Daniel 4

Ayamar Bible (Qullan Arunaca)

← Chapter 3 Jump to: Chapter 5 →

1“Naya, Nabucodonosor reyejj muntwa sumancañajj utjañapa, phokt'atäñasa take marcanacana, uqhamaraqui take jakenac taypina aca oraken jaquirinacana.

2Munaractwa jumanacan yatipjjañanacama, cunja jach'a muspharcañanacatejj alajjpachanquir Diosajj nayampi lurqui ucanaca.

3¡Cunja jach'as luräwinacapajja, uqhamaraqui milagronacapasa! Jupan reinopasti wiñayataquipunïniwa, munañanïñapasa wawanacapans wawanacapataqui.

4“Naya, Nabucodonosor reyejj c'uchiquiw palaciojjancascäyäta, wali kamiriraquïyätwa.

5Ucampisa mä arumawa iquiñancjjasina, mä samca samcasta ucasti walpun warariyitu, cunaymani casta lup'ïwinaca, unañchäwi uñjaracta, take ucanacaw ajjsarañampi phokhantitu.

6Ucatwa mayiraquïyätjja take yatiñani jakenacajj aca Babilonia oraken utjapquisa ucanacajj nayar uñjiri jutapjjañapataqui, uca samcajj cuntejj saña munqui uca khanañchapjjañapataqui.

7Ucatsti jutapjjänwa take mago jakenaca, yatirinaca, yatiñaninaca, warawaranaca uñch'uquirinaca, qhitinacatejj Babilonia oraken utjapcän take ucanaca, ucat nayajj jupanacaru samcajja yatiyta, ucampis jupanacajj janiw khanañchañataquejj ch'amanïpcänti.

8Kheparusti Daniel chachajj nayan nayrakatajjaru uñstani, qhititejj Beltsasar sasa sutichatäqui nayan diosajjan sutip laycu, uca Daniel waynasti kollan Diosan ajayupan irpataraquiwa, ucat nayajj Daniel waynarojj samcajja yatiyaracta, aqham sasa:

9‘Beltsasar, take yatiri jakenacan jilïripa, nayajj yattwa kollan Diosan ajayupajj jumaru irpascatapa, uqhamaraqui take cunanacatejj imantatäqui ucanacsa yatiractawa. Jichhajj sum ist'am cuntejj samcana uñjcta ucanaca, khanañcharaquita cuntejj uca samcajj saña munqui ucanacsa.

10Aqhamwa iquiscasina samcastjja: ‘Aca orake taypinjja mä jach'a kokaw utjäna.

11Kokasti jilsusinjja wali thurupuniw tucuwayjje, uca kokan alipasti alajjpachcamaw purïna, wali jayatpachwa uñtasïna, orak tucusitsa uñstascaquïnwa.

12Laphinacapas wali sumaraquïnwa, achunacapasa waliraqui, take jakenacaru mank'ayañataquisa phokt'ataraqui. Pampanquir animalanacasti uca kokan ch'iwiparuw jutapjjäna; jamach'inacas layminacaparuw tapachasipjjäna, take acapachasti uca kokatwa jacapjjäna.

13“Ucat acatjamatwa samcajjanjja alajjpachat mä angela sarakasinquir uñjta.

14Ucat uca angelajj jach'at art'araquïna aqham sasa: “Uca kokjja liwinucupjjam; layminacapsti qhuchhurapjjam, laphinacapsa apakapjjam, achunacapsa willitatapjjam, cawquïri animalanacatejj ch'iwipancqui ucanacas chhuctawayjjapjjaracpan, uqhamaraqui layminacapanquiri jamach'inacasa.

15Ucampisa pachpa orakeru kheparayapjjaraquim troncopampi, saphinacapampjja; hierrota, bronceta lurat cadenanacampi ñach'antapjjam, ucatsti pampanquiri koranacampi chica apanucupjjam. Sullanacasti jupjjarojj sullantaracpan, pampanquiri animalanacampi, koranacampi chicaraquïpan.

