Ecclesiastes 1

Azerbajani Bible (South) Used in Both Iran and Azerbaijan 2008

Jump to: Chapter 2 →

1اورشلئمده پادشاهليق ادن داوود اوغلو واعئظئن سؤزلري.

2واعئظ ديئر: باشدان باشا باطئلدئر! باشدان باشا باطئلدئر! هر شي باطئلدئر.

3ائنسانين گون آلتيندا چکدئيي بوتون زحمتلرئنئن نه فايداسي وار؟

4بئر نسئل گدئر، او بئري نسئل گلئر، آمّا ير دائم دورور.

5گون چيخير، گون باتير؛ تَله‌سئک يرئنه دؤنور کي، تزه‌دن چيخسين.

6يل جنوب سمتئنه اسئر، سونرا شئمال سمتئنه دؤنور، دؤنه-دؤنه گدئر؛ دؤنوشلرئني تکرار ادئر.

7بوتون چايلار دهنزه آخيرلار، آمّا دهنز هچ دولمور. آخديقلاري يره دؤنورلر کي، تزه‌دن آخسينلار.

8هر شي يورور؛ بئر آدامين دئيه‌بئله‌جَيئندن ده چوخ! گؤز گؤرمکدن دويمور، قولاق دا اشئتمکدن.

9نه اولوب، گئنه اولاجاق، نه ادئلئب، گئنه ادئله‌جک؛ اونا گؤره ده گون آلتيندا هچ تزه بئر شي يوخدور.

10مگر اِله بئر شي وار کي، اونون حاقّيندا ديئلسئن: "باخ، تزه بئر شي!" او دا چوخدان وار ائمئش، بئزئم زامانيميزدان دا قاباق.

11قاباقکي شيلردن هچ نه خاطيرلانمير، گله‌جکده باش ورن شيلردن ده، بوندان سونرا گلنلر آراسيندا هچ نه خاطيرلانماياجاق.

12من واعئظ، ائسرايئل اوستونه اورشلئمده پادشاه ائدئم.

13اوره‌يئمي بونا قويدوم کي، بوتون گؤيون آلتيندا عمل ادئلنلري حئکمتله تفتئش ادئب آراشديريم. تاري ائنسانلارا نه دردلي بئر وظئفه ورئب کي، اونون آلتيندا زحمت چکسئن!

14گون آلتيندا ادئلن بوتون ائشلري گؤردوم، و باخ، هاميسي باطئلدئر؛ يل دالينجا قاچماقدير.

15اَيري اولان دوز اولا بئلمز، اسکئک اولان ساييلماز.

16قلبئمده ددئم: "باخ، من بؤيوک بئر آدام اولموشام و مندن قاباق اورشلئمده اولان پادشاهلارين هاميسيندان چوخ حئکمت آرتيرميشام. اوره‌يئم چوخ حئکمت و معرئفت گؤروب."

17سونرا، اوره‌يئمي بونا قويدوم کي، حئکمتي آنلاييم، دلئلئک و سفه‌لئيي بئلئم. و بئلدئم کي، بو دا يل دالينجا قاچماقدير.

18چونکي حئکمت چوخ اولدوقجا کَدَر‌ ده چوخالير، معرئفت آرتديقجا، درد ده آرتير.

Jump to: Chapter 2 →