Acts 19

Ayamar Bible (Qullan Arunaca)

← Chapter 18 Jump to: Chapter 20 →

1Apolosan Corinto marcancañapcamasti, Pablojj kollu tokenac pasasinwa Éfeso marcar puri. Ucansti mä kawkha iyawsirinacaruw jicjjataraquïna.

2Ucatsti jupanacarojj jisct'änwa: —Tatitur iyawsapcta ucqhajja ¿jumanacajj Kollan Ajayjja catokapjjtati? —sasa. Jupanacasti sapjjänwa: —Janiw ist'apjjerïcti Kollan Ajayun utjatapsa —sasa.

3Pablosti ucjjarojj jupanacarojj jisct'araquïnwa: —¿Cuna cast bautismrac uqhamasti catokapjjtasti? —sasa. Jupanacasti sapjjaraquïnwa: —Juanan bautismopacwa catokapjjta —sasa.

4Pablosti sänwa: —Juanajj jakenacarojj bautisänwa juchanacapat arrepientisipjjatapata. Jupanacarusti saraquïnwa: ‘Nayan khepajj mayniw jutani, ucaruw iyawsapjjäta.’ Ucasti Cristo Jesusawa —sasa.

5Uc ist'asinsti, Tatit Jesusan sutiparuw bautisasjjapjjäna.

6Cunapachatejj Pablojj amparapamp jupanacjjar lokjjati ucqhaw Kollan Ajayojj jupanacjjar jutäna. Ucatsti jupanacajj jan uñt'at arunacwa parlapjjäna, Diosan arunacapsa yatiyapjjaraquïna.

7Jupanacasti niya tunca payan chachanacjamänwa.

8Ucatsti quimsa phajjsiw Pablojj sinagogar saräna. Ucansti jan ajjsarasaw Diosan arunacap jakenacar parläna, Diosan reinopat amuyt'ayasa.

9Ucampis yakhepanacajj chuymanacap kalarayasisinjja, janiw iyawsañ munapcänti, jan ucasti jakenacan nayrakatapanjja evangelio contraw jan walinac parlapjjäna. Uqham uñjasinwa Pablojj jupanacatjja jithektawayjje. Iyawsirinacarusti jupamp chicwa irpjjaraqui. Ucatsti sapüruraquiw Pablojj Tirano jaken utapan Diosan arunacap parläna.

10Jupasti ucanjja pä maraw uqham parläna. Uqhamatwa take Asia token jaquirinacajj Tatit Jesusan arunacap ist'apjjäna, judionacasa jan judiöpqui ucanacasa.

11Diosasti Pablo tokew jach'a milagronac luräna.

12Jakenacasti Pablon pañuelopsa isinacapsa usutanacan ucaruw apapjjäna. Usutanacasti uqhamatwa waliptjjapjjäna. Uqhamaraquiw ñankha ajayunacas jupanacatjj mistjjaraquïna.

13Ucampis yakhep judionacaw utjäna, marcat marca sariri. Ucanacasti ñankha ajayunacwa jakenacat alissupjjerïna. Jupanacasti Tatit Jesusan sutip aytasisaw ñankha ajayunacar alissuñ munapjjäna, aqham sasa —“¡Qhitittï Pablojj parlqui uca Jesusan sutiparuw sapjjsma: Mistupjjam!” sasa.

14Sacerdotenac taypinsti mä jilïriw utjäna, Esceva sata. Uca chachasti pakallk yokanacanïnwa, ucanacaw uqham lurapjjäna.

15Ucampis ñankha ajayojj jupanacarojj sänwa: “Nayajj Jesusarojj uñt'twa, uqhamarac Pablorusa. Jumanacasti ¿qhitïpjjaractasti?” sasa.

16Uqham sasaw ñankha ajayun mantat chachajj jupanacar thokcatäna, ucatsti wali ch'amampiw jupanacarojj nuwanokäna. Uqham nuwjatasti, sinti usuchjataraquiw jupanacajj k'alalpach uca jaken utapatjja jaltjjapjjäna.

17Éfeso marcanquirinacasti takeniw ucjja yatipjjäna, judionacas jan judiöpquis ucanacasa, ucat jupanacajj wal ajjsarapjjäna. Uqhamatwa Tatitun sutipajj wali jach'achatänjja.

18Walja iyawsirinacaraquiw jutasin take jan wali luratanacap arsusipjjäna.

19Qhitinacatejj laykäpcäna ucanacajja libronacap apanisinwa takenin nayrakatapan ninar phichantapjje. Uca libronacasti wali jila alanïnwa. Jakenacajj sapjjänwa: “Alapajj mä pheska tunc warank kollkjamäpachaw” sasa.

20Uqhamatwa Tatitun arunacapajj juc'ampi parlatäna, ch'amamp uñacht'ayasa.

21Ucanac khepatsti Pablojj Macedonia, Acaya tokenaca uñjt'aniñwa amtäna, ucatsti Jerusalenar sarjjañataquiraquiw jupajj säna: “Jerusalenar sarjjatatsti, Roma marcar sarañajjaraquiwa” sasa.

