Revelation 1

Aymara 1997

Jump to: Chapter 2 →

1Diosaw Jesucristor uñacht'ayäna, kunatix jank'ak luraskani ukanakxata, ukhamat jupax luqtirinakaparu yatiyañapataki. Ukat Jesucristox aka uñacht'äwxa Juan luqtiripar mä angelap tuqi yatiyäna.

2Juan luqtiripasti kuntix uñjkatayna taqi ukanakxa ukhampach qillqi. Jupaw Diosan arup qhanañchi, Jesucristot arsuraki.

3Aka yatiyäwi arunak ullaririx kusisiñaniwa. Diosat katuqat arunak ist'irinakasa, akan qillqatäki uka arunakarjam sarnaqirinakas kusisiñanïpxarakiwa, uka arunakan phuqhasiñap urux niy jak'ankxiwa.

4Naya, Juanax, Asia suyunkir paqallqu iglesianakaruw aruntanipxsma. Jumanakax Diosan askipampi, sumankañapampi katuqapxam. Uka Diosasti jakiwa, jakapunïnwa, jichhax jutañampïskiwa, uka pachparaki, Diosan reyi qunuñapan nayraqatapankir uka paqallqu ajayunakampita,

5Diosan chiqa qhanañchiripa Jesucristotsa katuqasipxarakim. Uka Jesucristow jiwatanak taypit nayrïr jaktirixa, taqi akapach reyinakar apnaqañatakis jupax munañanirakiwa. Jesucristox jiwasar munasistuwa, juchanakasatsa wilap wartasaw jariqistu,

6ukatsti reyinaka sacerdotenak jiwasarux tukuyistu Dios Awkiparu luqtañasataki. ¡Qhapaq kankañasa, ch'aman kankañas wiñayatak jupankpan! Ukhamäpan.

7¡Uñtapxam, Cristox qinay patanjam jutaski! Taqi jaqiw jupar uñjani, jupar chhuxriñchirinakas uñjapxaniwa; akapachankir taqpach markanakas jupar uñjasax wal jachapxani. Jïsa. Ukhamäpan.

8Tatitux siwa: “Nayätwa qalltasa tukuyasa, khitïkitix uka, khitïkäntix uka, khititix jutkani uka; jupasti Taqi Munañaniwa.

9Naya, Juanax, jumanakan jilamätwa, Jesusampi mayacht'asitax layku, t'aqhisïwinakan ch'amampi mututax laykusti, jumanakamp chikax Diosan ajllit markapankirïtwa. Diosan arunakap yatiyatax layku, Jesucristot parlatax laykurakiw Patmos quta wat'an nayax katuntat jikxatasïyäta.

10Kunürutix Tatitun urupäkän uka urun nayax Qullan Ajayun apnaqat uñjasta, ukatsti mä jach'a aru ist'ta qhipäxaxat art'asiniri, uka arusti mä trompetas phust'askaspa ukhamänwa,

11uka arusti situwa: “Uñjktas ukanak qillqam, ukatsti Asia suyunkir paqallqu iglesianakar apayam: Éfeso, Esmirna, Pérgamo, Tiatira, Sardes, Filadelfia, Laodicea, uka iglesianakaru” sasa.

12Nayasti arxaykitu ukar uñtañatakiw qhipäxar uñakipasta; kutikipstasinsti, qurit lurat paqallqu candeleronak uñjta,

13uka paqallqu candeleronak taypinsti mä jaqjam uñjta, niyas Jaqin Yuqapar uñtata, isipasti kayukamänwa, jaraphipäki ukkharusti quri wak'ampi wak'antata.

14Ñik'utapasti t'awrjama, jan ukax, khunjama janq'ünwa, nayranakapasti aqaskir ninjamarakïnwa.

15Kayunakapasti wali lliphipkirïnwa, hornon parintayata, mä suma llijsuyat broncer uñtata; arupasti wali ch'amanirakïnwa, uma phaxchanakan qhututitapjama.

16Kupi amparapansti paqallqu warawaranakaw utjäna, lakapatsti purapar arini espadarakiw mistusinkäna. Ajanupasti intin wali qhant'atapjamänwa.

17Jupar uñjasasti, kayunakap nayraqataruw jiwatjam liwista. Ukampis jupax kupi amparapampi luqxatasaw nayar situ: “Jan axsaramti; nayätwa qalltasa tukuyasa,

18jakaskaraktwa. Nayax jiwatäyätwa, jichhasti wiñayatakiw jakaskta. Nayaw jiwampina, manqha pachampin jist'arañanakap katuskta.

19Kuntix uñjktas uk qillqantam, kunatix jichhax utjki, kunatix akat qhipar utjkani ukanaksa qillqantarakim.

20Kupi amparaxan paqallqu warawaranak jumax uñjktas ukampi, qurit lurat paqallqu candelerompix akawa: paqallqu warawarax paqallqu iglesian angelanakapawa; paqallqu candelerosti paqallqu iglesianakarakiwa” sasa.

Jump to: Chapter 2 →