16Amuyupas mayjt'aracpan, mä animalan amuyupjama tucuracpan, uca jan walt'añasti pakallko maranacaraquïpan.

17Uca juchañchäwi arunacwa arsuwayapjje kollana uñjiri angelanacajja, uqhamat take jakenacajj yatipjjañapataqui, alajjpachanquiri Diosajj ch'amanïtapa, take jakenacana apnakañanacapjjarojja, jupaw marca apnakañanacsa churaraqui qhitirutejj churañ munqui ucaru, ucatsti mä marcan jilïripatwa utt'ayaraqui, qhititejj take jakenacat sipansa llamp'u chuymanïqui ucarojja.’

18“Acaw naya, Nabucodonosor reyin, samcasitajjajja. Jichhajj Beltsasar, jumajj khanañchita cuntejj uca samcajj sañ munqui ucjja, janiw qhitisa yatiñani jakenacajj taypitjja ucjja amuyt'apquiti; ucampisa jumajj khanañchasmawa, kollan Diosan ajayupajj jumar irpascatap laycu.”

19Uqhamasti Daniel waynajj, qhitirutejj Beltsasar sas sutichapcäna ucajja wali muspharataw uñjasïna, cuna amtäwinacatejj p'ekeparu jutcän ucanacampisa wali mayjt'ataw uñjasiraquïna. Ucampisa naya, reyejj, juparojj saractwa: ‘Beltsasar, jan jumajj llaquisimti cuna samctejj samcascta ucatjja, uqhamaraqui khanañchäwipatsa’ sasa. Beltsasarasti ucjjarojj saraquituwa: ¡Jach'a rey, cuntejj uca samcajj sañ munqui ucanacasti juman uñisirinacamjjaru purpan!

20Uca jach'a lanqhu koka uñjcta ucasti, cawquïritejj alajjpachcama purcäna, uqhamaraqui take chekatsa uñjcayäna,

21suma laphinacani, achunacapas waljaraqui, take jakenacaru mank'ayañatacjama, pampanquiri animalanacas uca kokan ch'iwiparu jutapjjäna, uqhamaraqui layminacaparu jamach'inacasa tapachasipjjäna;

22uca kokajj, juma, jach'a reyïtawa, jiltasinsti wali munañanipuniw tuctajja. Jach'a reyin munañapasti alajjpachcamawa purt'araqui, munañanïñapasa take aca orakpacharuw puriraqui.

23Juma, jach'a reyisti, uñjaractawa alajjpachatjja mä kollan angelar sarakasinquiri, aqham sasa: ‘Uca kokjja liwinucupjjam, t'unjapjjaraquim, ucampisa pachpa orakeru jilt'ayapjjam troncompi saphinacampjja, hierrot, broncet lurata cadenanacampi ñach'antapjjaraquim, ucatsti pampa koranac taypiru apanucupjjam; jupjjarusti sullajj sullantaracpan, pampanquiri animalanacampi chica uca koranaca mank'aracpan pakallko mara phokhasiñapcama.’

24Uqhamwa alajjpachanquiri jach'a Diosajj arsu juma, jach'a reyi, toketjja.

25Juma, jach'a reyisti, jakenacatjja yakhachatäjjätawa, animalanacampi chicaw jacaraquïta, vacanacjamaw koranac mank'araquïta, janchimjjarusa sullaw sullantaraquini. Uqhamaw juma, jach'a reyejj, pakallko mara jacäta, alajjpachanquiri Diosajj take acapachan reinonacjjarusa munañanïtapa yatekañamcama, uqhamaraqui jupajj apnakerit utt'ayaraqui qhitirutejj munqui ucaru.