22Jupasti pani yanapt'irinacaparuw nayrakat Macedonia marcarojj qhitäna, ucanacasti Timoteompi, Erastompïnwa. Pablosti mä kawkha urunacampiw Asian kheparäna.

23Ucürunacansti mä ch'ajjwaw utjäna, Tatitun thaquipjjata.

24Mä chachaw utjäna, Demetrio sutini. Jupasti kollketa jisc'a templonac lurirïna, Diana diosan templopar uñtata. Uqham lurasinsti jupamp chic irnakerinacarojj wal kollkenchäna. Uca Demetriopï uca ch'ajjwanac utjañapataquejj juchanïnjja.

25Jupasti take jupamp chic irnakerinacaruw jawsthapiyi, uqhamarac yakha jupanacjam luririnacamp cuna. Jupanacarusti saraquïnwa: —Tatanaca, jiwasajj aca luratasampejjay sum jacasipjjstanjja.

26Jichhasti jumanacajj uñjapjjtawa, ist'apjjaractawa cunjämtï aca Pablo jakejj sarnakasqui: ‘Jaken lurat diosanacajj janiw cheka Diosäquiti’ sasa ucjja. Uqham sasaw jupajj walja jakenacarojj mayjt'ayäna, uca pachpa Éfeso marcansa, uqhamarac niya takpach Asia tokenquirinacarusa.

27Ucasti janiw walïquiti. Uqhamatjja aljasiñanacasaw aynacht'aspa. Uca pachparaquiw Diana diosan jach'a cancañapajj jan yäkatäjjaraquispati. Jichhacamajj juparojj take Asianquirinacasa uqhamarac orakpachansa yupaychasipquiwa —sasa.

28Uc ist'asinsti jakenacajj wal colerasipjjäna. Ucatsti jach'atwa art'apjjäna. “¡Jacpan Diana, Efesonquirinacan diosapajj jach'awa sasa!.”

29Uqhamatwa marcpachan mayjt'asiñajj utjäna. Ucatsti Gayompiru, Aristarcompiruw catuntapjjäna. Ucanacajj Macedonianquir chachanacänwa. Jupanacasti Pablomp chicaw jutapjjaraquïna. Jakenacasti jupanacar catuntasinjja katatipjjewa marcan tantachasïwi utapcama.

30Pablosti uc yatisinjja, marcanquir jakenacamp parliriw utarojj mantañ munaraquïna, ucampis iyawsirinacajj juparojj jan mantañapataquiw jarc'apjjäna.

31Uqhamaraquiw Asianquir yakhep autoridadanacajj juparojj ewjjt'awayapjje: “Janiw waquisquiti uca tantachasïwir sarañamajja” sasa. Uca autoridadanacajj Pablon amigonacapänwa.

32Ucchañcamasti uca tantachasïwinjja jakenacajj wal ch'ajjwapjjäna. Mayninacajj mayjwa arsupjjäna, yakhanacasti yakharac arsupjjaraquïna. Jil pach jakesti janiw cunatac aywthapitapsa yatipcaraquïnti.

33Judionacajj Alejandro sutin chacharuw nayräjjar nucsupjje. Jupasti ampar aytasaw jakenacar amuct'ayañ munäna, jupanacar arjjatañataqui takenin nayrakatapana.

34Jakenacasti jupan judiötap yatisinjja, juc'ampiw arnakapjjäna: “¡Jacpan Diana, Efesonquirinacan diosapa!” sasajj niya pä horjamaw arnakasipjjäna.

35Ucatsti Éfeso marcan secretariopajj jakenacaru amuct'ayasinjja sänwa: “Efesonquir tatanaca, take jakew yatipjje Éfeso marcajj Diana diosan templop uñjirïtapjja. Acaruraquipï mä jupar uñtatajj alajjpachat jalaktanejja.

36Takeniw ac yatipjjejja. Uqhamasti jan juc'amp colerasipjjamti. Janirac cuns lurapjjamti, jan sum yatjjatcasinjja.

37Irpanipctas uca jakenacasti janiw qhitirus cuna ñankhsa lurapquiti. Janiraquiw jumanacan Diana diosamatsa jan wal parlapcaraquiti.

38Ucampis Demetrion cuna quejapas utjchejja, uqhamarac qhitinacatejj jupamp chic irnakapquis ucanacansa, uca queja uñjañataquejj juesanacaw utji. Uca autoridadanacaruw jupanacajj quejasipjjañapa, uqhamat sapa maynis arsusipjjañapataqui.

39Jumanacan amtäwinacamatejj yakhäscchejja, yakha suma tantachäwinwa ucajj suma amuyt'atäñapajja.

40Jichhajj niyaquitejj aqham ch'ajjwancstanjja, janiw walt'csnati. Juchañchistaspaw jilïrinac contras sayt'csnas uqhama. Jupanacatejj jisct'istaspa ucapachajja, janiw cun saña puedcsnati” sasa.

41Take acanac arsutatsti, jupajj uca tantachäwjja tuct'ayjjänwa.

← Chapter 18 Jump to: Chapter 20 →