Malachi 3

Aymara 1997

← Chapter 2 Jump to: Chapter 4 →

1Taqi ch'aman Tatitux siwa: “Nayaw yatiyirixa khitanï, jupaw nayatak thakhi wakichani. Jumanakax thaqhapkta uka Tatitux, akatjamat utaparux mantanini. ¡Arust'äwir mantat yatiyirix niyaw purisinki!”

2Ukampis, ¿khitirak jutañap urumpi q'iwtasispasti? ¿Khitirak jupa nayraqatan sayt'asispasti? Ninar uñtataw jupax purinini, jiwasar q'umachañataki, jabonar uñtataw q'añunak jiwasan chuymasat apaqani.

3Tatitux sacerdotenakar q'umachañatakiw qunt'asini, Leví ayllut saraqir sacerdotenakaru, kunjämtix maynix qullqsa, qursa ninampi q'umachki ukhama. Ukat jupanakax waxt'äwinakapxa Tatitur luqtapxani, kunjämtix jupanakax luqtapxirïki ukhama.

4Tatitusti kusisiñampiw Judá, Jerusalén markanakan waxt'äwinakap katuqani, kunjämtix khä urunakan katuqasirïkän ukhama.

5Taqi ch'aman Tatitux siwa: “Nayaw jumanakar taripir jutä. Ukhamarus nayax uñjkta ukanak arsü khitinakatix layqasipki, yaqha warminakamp sarnaqapki, k'ari juramento lurapki, irnaqirinakarus sallqjapki, ijmanakarusa, wajchanakarus jachayapki, yaqha markat jutir jaqinakarus jan wal uñjapki, nayarus jan axsarapkituti ukanakatakiw arsurakï.

6“Nayätwa Tatit Diosaxa, nayax pachpakïsktwa. Ukat jumanakax Jacobun wawanakapa, jan tukjatäpktati.

7Jumanakax awkinakamjamarakiw nayan kamachi arunakaxat saranukupxtaxa, janiw kamachinak phuqhañ munapkaraktati. Naya, taqi ch'aman Tatituw sapxsma: ¡Nayar kuttanxapxam, nayasti jumanakar kuttanxarakïwa! Ukampis jumanakax sapxtawa: ‘¿Kunatsa nanakasti jumar kuttanipxäma?’ sasa.

8Nayasti jumanakarux jiskt'apxsmawa: ¿Jaqix Diosat lunthataspati? sasa. ¡Jumanakax lunthatapxistawa! ‘¿Kunanarak nanakasti jumar lunthatapxsmasti?’ sasas jiskt'asipkakistawa. ¡Jumanakax sapa tunkat maya churañanaka, waxt'äwinaka nayat lunthatapxista!

9Jïsa, taqi markpacha, taqi jumanakaw nayat lunthatasipkistaxa, ukat nayax jumanakar ñanqhachapxsma. Naya, taqi ch'aman Tatituw sapxsma:

10Sapa tunkat maya churañamäki uksti nayan utaxar apanipxam, ukhamat manq'añax utaxan utjañapataki. Jichhax yant'apxita, nayaw jumanakaru alaxpach ventananak jist'arasin jilarkir suma waxt'äwinak apayanipxäma.

11Janirakiw kuna laq'unakas yapunakamarux tukjkaniti, uva yapunakamas wañskarakiniti.

12Ukatsti taqpach markanakaw jumanakar wali kusisiñan markat uñt'apxätam, munkaya uraqinïpxatam layku. Naya, taqi ch'aman Tatituw arsta”.

13Tatitusti siwa: “Jumanakax jan wali arunakampiw nayat parlapxtaxa. Ukatsa jiskhisipkaktawa: ‘¿Kunarak nanakasti jumat parlapxtsti?’ sasa.

14Jumanakax akanak sapxtaxa: ‘Diosar arkañax inamayakiwa. ¿Kunaraki jiwasasti apsuñäni jupan arunakaparjam sarnaqasasti, taqi ch'aman Tatit nayraqatan llakt'at sarnaqasasa?

15Jiwasax uñjtanwa, jach'a jach'a tukurinakax kusisitäpxiwa, qhuru jaqinakatakisti jan walinak lurkasas taqi kunas jupanakatakix sumakipuniwa, Tatiturus yant'apxarakiwa, ukampis janiw kuna mutuñsa Tatitut katuqapkiti’ ” sasa.

16(Tatitur axsartas sarnaqirinakasti jupanakkamaw parlasipxäna, Tatitusti jupanakar ist'änwa. Ukatsti, jupan nayraqatapan qillqasïna, Tatitur axsartañampi yäqirinakataki, sutip waqaychirinakataki).

17Taqi ch'aman Tatitux siwa: “Niyaw urux purisinki, jupanakax wasitat nayankxani uka uruxa. Jupanakax nayatakix mä suma imat qurïkaspas ukhamäniwa, janiw kunampis jupanakar ñanqhachkäti; kunjämtix mä awkix wawapat khuyapayaski ukhamaw jupanakat khuyapayasirakï.

18Ukapachaw jumanakax amuyasipxäta kunatix askïki, kunatix jan askïki uka, ukhamaraki, khititix Diosar yupaychki, khititix jan yupaychki ukanaka” sasa.

← Chapter 2 Jump to: Chapter 4 →