Ezra 3

Ayamar Bible (Qullan Arunaca)

← Chapter 2 Jump to: Chapter 4 →

1Cunapachatï pakallkör phajjsejj purinjjäna ucqhajja, israelitanacajj marcanacapanwa wact'ayasipjjäna, ucatjja take marcawa Jerusalén marcana tantachasipjjäna.

2Ucatsti Josadac chachan Josué yokapasa, uqhamarac sacerdote masinacapasa, Salatiel chachan Zorobabel yokapasa, uqhamarac familianacapasa Israelan Diosapan altarapa lurañaruwa uchasipjjäna, uca patjjana nact'ata loktäwinaca loktañataqui, cunjämtï Moisés Diosan jakep toke leyejj siscäna uqhamarjama.

3Altarsti suma utt'ayapjjäna, jupanacajj uca oraken jaquir jakenacar ajjsarapjjatap laycu, ucatsti sapa alwanaca, uqhamarac sapa jayp'unacawa uca patjjar nact'at loktäwinaca loktapjjerïna, Tatitur jach'achasina.

4Ucjjarusti Chhujllanaca luraña fiestwa lurapjjäna, cunjämatï leyin kellkatäcäna uqhamaru, sapüruraquiw nact'at loktäwinaca loktapjjerïna, cunjämtï lurapjjirïcäna, sapürus cawkhay munaschi uqhamarjama,

5sapüru loktañ nact'at loktäwinaca, uqhamarac machak phajjsita wact'qui Tatitur loktata fiesta lurañanacajj utjqui ucanacata, uqhamarac qhitinacatejj take chuymapata Tatitur loktcäna ucanacaraqui.

6Pakallkür phajjsita kallta urutpachwa Tatitur nact'at loktäwinac loktañ kalltapjjäna, janïras Tatitun templopajj lurayatäña kalltascäna ucqhatpacha.

7Ucatsti uta luririnacaru, carpinteronacarojja kollkwa churapjjäna, uqhamarac Tiro marcanquirinacarusa, Sidón marcanquirinacarusa mank'aña, umaña, aceite, jupanacajj Líbano kollutjja cedro madera apapjjañapataqui kotanjama Jope chekacama, cunjämatï Persia marcanquir Ciro reyejj arup churcäna uqhamaru.

8Jerusalén marcaru Diosan utaparu purinitapata payïri marana, payïri phajjsipanwa kalltapjjäna Diosan templopa wasitat utachaña Salatiel sat chachan Zorobabel yokapa, uqhamarac Josadac chachan Josué yokaparaqui, jupanacamp chicäpcän ucanaca, sacerdotenaca, levitanaca, uqhamarac preso apatanacajj Jerusalenaru cutt'anipcäna take ucanacaraqui. Uca luraña sarayapjjañapataquisti catuyapjjänwa pä tunca maranita ucsar jila marani levita chachanacaru.

9Josué chachasti yokanacapampi, uqhamarac jilanacapampejj mä sapa tamaquiwa tucupjjäna Cadmiel chachampi, uqhamarac yokanacapampi, jupanacasti Judá familiata jutirïpjjänwa, uqhamarac mayninacajj Henadad chachan yokanacapa, yokanacapansa wawanacapa, uqhamarac levita jilanacaparaquïnwa, qhitinacatejj Diosan templopana lurañanaca sarayapcäna ucanaca.

10Cunapachatejj uta luririnacajj Tatitun templopataqui cimiento jakontapcäna ucqhajja, sacerdotenacajj sayt'asipjjänwa uca horasataqui suma isinacani, uqhamarac trompetanacaniraqui. Asaf chachan familiapata sarakeri levitanacajja, platillonacwa apapjjäna Tatitur yupaychañataqui, cunjämatï Israelan David reyipana lurañatac churatäcäna uqhamaru.

11Mayninacajja yupaychaña k'ochunacwa k'ochupjjäna, mayninacasti sapjjaraquïnwa: “Tatiturojj yuspagarapjjam, jupajj asquiwa, uqhamarac munasiñapas Israel marcapataquejj wiñayataquiwa uca laycu” sasa. Ucatsti take marcpachawa cusisiñata art'apjjäna, uqhamarac Tatiturus yupaychapjjaraquïna, Tatitun templopa lurañanjja kalltasitap laycu.

12Ucatjja waljaniwa sacerdotenacatsa, levitanacatsa, familia taypita jilïrinacasa, qhitinacatejj sinti awquinacäjjapjjäna nayra templsa uñjapcäna ucanacajja, jach'atwa jachapjjäna, jupanacajj uñjapjjänwa uca machak templojj wasitat luraña kalltasïna uca laycu. Uca pachpa horasanjja waljaniwa mayninacajj cusisiñata art'asipjjäna.

13Janiw qhitis amuyapcänti cusisiñata arnakasirinacsa, uqhamarac jakenacan jachatanacapsa, jupanacasti jach'atwa arnakasipjjäna, uca ojjotanacapasti jayatpachwa ist'asïna.

← Chapter 2 Jump to: Chapter 4 →