26Cuna arutejj utjcäna uca troncompi saphinacapjja pachpa orakeru jaytañataquejja, ucajj sañ muni Diosajj mä urojj juma jach'a reyirojj cuttayjjätamwa reinomjja, cunapachatejj jumajj amuyjjäta alajjpachanquiri jach'a Diosajj munañanïtapa take cunjjarusa ucapacha.

27Uca laycu, jichhajj, jach'a rey, aca ewjja aru ist'ita: Juma, jach'a reyejj, take cunsa chekaparupuni uñjam, janiraqui juc'ampi juchsa lurcjjamti, ñankha luräwinacamsti apanucum, pobrenacaru yanapt'araquim. Inampisa uqhamata, jach'a reyejj, sumancañampina, kamir cancañampina jacascasma sasa.

28Take aca yatiyäwinaca Nabucodonosor reyir churatasti phokhasipunïnwa:

29Mä mara pasjjepansti, reyejj palacio patanacapanwa sarnakascäna,

30ucapachaw jupajj säna: “Uñjapjjam, cunja jach'as Babilonia marcajja. Nayaw jach'a munañajjampi reinojjan jach'a marcapäñapataqui uqham lurayta, uqhamat nayan jach'a cancañajjat yatipjjañapataqui” sasa.

31Uqhamaw reyejj parlascäna, ucat acatjamat mä arojj alajjpachat ist'asini aqham sasa: “Nabucodonosor rey, aca arunac ist'am: Reinomajj janiw jumancjjeti;

32jakenacatjja yakhachatäjjätawa, animalanacampiw jacjjäta, vacjamaraquiw koranac mank'äta pakallko mara phukhasiñapcama, alajjpacha Diosajj jach'a ch'amanïtapa, munañanïtapa take aca orakenquiri marcanacjjaru, uqhamaraqui jupajj apnakerinac utt'ayatapa qhitirutï munqui uc yatiñamcama” sasa.

33Ucspachaw uca arsüwinacajj phokhasïna, Nabucodonosor reyisti jakenacatjja yakhachatäjjänwa, orko vacanacjamaw koranac mank'araquïna, janchipasti sullampi ch'aranjata, ñic'utanacapasa, sillunacapasa wali jach'anacaw jilantjjaraquïna, jach'a paca jamach'in phuyupjama sillunacapjamaraquëjjänwa.

34“Cunapachatejj uca juchañchäwi urunacajj phokhasjjäna ucapachasti, naya Nabucodonosor reyejj alajjpacha uñtta, ucatsti lokhe cancañajjatjja kollatätajjwa amuyasjjaracta, ucat nayajj alajjpachanquiri Diosaru jach'añchta, aca arunacampiw juparojj yupaycharacta, qhititejj wiñayataqui jacqui ucaru: ‘Ch'amapajj wiñayataquipuniwa; munañapasa wawanacapans wawanacapataquiraquïniwa.

35Jupa nayrakatanjja janiw cunäquisa take acapachanquiri jakenacajja; jupaw munañaparjama luraraqui, alajjpachansa uqhamaraqui acapachansa. Janiw qhitis ch'amapa toke sayt'asirejj utjquiti, ni jisct'caraquispasa cunatsa uqham luri sasajja.’

36“Ucspacharaquiw nayajj amuythapistjja, wasitat catjjaracta reinojjarusa, jach'añchäwinacajjsa, uqhamaraqui jach'a cancañajjsa. Yanapirinacajjasa, jilïri autoridadanacasa nayar thakeriw jutapjjetu, ucat nayajj wasitat marcajja apnakañjja kalltjjaracta, ch'amajjasti nayra ch'amajjat sipansa juc'ampiw jiljjattaraquïna.

37“Jichhajj naya Nabucodonosor reyejj alajjpachanquiri reyirojj yupaycharactwa, jach'acharactwa, wakaycharactwa, cuntejj jupajj lurqui ucanacasti chekapapuniwa, uqhamaraqui qhititejj jach'a jach'a tucqui ucarusti jisc'achjaraquispawa.”

← Chapter 3 Jump to: Chapter 5 →