Nehemiah 1

Aymara 1997

Jump to: Chapter 2 →

1Nehemías chachan luräwinakapax akawa, jupasti Hacalías chachan yuqapänwa. Artajerjes reyin pä tunka mara marka apnaqäwipana, Quislev phaxsina, naya Nehemiasax Susa markankaskäyätwa,

2ukapachasti Hananí mayni jilaxaw Judá uraqit mä qawqha chachanakamp purinïna. Nayasti jupanakarux Jerusalén markat jiskt'asta, kawkïr judionakatix jaya markar apatäñat jaltapkatayna ukanakat jiskt'asirakta.

3Jupanakasti sapxituwa: “Khitinakatix jaya markar apatäñat jaltapki ukanakaxa, pachpankasipkiwa, jupanakax sinti jan walt'añan jikxatasipxi, wali t'aqhisiyatäpxarakiwa. Jerusalén markan pirqanakapasti tukjatawa, punkunakapas ninamp nakhantayatarakiwa” sasa.

4Uka arunak ist'asasti qunt'asisin jachta, mä qawqha urunakaw wali llakt'at jikxatasïyäta, ayuno lurasa, alaxpachankir Tatitut mayisisaraki.

5Jupar akham sarakta: “Alaxpachankir Dios Tatay, axsarkañ jach'a Diosay, jumar munapktam ukanakarusa, kamachi arunakam phuqhirinakarus janiw armktati, chiqa chuymanïtawa, arust'äwir mantat arumsa phuqtawa;

6jichhasti israelita luqtirinakamatak arumay uru mayisitaxar ist'itaya. Nanak israelitanakax juma tuq juchachasitanakax uñt'asipxtwa; ¡wila masinakaxasa, nayasa juch lurapxta!

7Juma nayraqatan sinti jan walinak lurapxta; arunakamar jan phuqhasaw sarnaqapxta, Moisés luqtirim tuq churapkista uka kamachinakaru, arsutanakamaru.

8Moisesar yatiykäyäta uka arunakat amtasim, nanakatix juch lurapxirista ukaxa, wali jaya markanakaruw ananukupxitasma;

9ukampis nanakatix jumar makhatxapxirisma, ukatsti kamachi arunakamar phuqhasa sarnaqapxarakirist ukaxa, kawki aka uraqi thiyakam jaqunukut uñjaskasasa, ukkhatpach wasitat apthapipxitasma, juman chhijllat qullan chiqaruw wasitat irpapxarakitasma, kawkhantix sutimax jakkani ukkharu.

10“Nanakax juman uywatanakamäpxtwa, juman markamäpxaraktwa, jach'a ch'amamampiw Egipto markat irpsusinipxistaxa.

11Dios Tatay, achikt'assmawa, mayisitax ist'itaya, jumar yupaychañ munir luqtirinakaman achikt'asitanakapsa ist'amaya. Jumakiy reyir suma chuym churam nayar katuqañapataki, ukhamat amtäwixan sum phuqhasiñapataki” sasa.

Jump to: Chapter 2 →