Lamentations 2

Aymara 1997

← Chapter 1 Jump to: Chapter 3 →

1¡Tatitun phiñasiñapax sinti jach'apuniwa, ukkha suma Jerusalén markarusti q'al ch'amakt'ayi! Israel markan sumäñapsa pampa t'unji, alaxpachat akapacharus jaquqankaspa ukhama; Phiñasiñapanxa, pachpa apnaqäwipatsa janiw amtaskiti.

2Tatitux Jacobun utanakap jan mayan t'unjawayi; Suma Judá markan pirqanakapsti phiñasiñapan atipjataw q'al t'unjawayi; reyirux qunuñap apaqawayi, jilïrinakaparusti wal p'inqachjawayaraki.

3Tatitusti phiñasiñapan atipjataxa, Israelan ch'amapxa q'al chhaqtäwayi. Uñisirinakarux saykatasktanwa ukampis Tatitux janiw yanapkistuti. ¡Jacobun uraqipansti mä ninaw aqti, uka ninasti kunatix utjki ukanak taqpach nakhantawayi!

4Tatitux mä uñisirïkaspas ukhamaw mich'ip antutt'añatak wakicht'asi; awqäkaspas ukhamarakiw taqi kunatix sumäki ukanak t'unjawayi; phiñasiñapxa mä ninjamaw ukkha suma Jerusalén markxar jaqxatani.

5Tatitux uñisirïkaspas ukham uñjistu: Israel markarux q'al tukji; reyin utanakapsti taqpach t'unthapi, suma jach'a pirqanakapsa pampa tukuyaraki. Ukkha suma Judá markarusti, t'aqhisiñatsa, t'aqhisiñampiw phuqhantaraki.

6Qullana utapsti, mä lunthatjamaw t'unjawayi; tantachasiñäki uka chiqsa q'al t'unjawayi. Tatitux Jerusalén markanxa, sábado urunakatsa, phunchhäwi urunakatsa armasiyistuwa. Aqkir phiñasiñapansti, sacerdoterusa, reyirusa apanukuwa.

7Tatitux altarap apanukuwa, qullan utapsa jisk'achjarakiwa; markar jark'ir jach'a pirqanaksa uñisirinakan amparaparuw katxaruyi. ¡Tatitun utapansti mä phunchhäwi urükaspas ukhamaw jaqinakan arnaqasitapax ist'asi!

8Tatitusti ukkha suma Jerusalén markan jark'aqasiñ pirqanakap t'unjañ amti. Jupaw t'unjañatak wakichäna, jan samart'asaw uka wakichäwip phuqharaki. Uka jach'a pirqanaksa, jupax llakimpiw phuqhanti, uka pirqanakasti pampaw tukuraki.

9Markasti jan punkuni, jan jist'katañaniw uñjasi: ¡punkunakasti t'unjata, pampan liwirpayatawa! Reyipasa, jilïr apnaqirinakapas Tatitur jan uñt'irinakamp chikakïxiwa; Tatitun kamachinakapax janiw utjkxiti. ¡Janirakiw profetanakapas Tatitut kuna unañchäwinaksa katuqkxapxiti!

10Jerusalén markankir jilïr jaqinakas amukiw uraqin qunurxapxi, p'iqinakapxarus laq'ampiw jach'xatasipxi, chhankha isinakampiw uchasipxi. Jerusalén markankir tawaqunakasti p'iqinakapsa uraqkamaw alt'apxaraki.

11Jachkäwisa nayrax usxituwa, chuymas llakisiñat phallañjamak munxitu; jan ch'amaniw uñjasta jaqinakaxan markap t'unjat uñjasa, ñuñuskir wawanakar manq'atjama jiwaraskir uñjasa.

12Wawanakasti taykanakaparux sapxänwa: “¡Janiw t'ant'asa, vinosa utjkxistuti!” sasa. Markan thakhinakapansti wawanakax jiwaratjamaw liwirtapxäna, taykanakapan amparanakapan samaqkäwiw amukt'awayxapxäna.

13Suma munkañ Jerusalén marka, ¿kunampirak jumarusti kikipasiyirismasti? Suma munkañ Jerusalén marka, ¿kun lurasarak jumarusti chuymachirismasti? Juman t'unjäwimax lamar qutar uñtat jach'awa; ¿khitirak jichhasti jumar chuymachiristamsti?

14Kuna unañchäwinaktix profetanakamax yatiykäyätam ukanakax k'arikamakïnwa. Juchanakam janiw qhanañchapkäyätamti, ukhamat juman kuttanxañamataki, k'ari unañchäwinak jumarux yatiyapxäyätam, ukanakarusti jumax iyawsarakïyätawa.

15Thakhi sarir jaqinakasti jumar uñjasaxa, larusisaw amparanakap t'axllisipxi; jumat phiskasisax p'iqsa khiwisipxiwa, suma Jerusalén markat sapxarakiwa: “¿Akati kawkïri markattix aka uraqpachan wali suma munkañ markapuniwa sapkäna ukasti?” sasa.

16Taqi uñisirinakamaw jichhax jumatak arsu. Lakanakapsa t'ururt'asisaw axsarayañ arunak sapxi: “¡Q'alpun t'unjtanxa. Akpun suyaskäyätanxa; kunjämtix uñjañ munkäyätan, ukham uñjtanxa!” sasa.

17Tatitux amtäwinakap phuqhapuniwa, arsutap phuqharakiwa. Kuntix nayratpach t'unjañ amtkäna ukxa, jichhax jan khuyapt'ayasisaw t'unji, uñisirinakamampis larusiytamwa, uñisiriman ch'amapsa jach'aruw aptaraki.

18¡Suma Jerusalén marka, Tatitut yanap mayim! ¡Jawir umar uñtat uruy arumay jachanakam jalayam! ¡Jan samart'as jacham, nayranakamas janirak samarpati!

19Jerusalén, sartasim, arumanakas Tatitur arnaqasim; Tatitun nayraqatapan chuymamsa ch'allxtayasim, umar uñtat jalayarakim; amparanakam luqtas Tatitut mayt'asim, wawanakaman jakañapatakis jupat achikt'asim, uka wawanakamasti marka thakhinakan manq'atjam jiwaraski.

20Uñjam Tatay, amuyt'amaya, janipuniw khitirus nanakarjamax t'aqhisiyktati. ¿Taykanakan ñuñuskir wawanakapar manq'antasiñapax wakisipunpachati? ¿Sacerdotenakana, profetanakan qullan utaman jiwarayatäñapax wakisipunpachati?

21Waynanakampi, chuymani jaqinakampix marka thakhinakan jiwarataw liwirtasipki; markaxankir waynanakasa, tawaqunakasa, espadampi jiwarayataw uñjasipxi; phiñasiñam urunsti jiwarayañkamaw chhuxriñchjtaxa, ¡jan khuyapt'ayasisaw jiwarayaraktaxa!

22Jan walt'añanaksti taqi tuqit apayantaxa, mä phunchhäwirus jutapkaspa ukhamaw purintanipxi; Tatay, juman q'apisiñam urunsti, janipuniw khitis jiwañat qhispkiti. Kawkïrinakarutix nayax uywaskäyäta, yatichkarakïyäta, ukanakarusti uñisirinakaw jan khuyapt'ayasis jiwarayxi.

← Chapter 1 Jump to: Chapter 3 →