapat jayar jaltañ amtäna, ukatsti Jope puertor purisin Tarsis tuqir mistuskir mä barco jikxatäna; pasajep alasisinsti, uka barcoruw sarxatawayxäna.

4Ukatsti, lamar qutankapkän ukapachaw Tatitux jach'a ch'aman axsarkay thaya sartayäna, thayasti uka jach'a qutan barcorux t'unjirpachänwa.

5Barco apnaqirinakasti wal axsarayasipxäna, sapa maynirakiw diosapar art'asïna. Ukatsti barcon phisnakïñapatakixa, taqpach q'ipinak qutarkamaw jaquntapxäna. Ukchañkamasti Jonasax barcon q'ipinak uchañ manqhar mantasin, wali sum ikt'asiskäna.

6Barco apnaqir capitanasti Jonasar jak'achasisax sänwa: —¿Kunatarak akan ikisktasti? ¡Sartasim, Diosamar art'asim! Inach khuyapt'ayasisin qhispiyaskistani —sasa.

7Ukchañkamasti, barco apnaqirinakax jupanakkamaw parlakipasipxäna: —Khitis akham jan walir puriñatak juchanïpacha uk jichhaw yatxatañäni —sasa. Juchasti, Jonasaruw mistüna.

8Ukat jupar sapxäna: —Arsum, ¿kunatsa aka t'aqhisiñanakax jiwasxar juti? ¿Kuna lurirïtasa? ¿Kawkitsa jutta? ¿Kawki markankirïtasa? ¿Khitin wila masipätasa? —sasa.

9Jonasasti sarakïnwa: —Nayax hebreo jaqïtwa, qutanaksa, aka uraqsa lurir alaxpachankir Tatit Diosar yupaychirïtwa —sasa.

10Jonasax barco apnaqirinakar jupan Tatitur jan ist'as jaltanitap yatiyäna, jupanakasti uk ist'asax walipuniw sustjasipxäna, quta mathapinakasti juk'ampi juk'ampiw sartäna, wasitatsa jiskt'asipkakïnwa: —¿Kunatarak uk lurtasti? ¿Kamachapxämas aka quta mathapinakan t'akurañapatakixa? —sasa.

12Jonasasti jupanakarux sänwa: —Qutar jaquntapxita, ukat mathapinakax t'akurxani, nayaw juchanïtxa aka jach'a thayan jumanakxar jutañapataki —sasa.

13Barco apnaqirinakasti taqi ch'amapampiw quta thiya uraqir mistuñatak ñuqt'apxäna, ukampis mathapinakan juk'ampi sartaskakitapatxa janiw misturjamäpkänti.

14Ukatsti Tatituruw art'asipxäna: “Tatay, aka jaqin juchap laykux janikiy jiwañanakax munamti, aka jaqitix jan juchanïkasin jiwani ukkhasa, janirakï juchañchapxistati, ukampis jumax Tatay, munañamaruw lurtaxa” sasa.

15Uk sasinsti, Jonasarux katuntasin qutaruw jaquntapxi, ukhamat quta mathapinakax t'akurawayxäna.

16Ukham uñjasasti, barco apnaqirinakax Tatituruw yupaychapxäna, mä wilañcha luqtapxäna, luräwinak phuqhañatakiw arsupxarakïna.

17Ukchañkamasti, Tatitux Jonasar uquntañapatakix mä jach'a chawlla wakichäna. Ukhamat Jonasax kimsa urumpi kimsa arumampi chawlla purak manqhan jikxatasïna.

Jump to: Chapter 2 →