2 Peter 3

Azerbajani Bible (South) Used in Both Iran and Azerbaijan 2008

← Chapter 2 Jump to:

1ائندي سِوگئلئلر، بو ائکئنجي مکتوبدور کي، سئزه يازيرام؛ اونلاردا چاليشيرام کي، خاطيرلاتماقلا سئزئن خالئص فئکئرلرئنئزي اويانديريم کي،

2سئز، موقدّس نبئلر طرفئندن قاباقجادان ديئلمئش سؤزلري و حوارئلرئنئزئن واسئطهسئله ديئلمئش رب و قورتاريجينين امرئني يادا سالاسينيز.

3هر شيدن اوّل بونو بئلئن کي، آخير گونلرده رئشخند ادنلر، رئشخندله گلهجکلر و اؤز شهوتلرئنئن دالينجا قاچيب،

4دئيهجکلر: "بس اونون گلئشئنئن وعدهسي هاني؟ چونکي اجدادلاريميزين گؤزلرئني حياتا يومدوقلاريندان بري، هر شي او حالدا داوام ادئر کي، خئلقتئن باشلانيشيندان وار ائدي."

5بله دوشونرکن، نظرلرئندن قاچيرديرلار کي، گؤيلر تارينين کلامي ائله قدئمدن وار ائدي، ير ده سودان و سو واسئطه‌سئله شکئل تاپدي

6و اونونلا دا دونيا او زامان سو ائله بوغولوب محو اولدو.

7لاکئن ائندئکي گؤيلر و ير اونون کلامي ائله اود اوچون ساخلانيب، دئنسئز آداملارين موحاکئمه و هلاکت گونو اوچون حئفظ اولونور.

8آمّا سوگئلئلر، بو بئر شيي ياددان چيخارتمايين کي، ربّئن يانيندا بئر گون مئن ائل، مئن ائل ده بئر گون کئمي دئر.

9ربّ اؤز وعدهلرئنده يوبانماز، نجه کي، بعضئلر يوبانماق حساب ادئرلر. آمّا او، سئزه صبرله رفتار ادئر و ائسته‌مئر کي، هچ کس هلاک اولسون، لاکئن هامي تؤوبهيه گلسئن.

10آمّا ربّئن گونو اوغرو کئمي گلهجک کي، اوندا، گؤيلر بؤيوک بئر گورولتو ائله آرادان گدهجک و عونصورلر شئدّتلي حرارتله محو اولاجاقلار، ير و اونون ائشلري ده ياناجاقدير.

11ائندي کي، بوتون بونلار بو جور آرادان گدهجکلر، سئز نجه ائنسانلار گرک اولاسينيز؟ موقدّس رفتاردا و دئندارليقدا

12ربّئن گونونون گلئشئني گؤزله‌يئب، اونو تَلَسدئرهسئنئز کي، اونون سببئندن گؤيلر يانيب آرادان گدهجک و عونصورلر شئدّتلي حرارتله اَرئيه‌جکلر!

13آمّا بئز اونون وعدهسئنه گؤره تزه گؤيلر و تزه بئر يري گؤزله‌يئرئک کي، اونلاردا صالحلئک ساکئندئر.

14بونا گؤره سوگئلئلر، ائندي کي، بو شيلري گؤزله‌يئرسئنئز، چاليشين کي، او سئزي باريش ائچئنده، لکهسئز و قوصورسوز تاپسين.

15و ربّئمئزئن صبرئني ده نئجات حساب ادئن؛ نجه کي، سوگئلي قارداشيميز پولوس دا، اونا ورئلمئش حئکمتله سئزه يازدي.

16نجه کي، بوتون مکتوبلاردا اله شيلردن صؤحبت ادئلئر کي، باشا دوشمه‌سي چتئندئر و جاهئل و ثباتسيز آداملار، آيري موقدّس يازيلارا اتدئيي کئمي، بونلاري دا اؤز هلاکتلري اوچون چوئرئرلر.

17بونا گؤره، سئز، اي سوگئلئلر، بونلاري قاباقجادان بئله‌رک، احتئياط ادئن اِله کي، اوصولسوز آداملارين سهولرئله يولدان آزديريلماياسينيز و اؤز ثباتينيزدان دوشمه‌يهسئنئز.

18لاکئن رب و قورتاريجيميز عئسا مسئحئن معرئفتئنده بؤيويهسئنئز. اونا هم ائندي هم ده ابدئيّت گونونهجک عئزّت اولسون. آمئن.

← Chapter 2 Jump to: